Peepe. Bbaibbele lilasalazya kwaamba kuti Leza wakalenga bantu, kubikkilizya “amisyobo” yoonse yabanyama azisyango. a (Matalikilo 1:12, 21, 25, 27; Ciyubunuzyo 4:11) Lyaamba kuti bantu boonse bakazwa kubazyali besu bakusaanguna, ba Adamu a Eva. (Matalikilo 3:20; 4:1) Bbaibbele talizuminani amakani aakuti zintu zyakasanduka buya kutegwa kube misyobo iindene-indene yazintu zipona. Pele talibakazyi basayaansi ibaamba kuti kuli misyobo iindene-indene yacintu comwe.

•  Sena zintu zyakasanduka buya?

•  Sena njiisyo yakusanduka ileendelana ancolyaamba Bbaibbele?

•  Sena ciindi zisyango naa zinyama nozicinca kweelana abusena, citondezya kuti zyakasanduka buya?

 Bantu ibasyoma kuti zintu zyakasanduka buya baamba makani aayindene-indene kujatikizya Leza mbwaakacita oobo. Bbuku lya Encyclopædia Britannica lyaamba kuti, bantu ibasyoma boobo, baamba kuti nzila yiitwa kuti “natural selection njenzila imwi Leza njabelesya kutegwa zintu zili munyika zisanduke.”

 Bantu ibasyoma mukusanduka alimwi baamba kuti:

•   Zintu zyoonse zipona zyakazwa kuzintu zimwi zyakaliko kaindi.

•   Musyobo wacintu cimwi cipona ulakonzya kusanduka kuba musyobo umwi wiindene kapati.

•   Munzila imwi Leza nguupa kuti zintu eezyi kazicitika.

 Bantu ibasyoma njiisyo yakusanduka baamba kuti cibalo camu Bbaibbele icaamba zyakulenga icili ku Matalikilo tacaambi twaambo toonse. Nokuba boobo, Jesu wakaamba makani aali ku Matalikilo kuti makani aakaindi aamasimpe. (Matalikilo 1:26, 27; 2:18-24; Matayo 19:4-6) Bbaibbele lyaamba kuti Jesu katanaboola anyika, wakali kukkala kujulu a Leza alimwi wakatola lubazu kugwasyilizya Leza kuti “zintu zyoonse” zibeko. (Johane 1:3) Aboobo, muzeezo wakuti Leza wakabelesya kusanduka kwazintu kutegwa kube misyobo iindene-indene yazintu zipona taweendelani ancolyaamba Bbaibbele.

 Bbaibbele kunyina nolipandulula kujatikizya misyobo yoonse iikonzya kuba mumusyobo umwi wacintu cipona. Alimwi talikakazyi kaambo kamasimpe kakuti misyobo yabanyama baindene-indene alimwi azisyango izyakalengwa a Leza zilakonzya kwiindana-indana nozizyalana naa noziba mubusena bupya. Nokuba kuti bamwi babona kucinca-cinca ooko kuti nkusanduka, kunyina musyobo mupya uupangwa.