Inzya. Jesu wakali kupandulula kuti basikumutobela balakonzya kusilikwa naakaamba kuti “bantu bataciswi tabayandiki musilisi, ccita baciswa.” (Matayo 9:12) Nokuba kuti Bbaibbele talili bbuku lyaamba zyabusilisi, lilaamba njiisyo zikonzya kubagwasya aabo bayanda kukkomanisya Leza.

Mibuzyo njomweelede kulibuzya

 1. Sena ndilabumvwisya busilisi mbondaambilwa? Bbaibbele lyaamba kuti tweelede kujana makani aasyomeka muciindi ‘cakusyoma makani oonse.’​—Tusimpi 14:15.

 2. Sena ndeelede kubuzya basilisi bambi kujatikizya busilisi mbondaambilwa? “Basinkuta banji” balakonzya kugwasya kwaambisya kuti kamucisidwe kapati.​—Tusimpi 15:22.

 3. Sena busilisi bulabikkilizya akutyola mulawo wamu Bbaibbele ‘wakulikasya kubulowa’?​—Milimo 15:20.

 4. Sena busilisi bulabikkilizya akusyoma mizimo? Bbaibbele lilakasya “kusyoma mizimo.” (Bagalatiya 5:​19-21) Kutegwa muzyibe naa kusyoma mizimo kulijatikizyidwe, amulange-lange mibuzyo eeyi:

•   Sena musilisi ooyo ulaisyoma mizimo?

•   Sena busilisi buyeeme akusyoma kuti bulwazi bwakaboola akaambo kakuti twabanyemya baleza naa akaambo kakuti kuli batulowa?

•   Sena kulapegwa zituuzyo, kulaambwa majwi aakweema, naa kucita zyintu zimwi zijatikizya mizimo nokubambwa musamu naa noubelesyegwa?

 5. Sena ndilalibilika kapati kujatikizya makani aanseba? Bbaibbele lilapa lulayo noliti: “Kunyoneka kwanu akuzyibwe abantu boonse.” (Bafilipi 4:5) Kunyoneka kuyoomugwasya kubikkila maano ‘kuzyintu ziyandika kapati,’ mbuli zyintu zyakumuuya.​—Bafilipi 1:10; Matayo 5:3.