Ikuti mwanaanu kaile kukkede buyo aŋanda akubula cakucita ulakonzya kulendelelwa. Lino kamutanamupa muzeezo wakuti akeebelele buyo TV naa kuuma vidiyo geemu njayandisya, ntootu twaambo tusyoonto ntomweelede kuyeeya.

•   Kuvwula kwaciindi amusyobo wazyakulikondelezya kulakonzya kuyungizya penzi. Muzyali wazina lya Robert wakaamba kuti: “Bana bamwi babona buumi bwabuzuba abuzuba kuti bulalendelezya babweezyanisya akweebelela TV naa kuuma mavidiyo geemu.”

   Bakaintu babo ba Barbara abalo balazuminizya. Bakaamba kuti: “Zintu zicitwa abuzuba ziyanda kuyeeya akubeleka canguzu, alimwi citola ciindi kutegwa nzyomwacita zilibonye. Eeci cibapa kulendelelwa bana ibatola ciindi cinji kweebelela TV naa kuuma mavidiyo geemu.”

•   Kutola ciindi cinji a social media kulakonzya kumupa kulimvwa bubi. Kulanga zintu zibotu nzyobacita balongwe kulakonzya kupa mukubusi kulimvwa mbuli kuti buumi bwakwe bulalendelezya. Musimbi wazina lya Beth wakati, “Ncuuba-uba kuyeeya kuti, ‘bantu boonse bali mukulikkomanisya, pele mebo ndili buyo aŋanda.’”

   Kuyungizya waawo, mawoola manji ngakonzya kubelesya muntu a social media taakonzyi kumupa kuleka kulimvwa kulendelelwa. Mukubusi musankwa wazina lya Chris wakati, “Nokuba kuti inga kojisi bubi, pele kulendelelwa takukonzyi kumana.”

•   Kulendelelwa kulakonzya kumupa coolwe cakucita zintu zimwi. Muzyali wazina lya Katherine wakaamba kuti, kulendelelwa kulakonzya kumupa coolwe mwana cakubelesya maano aakwe. Mucikozyanyo, wakati: “Mwana ulakonzya kukkala mubbokesi akweezyeezya kuti uli mumoota, mubwato, naa mundeke. Alimwi ulakonzya kupanga kaanda kwiinda mukubikka payi atala aazyuuno.”

   Nkakaambo kaako, syaazibwene umwi wazina lya Sherry Turkle ncaakapandulula kulendelelwa kuti “nciindi cakubelesya maano.” a Aboobo, munzila imwi, kulendelelwa zimwi ziindi takuli kubi. Alimwi buya, bbuku lyakuti Disconnected lyakaamba boobu: “Kunyamuna zibulo kulaigwasya milambi kuti iyume. Munzila njiyonya, kulendelelwa kupa muntu kwaabelesya kapati maano aakwe.”

 Masimpe ngakuti: Tamweelede kubona kulendelelwa kwabana banu kuti ndipenzi pele mweelede kubona kuti ncoolwe cakubagwasya kubelesya maano.

•   Ikuti bukkale kabuzumizya, amubazumizye kusobanina anze. Ba Barbara, ibaambwa kale, bakati: “Cilagambya kawo kaunga kabotu amumuni wazuba mbozikonzya kumana kulendelelwa. Kuzwa ciindi bana besu nobakatalika kusobanina anze, mizeezo yabo yakajaluka!”

   Njiisyo yamu Bbaibbele: “Zintu zyoonse zilijisi ciindi canzizyo, . . . ciindi cakuseka aciindi cakujintauka.”—Mukambausi 3:1, 4, bupanduluzi buyungizyidwe.

   Ncomweelede kuyeeya: Ino nzyoolwe nzi nzyondikonzya kubelesya kunoogwasya bana bangu kusobanina anze bunji bwaziindi? Ikuti tacikonzyeki kusobanina anze, ino nzisobano nzi zibotu nzyobakonzya kucitila muŋanda?

•   Amubagwasye bana banu kuyeeya kujatikizya bantu bamwi. Muzyali wazina lya Lillian wakapa bana muzeezo wakuti: “Mweelede kugwasya balongwe banu bacembeede kusalazya alubuwa naa kubajikila cakulya alimwi akubaswaya. Kugwasya bamwi kuletela lukkomano lwini-lwini.”

   Njiisyo yamu Bbaibbele: “Mwaabi uyoozwidilila, alimwi kufwumbwa uukatalusya bamwi alakwe uyookatalusyigwa.”—Tusimpi 11:25.

   Ncomweelede Kuyeeya: Mbuti mbomukonzya kugwasya bana banu kuba alukkomano luboola akaambo kakugwasya bamwi?

•   Mweelede kuba cikozyanyo cibotu. Nzyomwaamba kujatikizya milimo yanu yabuzuba abuzuba zilakonzya kubajatikizya bana banu. Muzyali wazina lya Sarah wakati: “Ikuti nzyotwaamba zipa muzeezo wakuti buumi bwesu tabukkomanisyi, tupa bana besu kulimvwa kulendelelwa. Pele kuti katwaamba munzila iitondezya kuti tulaikkomanina milimo yesu, tubagwasya kulimvwa mbuli ndiswe.”

   Njiisyo yamu Bbaibbele: “Ooyo uulaamoyo uukkomene ulaapobwe ciindi coonse.”—Tusimpi 15:15.

   Ncomweelede kuyeeya: Ino ndilaakwaamba nzi kubana bangu kujatikizya milimo yangu yabuzuba abuzuba? Ino ncikozyanyo nzi ncondibapa kwiinda muzintu nzyondilaakucita ikuti ndalendelelwa?

 Muzeezo: Amubagwasye bana banu kulemba mulongo wazintu nzyobakonzya kucita. Muzyali wazina lya Allison wakati, “tulijisi kabbokesi kamukwasyi nkotuyobweda mizeezo njobalemba apepa boonse mumukwasyi.”