Kwiindana kwazintu aumwi nzyayanda, zilengwa alimwi abube, kulakonzya kuleta buyumuyumu kuli banabukwetene. Pele twaambo tumwi mbuli tootu tutobela atwalo tulakonzya kuleta mazwanga:

•   Ciindi ncomweelede kuba abacibbululu

•   Mbomweelede kwaabelesya mali

•   Makani aakuba abana naa pe

 Ino ncinzi ncomweelede kucita ciindi nokwaba kwiimpana kwamizeezo mumakani aaya?

•  Ncomweelede kuzyiba

•  Ncomweelede kucita

 Kweendelana tacaambi kukozyanya. Nobaba banabukwetene ibeendelana kapati, talili lyoonse nobakonzya kuba amizeezo iikozyenye, nomuba mutwaambo tuyandika kapati.

 “Ndakakomenena mumukwasyi mobacitila antoomwe zintu. Mumawikkeendi, twakali kujana ciindi cakuba abamakaapa, banabokwabo abataata, banabokwabo abamaama, banabokwesu alimwi abeenima. Pele kumukwasyi wabalumi bangu tiibakali kuvwula kucita boobo. Aboobo tujisi mizeezo iindene caboola kuciindi ncotweelede kuba abacibbululu naa kubandika abaabo bali kulamfwu.”—Ba Tamara.

 “Akaambo kambotwakakomezyegwa, mebo abakaintu bangu tuliindene kujatikizya mbotweelede kwaabelesya mali. Myezi misyoonto kuzwa notwakakwatana, twakali kuzwangana kujatikizya mbotwakeelede kwaabelesya mali. Aboobo penzi eeli tiilyakamana notwakaabandika makani aaya ciindi cakusaanguna nociba ciindi cabili.”—Ba Tyler.

 Mapenzi amwi taakonzyi kumana kwiinda mukuzumina buyo kutegwa umwi akkomane. Mucikozyanyo mbuti kuti wacibbululu wamulumi naa wamukaintu waciswa aboobo uyandika kulanganizyigwa? Naa umwi wabanabukwetene kayanda kuba abana mpoonya umwi katayandi? a

 “Mebo abakaintu bangu tulaakwaabandika kapati makani aakuba abana. Makani aaya balo taazwi kumoyo, lino mizeezo yesu iliindene kapati. Tandisyomi kuti tuyakweendelana.”—Ba Alex.

 Kwiimpana kwamizeezo takweelede kunyonganya cikwati canu. Basyaazibwene bamwi baamba kuti, ikuti naa tiimwazuminana angomukwetene limwi mukaambo kamwi kayandika kapati, mweelede kucita kufwumbwa ncomukonzya kutegwa muzeezo wanu uzwidilile, tacikwe makani naa kucita boobo inga kwapa kuti cikwati cimane. Pele kubelesya nzila eeyo kutondezya kuti mubikkila buyo maano mbomulimvwa ikutali cikonke ncomwakapanga kuli Leza cakukakatila kuli ngomukwetene limwi ziyume zitete.

 Amube amakanze aakuzuzikizya cikonke canu cacikwati. Kuti kamujisi makanze aayo, munoobelekela antoomwe kulwana mapenzi.

 Njiisyo yamu Bbaibbele: “Aabo Leza mbaaswaanganya kutabi muntu uubaandaanya.”—Matayo 19:6.

 Amukkale aansi mubone ziyandika. Mucikozyanyo, atwaambe kuti umwi akati kabanabukwetene ulayanda kuba abana mpoonya uumbi katayandi. Kuli twaambo tweelede kulangwa-langwa kubikkilizya atootu:

•   Mbocili ciyumu cikwati canu.

   Sena mulilibambilide kuliyumya akumapenzi aaboola mukukomezya mwana?

•   Mukuli wakuba muzyali.

   Nzinji zijatikizyidwe mukuba muzyali kunze lyakujana buyo zyakulya, zisani alimwi akwakukkala.

•   Mali.

   Sena inga mwacikonzya kujana ciindi cakumulimo, cakulanganya mukwasyi alimwi amikuli iimbi?

 Njiisyo yamu Bbaibbele: “Nguni akati kanu uuyanda kuyaka ngazi uutasaanguni kukkala ansi akubona mali aayandika?”—Luka 14:28.

 Amutulange-lange twaambo toonse tujatikizyidwe. Mulakonzya kukumana kwiimpana kwamizeezo mumapenzi amwi ngomujisi. Mucikozyanyo, kuti penzi ndyakuyanda kuba abana naa pe, ooyo uutayandi kuba abana weelede kulibuzya kuti:

•   ‘Sena nondaamba kuti tandiyandi kuba abana, ndaamba kuti kukabe kutamani naa nkwaciindi buyo cili mbocibede?’

•   ‘Sena icindipa kuwayawaya nkaambo kakuti ambweni inga ndaalilwa kuba muzyali uuli kabotu?’

•   ‘Sena ndilibilika kuti ngondikwetene limwi uyooleka kundibikkila maano?’

 Kulubazu lumwi, ooyo uuyanda kuba abana weelede kulibuzya kuti:

•   ‘Sena tulilibambilide kunyamuna mukuli wabuzyali?’

•   ‘Sena tulijisi mali aayandika mukukomezya mwana?’

 Njiisyo yamu Bbaibbele: “Busongo buzwa kujulu . . . bulanyoneka.”—Jakobo 3:17.

 Amubone bubotu buliko mumuzeezo ngwajisi ngomukwetene limwi. Bantu bobilo balakonzya kulanga acintu cimwi pele kabaindene mbobalimvwa kujatikizya cintu eeco. Mbubwenya buyo, banabukwetene balakonzya kukalanga kaambo pele kabaindene mbobakabona, mucikozyanyo, mbobeelede kwaabelesya mali. Kutegwa mubandike kaambo nkomwiindene mizeezo, amusaangune kubandika nzyomuzuminana.

•   Ino nimbaakani nzi nzyomuzuminana?

•   Ino mbubotu nzi buliko mumuzeezo umwi aumwi ngwajisi?

•   Kutegwa cikwati canu ciyume, sena taakwe uukonzya kujokoloka kutegwa muzeezo waumwi uzwidilile nguwo?

 Njiisyo yamu Bbaibbele: “Umwi aumwi kayandisya kugwasya bamwi ikutali buyo kuligwasya lwakwe mwini.”—1 Bakorinto 10:24.