Inzya, ulacita oobo ikuti bantu bacinca bukkale bwabo. Mucikozyanyo, Leza naakatuma mulumbe walubeta kubana Israyeli, wakaamba kuti: “Ndiza bayooswiilila akujokoloka, umwi aumwi kuzwa kunzila yakwe mbyaabi, eelyo ndiyoocinca mizeezo kujatikizya mapenzi ngondikanzide kubaletela akaambo kamicito yabo mibyaabi.”​—Jeremiya 26:3.

 Muma Bbaibbele manji, kapango aaka kalembedwe kuti Leza “uyakweempwa” kujatikizya kunyonyoona nkwaakali kuyanda kucita, calo icitondezya mbuli kuti wakalilubizyide. Pele ibbala lini lya Chihebrayo lilakonzya kwaamba “kucinca mizeezo naa makanze.” Sikwiiya Bbaibbele umwi wakalemba kuti: “Muntu acinca bukkale cipa kuti awalo Leza acince lubeta.”

 Nokuba boobo, tacaambi kuti mbwaanga Leza ulakonzya kucinca mizeezo nkokuti weelede kucinca. Amulange-lange ziindi zimwi Bbaibbele mpolyaamba kuti Leza tanaakacinca mizeezo yakwe:

•   Leza tanaakazumizya Balaki kuti amucince mizeezo kutegwa akasinganye cisi ca Israyeli.​—Myeelwe 23:18-​20.

•   Mwami Saulo wa Israyeli naakakakatila kucita bubi, Leza tanaakacinca mizeezo yakwe yakumukaka kuba mwami.​—1 Samuele 15:28, 29.

•   Leza uyoozuzikizya cisyomezyo cakwe cakuti Mwanaakwe akabe mupaizi lyoonse mane kukabe kutamani. Leza takacinci mizeezo yakwe pe.​—Intembauzyo 110:4.

 Inzya lilaamba. Mu Bbaibbele kulembedwe kuti Leza wakaamba kuti: “Ndime Jehova; tandicinci pe.” (Malaki 3:6) Mbubwenya buyo, Bbaibbele lyaamba kuti Leza “tasanduki naa kucinca mbuli zimvwule zicinca-cinca.” (Jakobo 1:​17) Nokuba boobo, eeci tacikazyi ncolyaamba Bbaibbele kuti Leza ulacinca mizeezo yakwe. Leza tacinci mukuti bube bwakwe azyeelelo zyakwe zyaluyando alimwi abululami tazicinci. (Deuteronomo 32:4; 1 Johane 4:8) Nokuba boobo, ulakonzya kupa malailile aaindene-indene kubantu aziindi ziindene-indene. Mucikozyanyo, Leza wakapa malailile aaindene ku Mwami Davida kujatikizya mbwaakeelede kulwana nkondo zyobilo ziccililene, nokuba boobo nzila zyoonse zyobilo zyakabeleka.​—2 Samuele 5:​18-​25.

 Peepe, nokuba boobo ulausa akaambo kakuti bantu banji tabamubikkili maano naa balamukaka. Ikujatikizya bukkale mbobwakabede kalitanacitika Zambangulwe yanyika yoonse yamuciindi ca Nowa, Bbaibbele lyaamba kuti: “Jehova wakausa kuti wakalenga bantu anyika alimwi wakapenga mumoyo.” (Matalikilo 6:6) Mukapango aaka, bbala lyakuti “wakausa” lizwa kubbala lya Chihebrayo likonzya kwaamba “kucinca mizeezo.” Leza wakacinca mizeezo yakwe kujatikizya bantu banji bakali kupona kalitanacitika Zambangulwe akaambo kakuti bakazikubija. (Matalikilo 6:​5, 11) Nokuba kuti wakabijilwa kuti bakasala kutobela nzila mbyaabi, tanaakacinca mbwaakali kubabona bantu boonse. Mane buya, wakabafwutula bantu kwiinda muli Nowa amukwasyi wakwe ciindi ca Zambangulwe.​—Matalikilo 8:​21; 2 Petro 2:​5, 9.