Mu Bbaibbele ibbala lyakuti “julu” kanji-kanji lilabelesyegwa kwaamba zintu zyotatwe: (1) mulengalenga; (2) busena bwamuuya; alimwi (3) ncitondezyo cabusena busumpukide. Mukaambo kamwi akamwi, icaambwa mucibalo ncecitugwasya kuzyiba cini cipandululwa. a

1.   Mulengalenga. Mukaambo aaka, “julu” lyaamba cibeela mwalo muwo mowuunga, bayuni mobauluka, makumbi mwaapanga mvwula acaanda alimwi alulabo molumweka. (Intembauzyo 78:26; Tusimpi 30:19; Isaya 55:10; Luka 17:24) Alimwi cilakonzya kwaamba busena bwa “zuba, mwezi anyenyeezi.”​—Deuteronomo 4:​19; Matalikilo 1:1.

2.   Busena bwamuuya. Ibbala lyakuti “julu” alimwi lyaamba busena bwamuuya, busena busumpukide kwiinda bubumbo mbotubona. (1 Bami 8:​27; Johane 6:​38) Busena bwamuuya oobu nkwakkala Jehova Leza, walo uuli “Muuya,” alimwi abangelo balo mbaakalenga. (Johane 4:​24; Matayo 24:36) Ziindi zimwi, “majulu” alaambwa kwiiminina bangelo basyomeka, “mbungano yabasalali.”​—Intembauzyo 89:​5-7.

    Bbaibbele alimwi libelesya bbala lyakuti “majulu” ikwaamba cacigaminina cibeela cabusena bwamuuya kwalo Jehova nkwakkala, ‘busena bwakwe nkwakkala.’ (1 Bami 8:​43, 49; Bahebrayo 9:​24; Ciyubunuzyo 13:6) Mucikozyanyo, Bbaibbele lyakaambila limwi kuti Saatani amadaimona bayoogwisyigwa kuzwa kujulu, kunyina nobayoozumizyigwa kunjila mubusena mwakkala Jehova.​—Ciyubunuzyo 12:​7-9, 12.

3.   Ncitondezyo cabusena busumpukide. Magwalo alabelesya bbala lyakuti “julu” kwiiminina busena busumpukide, kanji-kanji ikwaamba nguzu zyabweendelezi. Cuuno icili boobo cilakonzya kukkalwa a:

   •   Jehova Leza lwakwe kali Mweendelezi singuzuzyoonse.​—2 Makani 32:20; Luka 15:21.

   •   Bwami bwa Leza, mfwulumende iiyoogwisya bweendelezi bwabantu. Bbaibbele lyaamba kuti Bwami oobo “majulu mapya.”​—Isaya 65:17; 66:22; 2 Petro 3:​13. b

   •   Banakristo, ibacili anyika, balo ibajisi bulangizi bwakuunka kujulu.​—Baefeso 2:6.

   •   Mfwulumende zyabantu izilibikka muciimo cisumpukide kwiinda balelwa bazyo.​—Isaya 14:12-​14; Daniele 4:​20-​22; 2 Petro 3:7.

   •   Myuuya mibi yalo iilela munyika.​—Baefeso 6:​12; 1 Johane 5:​19.

Ino kujulu kulibonya buti?

 Busena bwamuuya mbusena bwamilimo. Buzwide mamiliyoni aazilenge zyamuuya ‘izicita ncaamba [Jehova].’​—Intembauzyo 103:20, 21; Daniele 7:​10.

 Bbaibbele lipandulula julu kuti mbusena bwamumuni uumwekesya. (1 Timoteyo 6:​15, 16) Musinsimi Ezekiele wakabona cilengaano cakujulu icakajisi “mumuni uumweka,” kakuli cilengaano cakujulu Daniele ncaakabona cakali kubikkilizya a “kalonga kamulilo.” (Ezekiele 1:​26-​28; Daniele 7:​9, 10) Kujulu kulisetekene, naa kulasalala, alimwi kuleebeka.​—Intembauzyo 96:6; Isaya 63:15; Ciyubunuzyo 4:​2, 3.

 Bupanduluzi mbolipa Bbaibbele kujatikizya kujulu bulagambya. (Ezekiele 43:​2, 3) Nokuba boobo, bantu tabakonzyi kumvwisya cakumaninina mbokubede kujulu nkaambo mbusena bwamuuya.