Mu January 2021, bamu Kabunga Keendelezya bakaambilizya kumwaigwa kwabroshuwa alimwi abbuku lyakuti Amupone Kukabe Kutamani! Zyakumwaya eezyi nzyakubelesya kuyiisya bantu Bbaibbele. Alimwi zyapa kuti katusololela kabotu ziiyo.

Kwakabikkwa zibeela zipya mu aapu ya JW Library izipa kuti bbuku alimwi abroshuwa kazilibonya kabotu kubamayi alimwi abasikwiiya. Amujane ciindi cakuzyiba mbozibeleka.

• Sena muyanda kutondezya sikwiiya wanu kaambo kagaminide muciiyo? Amutyanke mumuncali kutegwa mujalule cibeela ca menu. Mpoonya mutyanke akabbokesi ka Share kutegwa mumutumine liinki yamuncali ooyo uugaminide.

• Sena muyanda kuswiilila kubalwa kwamuncali antoomwe asikwiiya wanu? Amutyanke mumuncali kutegwa mujalule cibeela ca menu. Mpoonya mutyanke akabbokesi ka Play kutegwa muswiilile kubalwa kwamuncali ooyo.

• Ambweni sikwiiya wanu ubelesya bbuku naa broshuwa iisimbidwe kakuli nywebo mubelesya yaafooni. Sena mulayanda kubona mboilibonya iisimbidwe? Acibeela cakuti More calo cijanika a menu (ciimininwa atudomwi totatwe ituli atala aasikkilini kululyo), amutyanke aalembedwe kuti Printed Edition. Mpoonya kutegwa mupiluke kupeeji yaliko kamutanacinca, amuunke a menu akutyanka aalembedwe kuti Digital Edition.

• Sena mulayanda kugwasya basikwiiya banu kunoobona mpobeendela mubbuku lili afooni? Ikuti naa mboobo, amubakulwaizye kubelesya tubbokesi tubikkidwe mubbuku twakulembela deeti nocamana ciiyo naa kulemba mbaakani iimwi iigaminide ndyobajisi. Kuyungizya waawo, balakonzya kubelesya tubbokesi twakucconga ituli muccaati yakuti “Amubone Mpomweendela Nomubala Bbaibbele.”