Ba Jean-Yves abakaintu babo ba Vasthie Mudaheranwa, bagwasyilizya bantu balaabulwazi bwa coronavirus ku Montreal, Canada. Mukwesu Mudaheranwa musilisi wamalwazi aamucamba acibbadela cili kubusena nkobakkala, kumane Mucizyi Mudaheranwa ngu nesi uubelekela acibbadela mpobasilikila bulwazi bwa COVID-19. Aciindi aawa bantu nobayoowede kapati, banabukwetene aaba bajana nguzu kuli Jehova akugwasyigwa “akaambo kakukkomana kwamyoyo yabo” kweelana ambwaakasyomezya Jehova.—Isaya 65:14.

Mukwesu waamba kuti: “Babelesima banji baliyoowede kapati.” Mucizyi awalo waamba kuti: “Ciiyo cangu ndemwini candigwasya kapati. Citupa kuzinzibala kuyeeya mazuba aamamanino, alimwi akuliyeezya kuti Jehova ulaandiswe akuti takonzyi kutulekelezya. Awalo mupailo ulabeleka kapati. Kanditanaunka kumulimo, ndilapaila, aboobo ndilaakuba aluumuno.”

Mukwesu wazumanana kwaamba kuti: “Ndakazwa ku Rwanda, alimwi ndakaliko aciindi cankondo yacijaye-jaye. Ku Canada, zintu zili boobu tazinabuzuba zyacitika, aboobo inga twaluba kuti tupona kumazuba aamamanino. Kwaamba masimpe, andime tiindakali kuciyeeyela kuti buzuba bwa Jehova bwaswena kapati. Bulwazi oobu bwapa kuti ndisyome kuti tupona kumazuba aamamanino, alimwi lusyomo lwangu mu Bbaibbele amuzisyomezyo zili mumo lwayuma.”

Bantu ba Jehova nyika yoonse bajisi lusyomo ndobajisi banabukwetene aaba, aboobo lwabapa kuzumanana kuba aluumuno muciindi eeci nokuli bulwazi bwa Covid 19.—Isaya 48:18.