Mu February 24, 2022, basikalumamba bamucisi ca Russia bakanjila mu Ukraine. Kuli Bakamboni ba Jehova bainda ku 129,000 ibakkala mu Ukraine kubikkilizya abana babo. Baofesi yamutabi bapanga ma Kkomiti Aagwasyilizya Nokwacitika Ntenda aali 27 kutegwa ape bakwesu abacizyi lugwasyo ndobayandika. Kuyungizya waawo, bakwesu abacizyi bali mukutondezya luyando lwa Bunakristo akati kabo akuli basimukobonyina kwiinda mukusolekesya kugwasyanya cacigaminina alimwi akuumbulizyanya muciindi eeci cankondo.

Nokuba kuti bunji bwabakwesu abacizyi baciliko mucisi, ibamwi bakasala kuccijila kuzisi zimbi. Aabo ibakaccija bakalijana mumilaini milamfwu kapati, imwi yakali kusika kumakkilomita aali 30. Kumane, bakeelede kulindila kwamazuba otatwe naa one kutegwa bazumizyigwe kunjila mucisi cimbi. Basikumwaya bamu Ukraine bakali kubayandaula bakombinyina ibakali kulindilila mumilaini kutegwa babape zyakulya, maanzi alimwi alugwasyo lumwi ndobakali kuyandika. Mpoonya ciindi bakwesu abacizyi aaba nobakanjila muzisi zimbi, bakajana Bakamboni bamwi ibakabatambula kabanyamwide zikwankwani izijisi mabala aakuti jw.org, kabalibambilide kubaumbulizya alimwi akubagwasya.

• Cuusisya ncakuti mu March 1, 2022, mukwesu umwi syaataambi waku Kharkiv wakajaigwa, kumane bakaintu bakwe bakalicisa kapati naakali kubboloka mabbomba

• Bacizyi bambi botatwe bakalicisa

• Basikumwaya ibainda ku 5,000 bakaasiya maanda aabo

• Maanda obilo akanyonyookela limwi

• Maanda otatwe akanyonyooka kapati

• Maanda aali 35 akanyonyooka asyoonto

• Maanda aa Bwami obilo akanyonyooka cakumaninina

• Basikumwaya banji tabajisi malaiti, malasha, amaanzi. Alimwi mafooni aabo akanyongana

• Ma Kkomiti Aagwasyilizya Nokwacitika Ntenda aali 27 akapangwa mu Ukraine

• Basikumwaya ibali 867 bakagwasyigwa abamu makkomiti aaya kujana kwakukkala kukwabilidwe

• Makkomiti aaya aluujisi kubeleka kuyandauda bakwesu abacizyi zintu ziyandika mbuli zyakulya amaanzi

Myeelwe iili atala aawa itondezya malipooti aakasaanguna kutambulwa.

Tupailila kuti bakwesu alimwi abacizyi balazumanana kuba abusongo amaano kutegwa bacikonzye kuliyumya mubukkale oobu bukatazya alimwi ibupa kulibilika, kumwi kabatondezya luyando lwabunyina.—Tusimpi 9:10; 1 Batesalonika 4:9.