Cisi ca Italy cili akati kazisi kuli bantu banji ibajatwa abulwazi bwa COVID-19. Kwiinda mukusololelwa a Kabunga Keendelezya, ofesi yamutabi yaku Italy iili mukubagwasyilizya ibakwesu abacizyi kumubili alimwi akumuuya.

Makkomiti aa Disaster Relief (DRCs) alimukujanina bakwesu nzyobayandika ku northern, central, alimwi aku southern Italy. Bakwesu bali mumakkomiti aaya balazyiba nzyobayandika bakwesu ibajatikizyidwe akaambo kakuti inga balakwabana abalangizi bamabazu, balo ibaambilwa abaalu.

Kuyungizya akubagwasya kumubili basikumwaya, baalu balabagwasyilizya kuzumanana kucita zintu zyakumuuya. Mukwesu Villiam Boselli, imulangizi wabbazu uubelekela munsi-munsi adolopo iitegwa Milan, iili akati kamadolopo aakusaanguna aakajatikizyigwa abulwazi oobu, wakaamba boobu: “Nokuba kuti balijalilidwe mumaanda, bakwesu abacizyi boonse balabandika. Alimwi, kwiinda mukuswaangana antoomwe kubelesya videoconference, boonse buyo balakulwaizyanya umwi aumwi alimwi akwaamba zyalusyomo lwabo. Nobaba bakwesu abacizyi baceembede balagwasyigwa abubambe oobu bwakucita miswaangano kubelesya videoconference. Ndiyeeya kuti lino mbungano zilikamantene kapati kwiinda kaindi!”

Kuyungizya waawo, bacibbululu banji ibatali Bakamboni inga balayeebelela miswaangano ababbululu babo Bakamboni. Mucizyi umwi wakaamba kuti: “Balumi bangu tiibakali kuyanda kujanika kumiswaangano, pele mazuba aano miswaangano ibatobela buya aŋanda . . . Ncinzi cacitika? Balaikkomanina kapati!”

Bakwesu abacizyi balasolekesya kucibelesya kufwumbwa coolwe ncobajisi cakukambauka. Mucikozyanyo, mucizyi umwi naakali kutola kacinga kabalema kumucizyi uucembeede, bakapokola botatwe bakamwiimika anzila. Mucizyi wakabaambila kuti wakali kugwasya mucizyi uucembeede mpoonya wakabatondezya mapepa akali kumuzumizya kweenda. Kumane wakabaabila tulakiti yakuti Ino Muyeeya Kuti Kumbele Aamazuba Kunooli Buti? alimwi ayakuti Sena Kupenga Kuli Nokuyoomana? Bakapokola bakaatambula. Mucizyi naakali kupiluka, bakapokola bakamwiimika alimwi. Lino aciindi eeci, bakapokola bakali kulumba buyo mpoonya akulomba kuti bazyibe twaambo tunji kujatikizya bulangizi bujanika mu Bbaibbele. Mpoonya bakatamba babelesinyina bobilo kuti babasangane mumubandi ngobakajisi. Mucizyi wakakkomana kubatondezya webbusaiti ya jw.org. Umwi wabakapokola wakaamba kuti, “Twamulumba kapati, mwapa kuti tukkomane sunu!”

Mukwesu Boselli wakaamba kuti: “Nokuba kuti mukuli umwi ngondijisi ngwakukulwaizya alimwi akuumbulizya bamwi, ndime ndakulwaizyigwa kubona bakwesu kabazumanana kuyuma kumuuya alimwi akuzumanana kuliyumya. Luyando ndobajisi kuli Jehova nduyumu kapati cakuti lulandinjila mumoyo. Ncobeni zipego zibotu kuzwa kuli Jehova zyatugwasya kapati!”

Cilisalede kuti, mubukkale oobu bukatazya, bakwesu bazumanana kuyuma kumuuya alimwi kunyina ‘wazungaanizyigwa apenzi eeli.’—1 Batesalonika 3:2, 3.