Bana bapati bajisi mukuli uuyandika kapati wakulanganya bazyali babo bacembeede. Bbaibbele lyaamba kuti bana bapati beelede ‘kusaanguna kwiiya kubelekela Leza cakulyaaba muŋanda mobazwa akubapa nzyobeelede bazyali babo . . . , nkaambo eeci ncibotu mumeso aa Leza.’ (1 Timoteyo 5:4) Ciindi bana bapati nobalanganya bazyali babo bacembeede, nkokuti bali mukutobela malailile aamu Bbaibbele aakulemeka bazyali babo.—Baefeso 6:2, 3.

 Bbaibbele talyaambi malailile aagaminide aakulanganya bazyali bacembeede. Nokuba boobo, lilijisi zikozyanyo zyabaalumi alimwi abamakaintu basyomeka ibakacita oobo. Alimwi lilijisi lulayo lukonzya kugwasya baabo balanganya bazyali baceembede.

•  Ino muunzila nzi mikwasyi iimwi mboyakali kulanganya bazyali bacembeede kaindi?

•  Ino ndulayo nzi lwamu Bbaibbele lukonzya kugwasya baabo balanganya bacembeede?

•  Sena Bbaibbele lilaamba kuti bazyali bacembeede beelede kulanganizyilwa aŋanda yabana naa yabo?

 Bakali kucita oobo munzila ziindene-indene, kweelana abukkale.

•   Josefa wakali kukkala kulamfwu ankobakali kukkala bausyi bacembeede, ba Jakobo. Ciindi naakakkala kabotu, wakabalonzya kutegwa bakkale afwaafwi anguwe. Aboobo wakabapa kwakukkala, wakali kubasanina alimwi akubakwabilila.—Matalikilo 45:9-11; 47:11, 12.

•   Rute wakalongela mucisi mobakali kukkala banyinazyala alimwi wakali kubeleka canguzu kutegwa abalanganye.—Rute 1:16; 2:2, 17, 18, 23.

•   Jesu, kakuceede ciindi cisyoonto kuti afwe wakasala muntu umwi wakulanganya banyina, Mariya, iwakali mukamufwu.—Johane 19:26, 27. a

 Bbaibbele lilijisi njiisyo zikonzya kugwasya baabo balanganya bacembeede mubuyumuyumu mbobakonzya kujana zimwi ziindi.

•   Lemeka bazyali bako.

   Ncolyaamba Bbaibbele: “Lemeka bauso abanyoko.”—Kulonga 20:12.

   Ino mbuti njiisyo eeyi mboikonzya kubelesyegwa?: Amubatondezye kuti mulabalemeka bazyali banu kwiinda mukubazumizya kuba alwaanguluko. Kuti kacikonzyeka, abalisalile mbobayanda kulanganizyigwa. Aciindi ncomunya, amubalemeke kwiinda mukucita ncomukonzya kutegwa mubagwasye.

•   Amube bantu bamvwisya alimwi balekelela.

   Ncolyaamba Bbaibbele: “Bupampu bwamuntu bulamulesya kufwambaana kunyema, alimwi cilamubotela kujatila milandu.”—Tusimpi 19:11.

   Ino mbuti njiisyo eeyi mboikonzya kubelesyegwa?: Ikuti muzyali uucembeede waamba cintu citali kabotu naa watondezya kutalumba kweelana ambomumulanganya, amulibuzye kuti, ‘Ino inga ndalimvwa buti ikuti ndalijana mubukkale bwabo?’ Ikuti mwasolekesya kubamvwisya alimwi akubalekelela, mulakonzya kupa kuti bukkale butaindili kubija.

•   Amubuzye-buzye kuli bamwi.

   Ncolyaamba Bbaibbele: “Makanze alanyongana ikuti kakunyina kubandika, pele ikuti kakuli basikulaya banji kulaba kuzwidilila.”—Tusimpi 15:22.

   Ino mbuti njiisyo eeyi mboikonzya kubelesyegwa?: Amuvwuntauzye kutegwa muzyibe mbomukonzya kubulanganya bulwazi mbobakonzya kuba ambubo bazyali banu. Amusole kuzyiba zintu zyakubusena nkomukkala izikonzya kugwasya kuubya-ubya mukuli wanu akucikonzya kubalanganya kabotu. Amubandike abamwi ibakalanganya kale bazyali bacembeede. Ikuti kamujisi banabokwanu, amube amuswaangano wamukwasyi kutegwa mubandike nzyobayandika, mbomukonzya kubalanganya alimwi akwaabana mukuli.

•   Amulibombye.

   Ncolyaamba Bbaibbele: “Aabo balibombya mbabajisi busongo.”—Tusimpi 11:2.

   Ino mbuti njiisyo eeyi mboikonzya kubelesyegwa?: Amuzyibe zintu nzyomutakonzyi kucita. Mucikozyanyo, nguzu alimwi aciindi ncajisi muntu uuli woonse kuli mpozigolela. Kulezya ooku kulakonzya kujatikizya mbomubacitila zintu bazyali banu. Ikuti mwalimvwa kuminwa amukuli wakulanganya bazyali banu bacembeede, amulombe lugwasyo kuzwa kubanamukwasyi bamwi naa kuli basyaazibwene.

•   Amulilanganye.

   Ncolyaamba Bbaibbele: “Kunyina muntu wakasulide kale mubili wakwe mwini, pele ulausanina akuubamba kabotu.”—Baefeso 5:29.

   Ino mbuti njiisyo eeyi mboikonzya kubelesyegwa?: Nokuba kuti mujisi mukuli wakulanganya bazyali banu, andinywe mweelede kulibikkila maano alimwi akubikkila maano bamukwasyi wanu ikuti kamukwete naa kamukwetwe. Mweelede kulya kabotu. Mweelede kujana ciindi cakulyookezya alimwi akoona. (Mukambausi 4:6) Ikuti kacikonzyeka, mweelede kucincana. Kwiinda mukucita zintu eezyi muyoocikonzya ikulanganya bazyali banu alimwi tamukakatali kapati.

 Bbaibbele talyaambi malailile aagaminide aakuti bazyali bacembeede beelede kulanganizyilwa aŋanda yamwana naa yabo. Mikwasyi iimwi isala kubalanganya bazyali bacembeede kwaciindi cili mbocibede. Nokuba boobo, kuti casyupa balakonzya kubatola kumasena nkobalanganya bacembeede. Banamukwasyi balakonzya kuba amuswaangano kutegwa bamvwane cintu cikonzya kubabelekela kabotu boonse bajatikizyidwe.—Bagalatiya 6:4, 5.