‘Kwaambaula mumyaambo’ caamba kucikonzya kwaambaula mwaambo munzila yamaleele nkobakacita Banakristo bakusaanguna kakunyina kuwiiya. (Milimo 10:46) Ooyo wakali kwaambaula wakali kumvwigwa amuntu uuli woonse wakauzyi mwaambo ooyo. (Milimo 2:​4-8) Kwaambaula mumyaambo cakali cimwi cazipego zyamuuya uusalala Leza nzyaakapede Banakristo bamumwaanda wamyaka wakusaanguna.​—Bahebrayo 2:4; 1 Bakorinto 12:​4, 30.

•  Ino kwaambaula mumyaambo kwakatalikila kuli alimwi ndilili?

•  Ino kwaambaula mumyaambo kwakajisi makanze nzi?

•  Sena kwaambaula mumyaambo kwakeelede kuzumanana?

•  Ino kwaambaula mumyaambo kwakamana lili?

•  Ino mbuti kujatikizya kwaambaula mumyaambo mazuba aano?

•  Ino Banakristo bakasimpe inga bazyibwa buti?

 Maleele aaya aakusaanguna akacitikila mu Jerusalemu mafwumofwumo lya Pobwe Lyaba Juda mu Pentekoste mu 33 C.E. Basikwiiya ba Jesu basika ku 120 bakalibungene antoomwe ciindi ‘boonse nobakazula muuya uusalala alimwi akutalika kwaambaula mumyaambo yiindene-indene.’ (Milimo 1:​15; 2:​1-4) Bantu banji “ibazwa muzisi zyoonse zyaanyika” bakabungana, alimwi “umwi aumwi wabo wakabamvwa kabaambaula mumwaambo wakwe mwini.”​—Milimo 2:​5, 6.

1.   Kutondezya kuti Leza wakali kubagwasya Banakristo. Kaindi, Leza wakali kucita zitondezyo zyamaleele kutondezya kuti wakali kubagwasya bantu bakwe basyomeka mbuli Musa. (Kulonga 4:​1-9, 29-​31; Myeelwe 17:10) Kwaambaula mumyaambo kwakajisi makanze aakozyenye, kutondezya kuti Leza wakali kwiigwasya mbungano mpya ya Bunakristo. Mwaapostolo Paulo wakalemba kuti: “Myaambo taili citondezyo cabasyomi pe, pele ncabaabo batasyomi.”​—1 Bakorinto 14:22.

2.   Kugwasya Banakristo kupa bumboni cakulomya. Aabo bakabamvwa basikwiiya ba Jesu mubuzuba bwa Pentekoste bakaamba kuti: “Toonse twabamvwa kabaambaula mumyaambo yesu kujatikizya milimo mipati ya Leza.” (Milimo 2:​11) Aboobo, makanze amwi aamaleele aaya akali aakugwasya Banakristo “kupa bumboni cakulomya” alimwi ‘akuyiisya bantu bazisi zyoonse kuti babe basikwiiya,’ mbubwenya mbwaakabalailide Jesu. (Milimo 10:42; Matayo 28:19) Bantu babalilwa ku 3,000 ibakalibonena maleele akulimvwida bumboni bwakapegwa bakaba basikwiiya mubuzuba mbubonya oobo.​—Milimo 2:​41.

 Peepe. Zipego zyamuuya uusalala kubikkilizya akwaambaula mumyaambo zyakali buyo zyakaindi kasyoonto. Bbaibbele lyakasinsima kuti: “Ikuti naa kuli zipego zyakusinsima, ziyoomana; ikuti naa kuli kwaambaula mumyaambo, kuyoomana.”​—1 Bakorinto 13:8.

 Zipego zyamuuya uusalala zyakali kupegwa ku Banakristo bamwi baapostolo kabaliko, kanji-kanji baapostolo bakali kubikka maanza abasyominyina. (Milimo 8:​18; 10:44-​46) Kulibonya kuti aabo ibakatambula zipego zyamuuya kuzwa kubaapostolo kunyina nobakapa bambi. (Milimo 8:​5-7, 14-​17) Mucikozyanyo, mubelesi wamfwulumende ulakonzya kupa muntu laisensi yabunamutekenya, pele muntu ooyo kunyina najisi nguzu zyakupa bamwi malaisensi. Mbubwenya buyo, akwalo kwaambaula mumyaambo kwakamana ciindi baapostolo alimwi abaabo mbobakapede cipego nobakafwa.

 Cipego camaleele cakwaambaula mumyaambo cakamana kumamanino aamwaanda wamyaka wakusaanguna C.E. Aboobo mazuba aano kunyina naba omwe uukonzya kulitaminina kwaambaula mumyaambo kubelesya nguzu zya Leza.

 Jesu wakaamba kuti luyando lwakulyaaba ndoluzyibya basikwiiya bakwe. (Johane 13:34, 35) Mbubwenya buyo, awalo mwaapostolo Paulo wakayiisya kuti luyando lwakali kuyoozyibya Banakristo beni-beni. (1 Bakorinto 13:​1, 8) Wakatondezya kuti muuya wa Leza wakali kuyoopa Banakristo bube bwiitwa kuti “mucelo wamuuya,” bube bwakusaanguna nduyando.​—Bagalatiya 5:​22, 23.