Sena Inga Ndajana Majwi Aawuumbulizya mu Bbaibbele?
Bwiinguzi bwamu Bbaibbele
Inzya. (Baroma 15:4) Amulange-lange zikozyanyo zyamu Bbaibbele izyakabawuumbulizya banji ibakali mubukkale bukatazya alimwi ibakajisi penzi lyamumizeezo.
Mucibalo eeci tulalanga-langa makani aatobela
Ciindi camapenzi
Intembauzyo 23:4: “Nokuba kuti ndeenda mukkuti lisiya mbi, kunyina cintu cibi ncondiyoowa, nkaambo yebo ulaandime.”
Bupanduluzi: Ciindi nomupaila kuli Leza akusyoma Jwi lyakwe Bbaibbele kuti limusololele, mulakonzya kuba basicamba ciindi nomuli mumapenzi.
Bafilipi 4:13: “Muzintu zyoonse ndilijisi nguzu kwiinda muli yooyo uundipa nguzu.”
Bupanduluzi: Leza ulakonzya kumupa nguzu nzyomuyandika kutegwa muliyumye mumapenzi aali woonse.
Kufwidwa muyandwa
Mukambausi 9:10: “Nkaambo kunyina mulimo naa kuyeeya noluba luzyibo naa busongo mu Cuumbwe.”
Bupanduluzi: Bafwide kunyina nobapenga, alimwi tabakonzyi kutucisa, nkaambo tabazyi cintu cili coonse.
Milimo 24:15: “Kuyooba bubuke”
Bupanduluzi: Leza ulakonzya kubabusya bayandwa besu bafwide.
Kuciindizya kulipa mulandu
Intembauzyo 86:5: “Nkaambo yebo, O Jehova a uli mubotu alimwi ulilibambilide kulekelela zibi; luyando lutamani ndojisi kulibaabo boonse bakukwiilila ndupati.”
Bupanduluzi: Leza ulabalekelela aabo beempwa ncobeni kuzibi nzyobakacita musyule alimwi ibakanzide kutaziinduluka.
Intembauzyo 103:12: “Mbubonya kumapolelo aazuba mbokuli kulamfwu kapati kuzwa kumabbililo aazuba, akwalo nkwabikkide zinyonyoono zyesu mbokubede kulampa kuzwa kulindiswe.”
Bupanduluzi: Ciindi Leza nalekelela, zibi zyesu ulazibikka kulamfwu kapati munzila njotutakonzyi kuyeeyela. Kunyina natuyeezya nzinzyo cakwiinduluka-induluka kutegwa atusubule.
Kulimvwa bubi
Intembauzyo 31:7: “Nkaambo wakubona kupenga kwangu; waazyiba mapenzi aangu mapati.
Bupanduluzi: Leza ulaabwene mapenzi oonse ngotujisi. Ulamvwisya bwini mbomulimvwa, nokuba kuti bamwi tabamvwisyi.
Intembauzyo 34:18: “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”
Bupanduluzi: Leza usyomezya kumuumbulizya ciindi nomulimvwide bubi. Ulakonzya kumupa nguzu zyakuliyumya kukucisa kwanu.
Kuciswa
Intembauzyo 41:3: “Jehova uyoomulanganya abulo mpacisilwa.”
Bupanduluzi: Leza ulakonzya kumugwasya ciindi nomwaciswa bulwazi bukatazya kwiinda mukumupa luumuno lwamumizeezo, nguzu, kuliyumya alimwi abusongo bwakusala camaano.
Isaya 33:24: “Taakwe muntu naba omwe uukkala munyika uuyakwaamba kuti: “Ndaciswa.”
Bupanduluzi: Leza usyomezya ciindi bantu boonse nobayooba abuumi bubotu.
Kulibilika
Intembauzyo 94:19: “Mizeezo minji iilibilisya neyakandikatazya, yebo wakanduumbulizya akunditontozya.”
Bupanduluzi: Ikuti twalanga kuli Leza ciindi notutyompedwe, ulakonzya kutugwasya kukkazika moyo.
1 Petro 5:7: “Kamuwaala makatazyo aanu oonse kulinguwe, nkaambo ulamubikkila maano.”
Bupanduluzi: Leza ulaabwene mapenzi eesu. Aboobo ututamba kupaila kulinguwe akumwaambila zintu zitulibilisya.
Nkondo
Intembauzyo 46:9: “Ulamanizya nkondo munyika yoonse mboizulwa.”
Bupanduluzi: Ino-ino Bwami bwa Leza buyoogusya nkondo munyika yoonse.
Intembauzyo 37:11, 29: “Pele babombe myoyo bayookona nyika, eelyo bayoobotelwa kapati muluumuno lunji. Balulami bayookona nyika, alimwi bayookkala alinjiyo lyoonse mane kukabe kutamani.”
Bupanduluzi: Bantu bali kabotu bayookkala muluumuno lunji anyika mane kukabe kutamani.
Kulibilika zyakumbele
Jeremiya 29:11: “‘Ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’”
Bupanduluzi: Leza usyomezya bantu bakwe kuti balakonzya kulangila buumi bukkomanisya kumbele.
Ciyubunuzyo 21:4: “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”
Bupanduluzi: Leza usyomezya kuti uyoozigusya zintu zyoonse zibi zitucitikila mazuba aano.
a Jehova ndezina lya Leza limugeme. (Int. 83:18) Amubone cibalo cakuti “Ino Jehova Nguni?”
Andiza Inga Mwaakkomanina Ayaaya
NGAZI YAMULINDIZI
Mbomukonzya Kugwasyigwa Kukubikkila Maano kwa Leza
Magwalo alatugwasya kuyumya lusyomo lwesu muzisyomezyo zya Leza izyakumbele.
MIBUZYO YAMU BBAIBBELE YAINGULWA
Ino Nkookuli Nkondikonzya Kujana Bulangizi?
Bbaibbele lilakonzya kusumpula buumi bwanu lino alimwi akumupa bulangizi bubotu bwakumbele.
TWAAMBO TUMWI
Luumbulizyo Kuli Baabo Bali Mubuumba
Ciindi muyandwa naafwa, inga twalimvwa kuti kunyina uukumvwisya kucisa kwesu. Pele Leza ulatumvwisya alimwi inga watugwasya.
NGAZI YAMULINDIZI
Ciindi Nokwacitika Zintu Zimanina Maano
Cilagwasya kuzumanana kupona nokuba kuti kuli mapenzi.
NJIISYO ZYAMU BBAIBBELE ZIYANDIKA
Nkaambo Nzi Leza Ncalekelede Kupenga?
Bbaibbele lilapa bwiinguzi bukkazika moyo alimwi buumbulizya.
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.