Kusalala caamba kutajatikizyigwa mukusofwaala. Ibbala lya Chihebrayo lyakasandululwa kuti “kusalala” lyakazwa kubbala lyaamba “kwaandaana.” Nkekaambo kaako, cintu cisalala cilaandanizyigwa kutegwa citabelesyegwi abantu boonse, naa kubonwa kuti cilisetekene, ikapati akaambo kakuti cilasalala.

 Leza ulasalala kapati. Bbaibbele lyaamba kuti: “Kunyina muntu uusalala uuli mbuli Jehova.” a (1 Samuele 2:2) Aboobo, Leza uleelela kubikka zyeelelo kujatikizya cintu cisalala.

 Ibbala lyakuti “kusalala” lilakonzya kubelesyegwa kucintu cili coonse iciswaangene cacigaminina kuli Leza, kwaambisya zintu zibelesyegwa buyo mubukombi. Mucikozyanyo, Bbaibbele lilaamba kujatikizya:

•   Masena aasalala: Leza wakaambila Musa naakali afwaafwi acitewo ciyaka mulilo kuti: “Busena aawo mpoimvwi bulasalala.”​—Kulonga 3:2-5.

•   Miswaangano iisalala: Bana Israyeli bansiku bakali kukomba Jehova ciindi aciindi mumapobwe aabukombi aitwa kuti “miswaangano iisalala.”​—Levitiko 23:37.

•   Zintu zisalala: Zintu izyakali kubelesyegwa mukukomba Leza atempele lyansiku mu Jerusalemu zyakali kwiitwa kuti ‘zibelesyo zisalala.’ (1 Bami 8:4) Zintu eezyi zisetekene zyakeelede kulemekwa kapati, nokuba boobo tiizyakeelede kukombwa. b

 Inzya. Leza waambila Banakristo kuti: “Mweelede kusalala, nkaambo mebo ndilasalala.” (1 Petro 1:​16) Nokuba kuti cili boobo, bantu batalondokede kunyina nobakonzya kusika azyeelelo zya Leza zilondokede izyabusalali. Nokuba boobo, bantu ibatobela milawo ya Leza iiluleme balakonzya kwaambwa kuti ‘balasalala, akuzuminwa a Leza.’ (Baroma 12:1) Muntu uusolekesya kusalala ulalitondezya kwiinda mumajwi aakwe alimwi amilimo. Mucikozyanyo, ulalutobela lulayo lwamu Bbaibbele lwakuti “kamusalala akulilesya kubwaamu” alwakuti “amusalale mubukkale bwanu boonse.”​—1 Batesalonika 4:3; 1 Petro 1:​15.

 Inzya. Ikuti umwi waleka kupona kweelana azyeelelo zya Leza, inga Leza waleka kumubona kuti ulasalala. Mucikozyanyo, bbuku lyamu Bbaibbele lya Bahebrayo lyaamba “bakwesu basalala,” pele licenjezya kuti bakali kukonzya kuba “amoyo mubi uunyina lusyomo kwiinda mukulizandula kuli Leza uupona.”​—Bahebrayo 3:​1, 12.

 Makani aakubeja: Kutakwata naa kutakwatwa kupa kuti muntu asalale.

 Makani aamasimpe: Nokuba kuti Munakristo ulakonzya kusala kutakwata naa kutakwatwa, eeci kucigama tacimupi kusalala kuli Leza. Masimpe kuti aabo ibasala kutakwata naa kutakwatwa balakonzya kubikkila maano kubukombi kakunyina kunyonganizyigwa. (1 Bakorinto 7:​32-​34) Nokuba boobo, Bbaibbele litondezya kuti aabo ibakwete naa ibakwetwe abalo balakonzya kusalala. Mubwini, omwe akati kabaapostolo ba Jesu wazina lyakuti Petro, wakalikwete.​—Matayo 8:​14; 1 Bakorinto 9:5.