Ino Mariya Magadalene wakali ni?
Bwiinguzi Bwamu Bbaibbele
Mariya Magadalene wakali sikutobela uusyomeka wa Jesu Kristo. Izina lyakwe lyakuti Magadalene, kweelede kuti lyaamba dolopo lya Magdala (nkokuti Magadan), lyalo lyakali munsi-munsi aa Lwizi lwa Galilaya. Kweelede kuti ambweni aciindi cimwi Mariya wakakkala kubusena oobu.
Mariya Magadalene wakali akati kabamakaintu banji ibakeenda a Jesu antoomwe abasikwiiya bakwe alimwi akubapa ziyandika zyakumubili. (Luka 8:1-3) Wakalibonena kujaigwa kwa Jesu, alimwi wakali akati kabantu bakasaanguna kumubona naakabusyigwa.—Marko 15:40; Johane 20:11-18.
Sena Mariya Magadalene wakali muvwuule?
Bbaibbele kunyina nolyaamba kuti Mariya Magadalene wakali muvwuule. Ncolyaamba buyo kujatikizya nguwe ncakuti, Jesu wakagwisya madaimona aali ciloba mulinguwe.—Luka 8:2.
Ino nkaambo nzi bantu banji ncobasyoma kuti wakali muvwuule katanaba sikwiiya wa Jesu? Nokwakainda myaanda yamyaka kuzwa ciindi naakafwa Mariya Magadalene, bamwi bakaamba kuti wakali ngomukaintu uutaambidwe zina (ambweni muvwuule) walo wakasanzya maulu aa Jesu amisozi yakwe alimwi akwaapukuta amasusu aakwe. (Luka 7:36-38) Nokuba boobo, nzyobasyoma taziyeeme mu Magwalo.
Sena Mariya Magadalene wakali “mwaapostolo kubaapostolo”?
Peepe. Bacikombelo Cakatolika baita Mariya kuti “Mariya Magadalene Musaante” alimwi akuti “mwaapostolo kubaapostolo” akaambo kakuti wakali umwi wabantu bakusaanguna kuleta makani aakubusyigwa kwa Jesu kubaapostolo. (Johane 20:18) Pele eeci tiicakamupa kuba mwaapostolo. Alimwi buya Bbaibbele talyaambi kuti wakali mwaapostolo.—Luka 6:12-16.
Bbaibbele lyakalimanide kale kulembwa aafwaafwi akumamanino kwamwaanda wamyaka wakusaanguna C.E. Nokuba boobo, mumwaanda wamyaka wacisambomwe ndendilyo beendelezi bacikombelo eeci nobakayeeya kusumpula Mariya Magadalene akumulemeka kapati. Kuli malembe aakalembwa mumyaka yakuma 100-300 alo atondezya kuti basikwiiya ba Jesu bakali kumufwida munyono Mariya Magadalene. Pele malembe aaya taako mu Bbaibbele.
Sena Mariya Magadalene wakali mukaintu wa Jesu Kristo?
Peepe. Mubwini, Bbaibbele lilacisalazya kuti Jesu kunyina naakakwata. a
a Amubone cibalo cakuti “Sena Jesu Wakalikwete? Sena Jesu wakalijisi Banabokwabo?”
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Ino Ncinzi Ncotukonzya Kwiiya ku Bamakaintu Baambidwe mu Bbaibbele?
Amubone kwiindana kuliko akati kabamakaintu bamwi bajisi zikozyanyo zibotu baambidwe mu Bbaibbele alimwi abamwi bajisi zikozyanyo zibi.
AMWIIYE LUSYOMO LWABO
Mariya Magadalene—“Ndamubona Mwami!”
Mariya, imukaintu uusyomeka wakali akati kabasikwiiya ba Jesu ibakasaanguna kumubona Jesu wakabusyigwa, mpoonya lino wakapegwa mulimo wakwaambila bamwi makani aaya mabotu.
MIBUZYO YAMU BBAIBBELE YAINGULWA
Sena Jesu Wakalikwete? Sena Jesu Wakalijisi Banabokwabo?
Mbwaanga Bbaibbele talyaambi cacigaminina kuti Jesu wakalikwete naa pe, mbuti mbotukonzya kuzyiba kuti wakalikwete naa pe?
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.