Bantu banji basyabene balakkala antoomwe kabatanakwatana mumulawo. Bamwi balacita oobo nkaambo bayanda kusola naa inga beendelana alimwi bayeeya kuti, ikuti bakkala antoomwe lino cikwati cabo ciyoozwidilila baakukwatana mumulawo. Sena kukkala antoomwe kamutanakwatana cili buyo kabotu?

Mucibalo eeci, tulalanga-langa makani aatobela:

•  Ino Bbaibbele lyaamba nzi?

•  Sena kukkala antoomwe kulakonzya kumugwasya kulibambila cikwati?

•  Sena kukkala antoomwe kumugwasya kuyobola mali?

•  Sena kukkala antoomwe kulakonzya kumugwasya kusala kabotu muntu wakukwatana limwi?

•  Sena kuli nzila iimbi mbotu?

•   Bbaibbele talizumizyi koonana kwabantu batakwetene. Mucikozyanyo, lyaamba kuti: ‘Amulilesye kubwaamu.’ (1 Batesalonika 4:3; 1 Bakorinto 6:18) Eeci cilabikkilizya akoonana kwabantu bakkala antoomwe batakwetene mumulawo, nokuba kuti bajisi makanze aakuyookwatana kumbele. a Zyeelelo zyamu Bbaibbele zilabakwabilila bantu basyabene kutaba amada aamusyokwe alimwi akumapenzi aaboola akaambo kakukkala amuntu ngomutakwetene limwi.

•   Leza ngowakatalisya bubambe bwacikwati. Ciindi naakabutalisya bubambe oobu, wakaamba kuti: “Mwaalumi uyoosiya bausyi abanyina akukakatila kumukaintu wakwe, alimwi bayooba mubili omwe.” (Matalikilo 2:24) Ciindi mwaalumi amukaintu nobakwatana mumulawo, kulangilwa kuti mukwasyi wabo unookkomene.

 Bamwi inga baamba kuti inzya. Balimvwa kuti bantu bobilo balakonzya kuzyibana kabotu ikuti kabacitila antoomwe milimo yaaŋanda alimwi akubona aumwi mbwacita zintu. Nokuba boobo, cintu ciyandika kapati kutegwa cikwati cizwidilile nkulyaaba cakumaninina.

 Mbuti banabukwetene mbobakonzya kukakatila kuli umwi amweenzyinyina muziindi zibotu naa zibi? Ikutali kwiinda mukukkala antoomwe kabatanakwatana pele nkwiinda mukulyaaba cakumaninina kuli umwi amweenzinyina alimwi akubelekela antoomwe kubamba twaambo.

 Masimpe ngakuti: Muciindi cakulibambila cikwati, bantu basyabene ibasala kukkala antoomwe kabatakwetene inga balibambila kwaandaana.

 Njiisyo yamu Bbaibbele: “Kufwumbwa cintu muntu ncasyanga, ncencico eeco ncayootebula.”​—Bagalatiya 6:7.

 Bamwi baamba kuti inzya. Mubuvwuntauzi bwakacitwa aba Pew Research Center bakajana kuti ku United States, akati kabantu bali 10 bapati, bali 4 ibakatalika kukkala antoomwe kabatanakwatana bakacita oobo akaambo kakuyanda kuyobola mali. Nokuba boobo, nobakakkala antoomwe kwaciindi cili mbocibede, bantu banji ibakavwuntauzyigwa bakaamba kuti tiibakalibambilide kukwatana akaambo kakuti tiibakajisi mali.

 Kukkala antoomwe kamutanakwatana kulijisi amapenzi amwi, kwaambisya kubamakaintu. Mucikozyanyo, mwaandaana, kanji-kanji bamakaintu mbabalaakuba amukuli wakukomezya bana.

 Masimpe ngakuti: Kukkala antoomwe kamutanakwatana mumulawo kuleta mapenzi manji kapati kwiinda bubotu mbomuyeeyela.

 Njiisyo yamu Bbaibbele: “Mebo, nde Jehova ndime Leza wako, ndime ndikuyiisya kuti ugwasyigwe.”​—Isaya 48:17.

 Bamwi baamba kuti inzya. Nokuba boobo, bbuku litegwa Fighting for Your Marriage lyaamba kuti, “bantu bakkala antoomwe kabatanakwatana kanji-kanji tabayeeyi kuti kuzumanana kukkala antoomwe inga cabakatazya kumana cisyabo.” Nkaambo nzi? Bantu bamwi ibakkala antoomwe balakonzya kuzyiba kuti tabeendelani naaceya. Pele akaambo kakuti balangila mwana, kulanganya civwubwa alimwi akubbadela leenti antoomwe, basikuvwuntauzya baamba kuti, bakkala buyo antoomwe akaambo kakuti bakazyibila alimwi akuti tabakonzyi kucinca. Bbuku litegwa Fighting for Your Marriage lilazumanana kwaamba kuti, “bantu ibeelede kumana cisyabo inga basala buyo kukwatana nkaambo babona kuti ncuuba-uba kuzumanana kukkala antoomwe.”

 Masimpe ngakuti: Muciindi cakumugwasya kusala kabotu, kukkala antoomwe amuntu ngomutakwetene limwi kulakonzya kupa kuti cimukatazye kumana cisyabo citali kabotu.

 Njiisyo yamu Bbaibbele: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”​—Tusimpi 22:3.

 Mulakonzya kwaayeleba mapenzi aaboola akaambo kakukkala antoomwe kamutanakwatana akupa kuti mujane cikwati ciyoozwidilila. Munzila nzi? Kwiinda mukutobela zyeelelo zyamu Bbaibbele zijatikizya cikwati. Amube aciindi cinji cakuzyibana amuntu ngomuyanda kukwatana limwi kamutanatalika kukkala antoomwe mbuli banabukwetene. Cilainda kubota kusala muntu wakukwatana limwi akaambo kakuti muleendelana muzintu zinji alimwi akuti musyoma zintu zyomwe ikutali buyo akaambo kakubota ciwa.

 Bbaibbele lijisi lulayo lukonzya kumugwasya kuba acikwati cili kabotu alimwi citazungaani. b Mucikozyanyo, Bbaibbele lilijisi njiisyo zikonzya kumugwasya . . .

•   kweeleba kutasyomeka

•   kuba abube buyoopa kuti mube muntu uuli kabotu wakukwatana limwi

•   kubona zitondezyo zikonzya kumugwasya kuzyiba kuti tamweelede kumukwata muntu ooyo

 Kutegwa mwiiye zinji kujatikizya twaambo ootu, amubone cibeela cakuti “Cikwati Alimwi Amukwasyi” a jw.org.

 Njiisyo yamu Bbaibbele: “Magwalo oonse akasololelwa a Leza alimwi alagwasya mukuyiisya.”​—2 Timoteyo 3:16.