“Zisobano zipa kuyeeya” nzisobano zibotu kapati zyalo izipa mwana kuyanda kuzyiba zinji alimwi akweezyeezya zintu, eeci cipa kuti akomene kabotu akucizyiba kubelesya maanza aakwe kucita zintu.

 Zisobano eezyi zibikkilizya:

•   Kudulowa

•   Kujikilila

•   Kusobanya zidooli

•   Kwiimba

•   Kuyaka twaanda

•   Kubelesya zintu ziindene-indene kusobana, mucikozyanyo kubumba-bumba.

 Mumasi manji, bana beebelela buyo zisobano izyaa TV muciindi cakucita zisobano zipa kuyeeya.

 Sena mweelede kulibilika?

•   Ncomweelede kuzyiba

•   Ncomweelede kucita

•   Zisobano zipa kuyeeya zilakonzya kupa bana kukomena kabotu. Zilakonzya kupa kuti bakomene kabotu kumubili amumizeezo, kucikonzya kubelesya maano aabo, alimwi akumvwana abantu bamwi. Kuyungizya waawo, zilakonzya kuyiisya bana kukkazika moyo, kusala kabotu zintu zyakucita, kulijata, alimwi akuyanzana kabotu abeenzinyina ciindi nobasobana antoomwe. Mubufwaafwi, zisobano zipa kuyeeya zilakonzya kubagwasya bana kulibambila buumi bwabo bwakumbele.

•   Kutola ciindi cilamfwu kweebelela TV naa kubelesya kkompyuta kulakonzya kuleta ntenda. Kutola ciindi cinji kapati kweebelela TV naa kubelesya kkompyuta inga caile kuba cilengwa, alimwi kwakajanwa kuti cileta penzi kubana yakuba bakali akubapa kuba abulwazi bwakuneneesya. Eeyi nincenjezyo kubazyali ibalekela bana babo kweebelela TV naa kubelesya kkompyuta kwaciindi cilamfwu.

•   Kubabikkila ciindi cakucita zisobano takugwasyi. Ikuti bazyali kababambila bana zisobano zinji akubabikkila ciindi cakuzicita, bana tabanakubi aciindi cakucita zintu zikonzya kubakulwaizya kuyanda kuzyiba zinji alimwi akubelesya maano aabo.

•   Amubape coolwe cakusobana zisobano zipa kuyeeya. Ikuti bukkale kabuzumizya, amupe bana banu coolwe cakusobanina anze kutegwa babone zilenge. Amubazumizye kucita zintu nzyobayandisya kapati alimwi akusobanya zidooli zipa kuyeeya akubelesya maano. a

   Ncomweelede kuyeeya: Ino zisobano zipa kuyeeya inga zyamugwasya buti mwanaangu kuba abube bubotu aluzyibo, alimwi mbuti mbwayoogwasyigwa kumbele mubuumi bwakwe?

   Njiisyo yamu Bbaibbele: “Zisobano ziyumya mubili.”—1 Timoteyo 4:8, bupanduluzi buyungizyidwe.

•   Amucesye ciindi ncobabelesya kweebelela. Amusaangune kuyeeyesya kamutanamupa fooni, tabbuleti, naa kumuzumizya kweebelela TV mwanaanu. Bamadokota balanganya bana bakulwaizya kuti bana batanakkwanya myaka yobilo tabeelede kweebelela TV naa kubelesya fooni, mpoonya aabo bajisi myaka yobilo kusika aali yosanwe balakonzya kucita oobo kwaciindi citaindilili awoola lyomwe abuzuba. b

   Ncomweelede kuyeeya: Ino inga ndamubikkila ciindi cinji buti cakweebelela mwanaangu? Sena ndeelede kweebelela antoomwe anguwe? Ino zintu nzi zimwi zyakonzya kusobanya kunze afooni naa TV?

   Njiisyo yamu Bbaibbele: “Amucenjele kapati, mutanikweendi mbuli bafwubafwuba pe, pele mbuli bantu basongo, kamucibelesya kabotu ciindi coonse ncomujisi.”—Baefeso 5:15, 16.

•   Amuyeeye zisobano izyakubikkilwa ciindi mbozikonzya kumujatikizya mwanaanu. Masimpe kuti zilakonzya kumugwasya kuyungizya luzyibo lwakucita cintu cimwi naa cisobano cimwi. Nokuba boobo, bunji bwaziindi zilakonzya kupa mwana antoomwe abazyali bakwe kukopana mumizeezo, mbwaanga mbabeelede kumutola kumasena nkozicitilwa. Amubukkale oobu, njiisyo iili mulugwalo lwa Baefeso 5:15, 16 yakucibelesya kabotu ciindi ilabeleka.

   Ncomweelede kuyeeya: Sena ciindi ncondibabikkilide bana bangu cakucita zisobano cabaminya? Ikuti naa mboobo, nkucinca nzi nkondikonzya kucita?

   Njiisyo yamu Bbaibbele: ‘amusinizye zintu ziyandika kapati.’—Bafilipi 1:10.