SENA CAKALENGWA BUYA?
Kuuluka Kugambya Kwanzinini Iitegwa Fruit Fly
Kufwumbwa muntu iwakasola kale kujaya nzinini ulizyi mbocili ciyumu kucita boobo. Zilakatazya kujaya akaambo kakuti zilacikonzya kutija mukulaba kwaliso.
Basayaansi bakajana kuti nzinini iitegwa fruit fly, ilakonzya kuzinguluka mbubwenya mbuli ndeke zyakunkondo, pele muciindi citasiki kukavwaluvwalu komwe. Ciindi noyazyalwa, syaazibwene Michael Dickinson wakaamba kuti, “inga ilicibwene kale kuuluka. Cili mbuli kubikka mwana iwazwa aakuzyalwa acuuno casikweenzya ndeke yakunkondo alimwi kazyi kale cakucita.”
Basikuvwuntauzya nobakakkopa mboyuuluka nzinini eeyi, bakajana kuti ilavwupaula mababa kwaziindi zili 200 mukavwaluvwalu komwe. Pele ciindi noyavwupula mababa aanjiyo ciindi comwe ilakonzya kulibambila kucinca nkoigama kutegwa itanjili muntenda.
Alimwi mbuti kujatikizya kufwambaana kubweza ntaamu? Basikuvwuntauzya bakajana kuti nzinini eeyi ilakonzya kubweza ntaamu cakufwambaana kapati, iziindi zili 50 kwiinda kulaba kwaliso lyamuntu. Dickinson wakapandulula kuti, “Nzinini ilabalila munzila iigambya, mukaindi kasyoonto kapati, kutegwa izyibe ntenda nkoibede alimwi akuzyiba nkoyeelede kuulukila kutakwe ntenda.
Pele ibongo bwanzinini eeyi busyoonto kapati mbobucikonzya kucita boobo, makani ngobayanda kuzyiba basikuvwuntauzya.
Nzinini eeyi ilatija ntenda kwiinda mukucinca-cinca nkoigama muciindi citasiki kukavwaluvwalu komwe
Ino muyeeya buti? Sena mboicikonzya kuuluka munzila iigambya nzinini eeyi kwakabako kwiinda mukusanduka naa mukulengwa buya?
Andiza Inga Mwaakkomanina Ayaaya
SINSIMUKA!
Mababa Aacengeme Kumpela Aabayuni Baulukisya
Kwiinda mukwiiya mbwaapangidwe mababa aabayuni, basikupanga ndeke bakacaalilwa amungwimba wandeke uusika kumalita aali 7,600 miliyoni mumwaka omwe.
SINSIMUKA!
Maseelo Aagwasyilizya Nsozi Kuzyiba Zintu Izyeenda Mbozili Afwaafwi
Ino ncinzi cipa kuti nsozi kazitapwayani ciindi nozyuuluka?