Pobwe Lyakwiindilila lyakali kusekelelwa aba Juda akaambo kakuti Leza wakabafwutula bana Israyeli kuzwa mubuzike mu Egepita mu 1513 B.C.E. Leza wakalailila bana Israyeli kuti kababuyeeya buzuba buyandika kapati bwanamba 14 mumwezi wa Abibi mukkalenda yaba Juda, bwalo bwakazootalika kwiitwa kuti Nisani.​—Kulonga 12:42; Levitiko 23:5.

Nkaambo nzi ncoliitwa kuti Pobwe Lyakwiindilila?

 Imabala aakuti “Pobwe Lyakwiindilila” apandulula ciindi Leza naakakwabilila bana Israyeli kuntenda yakajazya bana bakusaanguna babana Egepita. (Kulonga 12:27; 13:15) Leza katanabaambila kujatikizya ntenda eeyi, wakalailila bana Israyeli kuti basansaile bulowa bwambelele naa mpongo aminsende yamilyango yabo. (Kulonga 12:21, 22) Kucita boobu kwakali kugwasya kuti Leza acibona citondezyo eeci wakali ‘kwaaindilila’ maanda aabo alimwi akutabajaya bana babo bakusaanguna.​—Kulonga 12:​7, 13.

Ino Pobwe Lyakwiindilila lyakali kucitwa buti kaindi?

 Leza wakalibapede bana Israyeli malailile mbobakeelede kusekelela Pobwe Lyakwiindilila lyakusaanguna. a Zintu zitobela zitondezya zimwi Izyakali kucitwa mu Mapobwe Aakwiindilila aambidwe mu Bbaibbele.

•   Cituuzyo: Mikwasyi yakalaililwa kusala mbelele naa mpongo iijisi mwaka omwe mubuzuba bwakkumi mumwezi wa Abibi naa Nisani, mpoonya mubuzuba bwanamba 14, bakeelede kwiijaya. Lya Pobwe Lyakwiindilila lyakusaanguna, ba Juda bakali kusansaila bulowa aminsende alimwi aatala aamilyango yabo, bakali kuyoka nyama yoonse mpoonya akwiilya.​—Kulonga 12:​3-9.

•   Cakulya: Kuyungizya anyama yambelele naa mpongo, bana Israyeli bakali kulya zinkwa zitajisi bumena alimwi azisyu zilula lya Pobwe Lyakwiindilila.​—Kulonga 12:8.

•   Pobwe: Bana Israyeli bakali kucita Pobwe lya Zinkwa Zitajisi Bumena kwamazuba aali ciloba, muciindi eeci tiibakali kulya cinkwa cijisi bumena.​—Kulonga 12:17-​20; 2 Makani 30:21.

•   Kwiiya: Bazyali bakali kucibelesya ciindi eeci kuyiisya bana babo kujatikizya Jehova Leza.​—Kulonga 12:25-27.

•   Kweenda: Kumbele, bana Israyeli bakatalika kweenda kuya ku Jerusalem kukucita Pobwe Lyakwiindilila.​—Deuteronomo 16:​5-7; Luka 2:​41.

•   Zilengwa Zimwi: Mumazuba aa Jesu, waini alimwi akwiimba zyakazoobikkilizyigwa lya Pobwe Lyakwiindilila.​—Matayo 26:19, 30; Luka 22:15-​18.

Makani aakubeja kujatikizya Pobwe Lyakwiindilila

 Makani aakubeja: Banakristo baleelede kucita Pobwe Lyakwiindilila.

 Makani aamasimpe: Kuzwa ciindi Jesu naakacita Pobwe Lyakwiindilila mu Nisani 14, 33 C.E., wakatalisya bubambe bupya: Mulalilo wa Mwami. (Luka 22:19, 20; 1 Bakorinto 11:20) Oobu bubambe bwakanjila mubusena bwa Pobwe Lyakwiindilila, nkaambo ndipobwe lyacinunuzyo ca ‘Kristo, imwanaambelele wa Pobwe Lyakwiindilila.’ (1 Bakorinto 5:7) Cituuzyo cacinunuzyo ca Jesu cilabeleka kapati kwiinda cituuzyo cakali kupegwa lya Pobwe Lyakwiindilila, nkaambo cilatwaangununa kubuzike bwacibi alufwu.​—Matayo 20:28; Bahebrayo 9:​15.