•  Yaljelik bʼa skʼeʼulabʼil 2

•  Sjejelik jel chaʼanyabʼal bʼa Biblia 3-5

  •  Loʼil 3

  •  Leʼa jastik chaʼanyabʼal sbʼa Dyos 4

  •  Skʼumajel ja Biblia 5

•  Kʼotan jun lekil jeʼuman 6-14

  •  Akʼe juna loʼil 7

  •  Kumxan ulatanel 8

  •  Aʼoch nebʼuman 9

  •  Cholo ja skʼuʼajela wiʼoj 10

  •  Loʼil 11

  •  Ja jas yiʼoji 12

  •  Modoʼalik bʼa ochel loʼil 13

  •  Yajel makunuk bideoʼik sok juʼunik 14

•  Ja sakʼanil ja yaʼtijum Dyos 15-16

  •  Spaklajel ja Biblia soka kongregasyon 16

•  Yaljelik bʼa xchʼakulabʼil 17

•  Tsatsankʼujolanel sok yajel rason 18

•  Tyempo 19

•  Yajni wa x-ulatani ja biajante 20

•  Semana bʼa asamblea 21

•  Semana bʼa Conmemoración 22

•  Olomal sbʼaja reunión Ja Sakʼaniltik soka Kaʼteltik 23

•  Presidente sbʼaja reunión Ja Sakʼaniltik soka Kaʼteltik 24

•  Akʼa rason 25

•  Salaʼik 26

•  Bideoʼik 27

1. Ja juʼun it ayiʼoj tojelalik sbʼaja matik wa xyawe ekʼ sparteʼe ja bʼa reunión Ja Sakʼaniltik soka Kaʼteltik bʼa Dyos. Pilan yuja tojelalik it, bʼajtanto oj xchape ja sparteʼe ja matik oj ekʼuki, tʼilani oj spaklaye ja tojelalik wa xyiʼajan ja Juʼun bʼa spaklajel sbʼaja reunión Ja Sakʼaniltik soka Kaʼteltik bʼa Dyos. Ojni tsatsankʼujolaxuk yibʼanal ja cholumanik bʼa yajel ekʼ sparteʼe jastal eskuelanteʼik. Ja matik wanxa smojtaye tikʼan ja kongregasyoni wanxa xbʼobʼ yawe ekʼ sparteʼe ta wanxa skʼuʼane ja jas wa sjeʼa ja Biblia sok wa xyawe makunuk ja rasonik bʼa Biblia jastal jun yaʼtijum Dyos. Ta ayxa maʼ wa skʼana oj ya ekʼ sparte bʼajtanto oj och choluman, ja olomal sbʼaja reunión Ja Sakʼaniltik soka Kaʼteltik ojni spaklay ja rekisitoʼik soka yeʼn sok tsaʼan oj yalyabʼ ta wa sbʼutʼu ja rekisitoʼiki. Yajni stsomo sbʼaje, tʼilani ti oj ajyuk ja maʼ wa xyayi estudio (ma june ja bʼa snantat bʼa kʼuʼuman Dyos). Ja rekisitoʼik it jani junxta wa xmakuni yajni ay maʼ oj ochuk choluman bʼa mito yiʼunejuk jaʼ (od kap. 8 par. 8).

2. Jun minuto. Yajni xchʼak ja tsʼebʼoj sok ja orasyoni, ja presidente sbʼaja reunión Ja Sakʼaniltik soka Kaʼteltik ayal jujuntik jasunuk ja bʼa reunión bʼa wa xpaywani. Ayal jujuntik ja bʼa mas oj ya el slekilal ja kongregasyoni.

 3. Loʼil (10 minuto). Ja bʼa Juʼun bʼa spaklajel ti wa xyiʼajan ja yolomajel ja loʼili sok chabʼe ma oxe punto bʼa tʼilanik. Ja loʼil it oj ya ekʼuk jun ansyano ma jun siervo ministerial bʼa chapan. Yajni xkʼe paklaxuk jun yajkʼachil libro bʼa Biblia, oj ilxuk jun bideo bʼa skʼeʼulabʼil ja libro jaw. Ja maʼ oj ya ekʼuk ja loʼil it ojni bʼobʼ syak ja bideo sok ja yolomajel ja loʼili, pe tʼilan oj xchol ja puntoʼik jel tʼilan yiʼojan ja Juʼun bʼa spaklajel. Ja dibujoʼik ma ja potoʼiki chapubʼal bʼa oj stsʼiktes ja jas wan paklaxeli sok tʼilani oj axuk makunuk lek ja janekʼ tyempo yiʼoj ja parteʼi. Wa xbʼobʼ axuk makunuk pilan impormasyon ta wa xkoltani bʼa xchiktesjel ja puntoʼik ja bʼa loʼil it.

 4. Leʼa jastik chaʼanyabʼal sbʼa Dyos (10 minuto). Ja loʼil it oj axuk sjobʼjelik sok sjakʼjelik pe mey yiʼoj skʼeʼulabʼil sok xchʼakulabʼil. Ojni ya ekʼuk jun ansyano ma jun siervo ministerial bʼa chapan. Ja hermano tʼilani oj yaʼ ja chabʼ sjobʼjeli. Chomajkil, yeʼn oj yil ta oj kʼumaxuk ja tekstoʼiki. Ja matik oj ya skomentaryo ojni albʼuk 30 segundo ma mi tsʼikanuk.

 5. Skʼumajel ja Biblia (4 minuto). Ja parte it ojni ya ekʼ jun winik. Ja maʼ oj skʼumuki kechanta oj skʼumuk ja bersikuloʼik yiʼojani pe mini jas oj yal ja bʼa skʼeʼulabʼil sok ja bʼa xchʼakulabʼili. Ja presidente bʼa reunioni jani oj waj skʼujol skoltajel ja eskuelante bʼa a-skʼumuk sok yajbʼal, ja jastalni tsʼijbʼunubʼali, mok kan jakʼan sok a-skʼumuk ja jastalni wa xkʼumaxi, yajelyi snujkʼalil, kʼotel tekʼan sok xchiktesel ja bʼa ay stʼilanili. Yuja ay ekʼeleʼik mas najat yuja tuki, ja olomal sbʼaja reunión Ja Sakʼaniltik soka Kaʼteltik tʼilan oj yaʼ tʼabʼan skʼujol janekʼ wa xlajxiyuj skʼumajel ja maʼ oj ya ekʼuki.

6. 15 minuto. Ja jas wa xkʼanxi ja bʼa xetʼan it jani snebʼjel sok yajel tojbʼuk ja jastal wa x-ochye loʼili, wa xcholowe sok wa sjeʼawe. Ta ay stʼilanil, ja ansyanoʼiki ojni bʼobʼ axukyile sparteʼe jastal eskuelanteʼik. Ja eskuelanteʼik ojni ya tʼabʼan skʼujole ja spaklajel ja bʼa poyeto Kʼumuman sok jeʼuman ma ja bʼa poyeto Yajtay ja kristyano bʼa ayiʼojan paréntesis ja bʼa Juʼun bʼa spaklajel. Bʼa jujuntik semana ay parteʼik wa xyiʼajan loʼil sok jujuntik sjobʼjel, ja it oj ya ekʼ jun ansyano ma jun siervo ministerial bʼa chapan (kʼela ja  parrapo 15 sbʼaja yajni wa xyiʼajan loʼil sok jujuntik sjobʼjel).

 7. Akʼe juna loʼil. Ja parte it oj ya ekʼ jun winik ma jun ixuk. Ja skoltanumi tʼilan june bʼa smoj winikil ma ixukil ma jun spamilya. Xchawanile oj bʼobʼ ajyuke tekʼan ma kulan. (Bʼa oja naʼ mas sbʼaja xetʼan ja jas yiʼoji sok modoʼalik bʼa ochel loʼil, kʼela ja  parrapoʼik 12 sok  13).

 8. Kumxan ulatanel. Ja parte it oj ya ekʼ jun winik ma jun ixuk. Ja skoltanumi tʼilan june bʼa smoj winikil ma ixukil (km-S 5/97 slam 2). Xchawanile oj bʼobʼ ajyuke tekʼan ma kulan. Ja maʼ oj ya ekʼuki tʼilan oj sjeʼ jasa oj alxuk yajni la kumxitik yulatajel june maʼ ochtiksok loʼil. (Bʼa oja naʼ mas sbʼaja xetʼan ja jas yiʼoji sok modoʼalik bʼa ochel loʼil, kʼela ja  parrapoʼik 12 sok  13).

 9. Aʼoch nebʼuman. Ja parte it oj ya ekʼ jun winik ma jun ixuk. Ja skoltanumi tʼilan june bʼa smoj winikil ma ixukil (km-S 5/97 slam 2). Xchawanile oj bʼobʼ ajyuke tekʼan ma kulan. Ja parte it jun xetʼan bʼa jastal skʼulajel jun estudio bʼa Biblia bʼa wanxa kʼulaxel. Mi yajnaluk oj ajyuk skʼeʼulabʼil ma xchʼakulabʼil, kechan wa xbʼobʼ kʼulaxuk ta ja eskuelante jaʼ wan aʼtel sbʼaja jaw. Cha mi yajnaluk oj kʼumaxuk yibʼanal ja jas yiʼojani, anima oj cha bʼobʼ kʼulaxuk.

 10. Cholo ja skʼuʼajela wiʼoj. Ta ja parte it jun loʼil, ojni ya ekʼ jun winik. Ta jun demostrasyon, oj bʼobʼ ya ekʼ jun winik ma jun ixuk. Ja skoltanumi tʼilan june bʼa smoj winikil ma ixukil ma jun spamilya. Ja eskuelante tʼilani tsamalxta oj sjakʼe sok jaman lek ja sjobʼjeli yajel makunuk ja referencia yiʼojani. Ja eskuelante ojni bʼobʼ yal ma miyuk ja referencia ja bʼa juʼuni.

 11. Loʼil. Ja parte it oj ya ekʼuk jun winik sok oj ya ekʼuk jastal jun loʼil. Yajni ti elel bʼa apéndice A ja bʼa poyeto Yajtay ja kristyano, ja eskuelante ojni xchiktes jastal oj bʼobʼ axuk makunuk ja tekstoʼik ja bʼa xcholjeli. Jun sjejel, ojni bʼobʼ xchol jas wa stojolan ja teksto, jas ora oj axuk makunuk sok jastal oj axuk makunuk bʼa yajel och rason june. Yajni ti elel june ja bʼa sjejel ja bʼa poyeto, ja eskuelante jani oj xchol jastal oj makunuk ja bʼa xcholjeli. Ta lek xyila, ojni bʼobʼ xchiktes ja sjejel yiʼojan ja bʼa punto 1 ma june ja bʼa pilan tekstoʼik yiʼojani.

   12. Ja jas yiʼoji. Ja tojelalik ja bʼa parrapo it sok ja bʼa nochani jani wan stajel tiʼal sbʼaja parteʼik «Akʼe juna loʼil» sok «Kumxan ulatanel». Ta mey yiʼojan pilan tojelal, ja jas oj waj skʼujol ja eskuelante jani xcholjelyabʼ jun smeranil bʼa Biblia bʼa oj koltajuk ja maʼ wa xmaklajiyuji sok xchapjelkan bʼa oj kumxuk ulatanel. Ja eskuelante tʼilani oj stsaʼ jun tema bʼa wa xkan sbʼaj sok wa xkoltani ja bʼa lugari. Yeʼn oj yil ta oj sjeʼ jun juʼun ma jun bideo ja bʼa yamkʼabʼal bʼa sjejel. Jaʼuktoma oj sjeʼ ke snebʼunej ja demostrasyoni, tʼilan oj ya makunuk ja modoʼalik bʼa ochel loʼil, jastal ja chamel skʼujol ja tuk sok ochel loʼil jastalni kʼajyel.

   13. Modoʼalik bʼa ochel loʼil. Ja eskuelante tʼilan oj ya makunuk ja modoʼalik nochani, pe jani ja bʼa jastal wa xtax ja bʼa lugari. Jun sjejel:

1.  1) Bʼa naʼits naʼits. Tini chʼikan ja xcholjel bʼa naʼitsaltik (jach wa xkila jbʼajtik, bʼa telepono ma bʼa karta) sok ja kumxel ulatanelik ataʼa ja bʼa modoʼal it bʼa xcholjeli.

2.  2) Xcholjel bʼa chikan bʼaʼa. Tini chʼikan ja ekʼeleʼik bʼa wa xcholxiyabʼ jun kristyano yajni wantik skʼulajel pilan jun jasunuk, jun sjejel, yajni wa xkʼumantikyi jun teksto bʼa Biblia ja jmojtik aʼtel, bʼa eskuela, jun jbesinotik, yajni wajumotik bʼa karro ma bʼa pilan ekʼele.

3.  3) Xcholjel bʼa ay kristyano. Ja bʼa it tini chʼikan xcholjel soka yal karrito sok ja xcholjel bʼa negosyoʼik, bʼa calle, bʼa parke, bʼa wa x-ajyi ja karroʼik sok bʼa pilan lugarik wa x-ajyi ja kristyano.

 14. Yajel makunuk bideoʼik sok juʼunik. Ja bʼa jastal wa xtaxi, ja eskuelante oj yil ta oj sjeʼ jun bideo ma jun juʼun. Ta ja parte ayiʼoj jun bideo, ma ta ja eskuelante wa skʼana oj ya makunuk, ojni jexuk sok oj paklaxuk, pe mi oj axuk okʼuk.

15. Ja xetʼan it oj kʼeʼuk sok jun tsʼebʼoj. Bʼa 15 minuto oj ajyuk june ma chabʼ parte bʼa oj koltajuke ja matik tsomani bʼa yajel makunuk ja Yabʼal ja Dyos ja bʼa sakʼanile. Ta mey yiʼojan pilan tojelalik, ja parteʼik it oj ya ekʼuk jun ansyano ma jun siervo ministerial bʼa chapan, kechan ja bʼa jasa tʼilan oj aʼtijuk ja kongregasyon oj ya ekʼuk jun ansyano. Yajni ja parteʼali ayiʼoj loʼil sok jujuntik sjobʼjel, ja hermano ojni bʼobʼ ya sjobʼjelik bʼa snajtil ja sloʼili sok mi kechan ja sjobʼjelik wa xyiʼajani. Mini jel albʼeluk oj yal ja skʼeʼulabʼili bʼa jachuk oj kanyuj tyempo bʼa oj xchol ja puntoʼik mas tʼilani sok bʼa oj ya skomentarioʼe ja matik tsomani. Ta ayiʼojan jun entrebista, masni lek ja maʼ oj kʼulajuk entrebistari ti oj ajyuk bʼa plataporma sok mi tiʼuk bʼa skujlayubʼ ta wa xbʼobʼi.

  16. Spaklajel ja Biblia soka kongregasyon (30 minuto). Oj ya ekʼuk jun ansyano bʼa chapan (ja bʼa kongregasyonik bʼa mey mas ansyanoʼik, oj bʼobʼ axuk makunuk siervo ministerialik bʼa chapane). Ja tsome ansyanoʼik yeʼn oj stsaʼe matik chapane bʼa oj yawe ekʼuk. Ja hermanoʼik it tʼilani chapane bʼa mi oj yawe ekʼuk ja tyempo, a-xchiktese ja tekstoʼik bʼa ay stʼilanili sok a-skoltaye ja tuk bʼa yiljel jastik wa xnebʼxi. Bʼa oj lajxuk, jelni oj koltanuk spaklajel ja jas wa xyala ja jastal yajel ekʼ jun loʼil ja bʼa xetʼan ayiʼojan sjobʼjel sok sjakʼjel (w23.04 slam 24, recuadro). Yajni paklaxita lek ja janekʼ alubʼali, mi yajnaluk oj tsʼiktexuk ja 30 minuto. Ta wa xbʼobʼi, kada semana oj axuk makunuk tuktukil maʼ oj ya ekʼuk sok maʼ oj skʼumuk. Yajni ja presidente ja bʼa reunioni skʼanayi ja maʼ oj ya ekʼuk aya koʼuk ja tyempo ja bʼa spaklajeli, yeʼn oj yil jastal oj skʼuluk. Jun modo jani mok skʼumuk jujuntik parrapo.

17. 3 minuto. Ja presidente bʼa reunioni oj yal ja jastik mas tʼilan paklaxi. Chomajkil ayal tʼusan bʼa oj nikwanuk ja bʼa reunión bʼa semana jakumi. Ta ay tyempo, oj bʼobʼ alxuk ja sbʼiʼil ja eskuelanteʼik ayiʼoj sloʼile ja bʼa semana jakumi. Ta mey pilan tojelalik, yajni ay stʼilanil oj axuk jun anunsyo ma oj kʼumaxuk jun karta, ja presidente bʼa reunioni oj skʼuluk ja bʼa yaljelik bʼa xchʼakulabʼil. Ja anunsyoʼik bʼa kʼajyel wa x-axi sbʼaja kongregasyoni, jastal bʼa elel xcholjel sok ja bʼa aseo, mini oj alxuk masan bʼa plataporma, tini oj axuk bʼa tablero. Ta mey tyempo bʼa skʼumajel ja kartaʼik ma yajel ja anunsyoʼik bʼa tʼilan, ja presidente bʼa reunioni wa xbʼobʼ yalyabʼ ja matik ayiʼoj sloʼile ja bʼa xetʼan «Ja sakʼanil ja yaʼtijum Dyos» ayawe koʼuk ja styempoʼe (kʼela ja  parrapoʼik 16 sok  19). Ja reunioni oj chʼakuk sok jun tsʼebʼoj sok orasyon.

18. Yajni xchʼak ja sloʼile jujune ja eskuelanteʼiki, ja presidente bʼa reunioni ayiʼoj jun minuto bʼa skʼulajel felicitar sok yajelyi rason yajel makunuk ja bʼa sjejel yiʼojani. Yajni xyala ja loʼil nochani, mini oj yal jas sjejel wan aʼtel ja eskuelante. Yajni xchʼak ja sloʼili sok skʼulanta felicitar ja eskuelante, oj bʼobʼ yalyabʼ jas sjejel wan aʼtel sok yaljel jas yuj jel lek skʼulan ma tsamalxta a-xchol yabʼ jas yuj jel tʼilan oj skʼujoluk ja bʼa ayto skʼanayuji. Ja presidente bʼa reunioni cha ojni bʼobʼ xchiktes tuk jasunuk ja bʼa demostrasyoni bʼa oj koltajuk ja eskuelante ma ja matik tsomani. Yajni xchʼak ja reunioni ma bʼa pilan ekʼele, ojni bʼobʼ axukyi rason jach stuchʼil yajel makunuk ja poyeto Yajtay ja kristyano, ja poyeto Kʼumuman sok jeʼuman ma ja libro Benefíciese, bʼobʼta jani ja bʼa sjejel wan aʼteli ma bʼa pilan (ja bʼa  parrapoʼik 19,  24 sok  25 oja taʼ mas rasonik sbʼaja xcholik ja presidente bʼa reunión Ja Sakʼaniltik soka Kaʼteltik, sok sbʼaja akʼa rason).

19. Spetsanil ja loʼiliki mini oj ekʼuk ja janekʼ tyempo yiʼojani (jachuk ja yaljelik oj yal ja presidente). Ama ja Juʼun bʼa spaklajel wa xyala janekʼ tyempo oj albʼuk kada parte, pe ta paklaxita tsʼikan ja jas yiʼojani, mini yajnaluk oj tsʼiktexuk ja tyempo. Ta ja eskuelanteʼik ekʼyujile ja tyempo, ja presidente ma ja akʼa rasoni a-staʼ loʼil jach stuchʼil bʼa oj yayi jujuntik rason (kʼela ja  parrapoʼik 24 sok  25). Yibʼanal ja reunión, bʼa ti chʼikan ja tsʼebʼojik sok ja orasyon, oj albʼuk jun ora sok 45 minuto.

20. Ja bʼa semana wan ulatanel ja biajante, ojni nochxuk ja programa yiʼojan ja Juʼun bʼa spaklajel, kechan wa xtukbʼi tʼusan. Ja «Spaklajel ja Biblia soka kongregasyon» mi oj ekʼuk. Ja biajante ja oj ya makunuk ja 30 minuto bʼa oj ya ekʼ jun loʼil. Bʼajtanto oj ya ekʼuk ja sloʼil ja biajante, ja presidente bʼa reunioni oj yal bʼa tʼusanta ja jas ilxi ja bʼa reunión sok ayal tʼusan bʼa oj nikwanuk ja bʼa reunión bʼa semana jakumi, ayal ja anunsyoʼik sok a-skʼumuk ja kartaʼik bʼa tʼilani, sok tixa oj ya ochkan ja biajante. Yajni xchʼak ja sloʼili, ja biajante oj xchʼakan ja reunión soka tsʼebʼoj stsaʼuneji. Oj bʼobʼ slok jun hermano bʼa oj yayi ja orasyoni. Mini oj ekʼuke ja eskuelanteʼik ja bʼa tuk salaʼik. Ja kʼoleʼik bʼa pilan kʼumalik ojni bʼobʼ skʼuluke ja reunión anima ja kongregasyon bʼayesok wan ulatajel. Kechan, ojni smaklaye yajni xkʼe ya ekʼuk ja sloʼil ja biajante.

21. Ja bʼa semana ay asamblea mini oj kʼulaxuk reunionik ja bʼa kongregasyoni. Ojni alxuk yabʼ ja kongregasyon a-spaklaye stuchʼile ma soka spamilyaʼe ja jas oj ekʼuk ja bʼa reunioni.

22. Yajni ja Conmemoración oj kʼulaxuk bʼa yoj semana, mini oj kʼulaxuk ja reunión Ja Sakʼaniltik soka Kaʼteltik.

23. Juni ansyano tsaʼubʼal yuja tsome ansyanoʼiki. Tʼilani ayil bʼa toj akʼulaxuk ja reunión sok akʼulaxuk jastalni wa xyala ja juʼun it. Tʼilani oj yiʼ abʼal sbʼaje soka akʼa rasoni. Yajni tixa ay ja Juʼun bʼa spaklajel, ojxani skʼuluk ja programa sbʼaja eskuelanteʼik ja bʼa chabʼ ixaw jaw: tini chʼikan ja parteʼik bʼa eskuelanteʼiki, ja tuk parteʼik sok ja maʼ oj skʼul presidir ja reunioni, ja tsaʼanxta chabʼ parte it jani oj axuk makunuk ja matik stsaʼuneje ja tsome ansyanoʼiki (kʼela ja  parrapoʼik 3-16 sok  24). Yajni stsaxi maʼ oj ya ekʼuk ja parteʼik (sea eskuelante ma tuk parte) tʼilani oj pensaraxuk ja bʼa sjabʼile ja hermanoʼiki, ja yexperienciaʼe sok ta oj bʼobʼ yale jaman lek ja tema yiʼojani. Yibʼanal ja parteʼiki, tʼilani oj axukyile junuk oxe semana bʼajtanto. Ja bʼa parteʼik bʼa eskuelanteʼik ojni axuk makunuk ja pormularyo Juʼun bʼa loʼil sbʼaja Sakʼaniltik soka Kaʼteltik (S-89). Cha ojni yil ke aʼaxuk bʼa tablero ja programa. Ja tsome ansyanoʼiki ojni bʼobʼ stsaʼe pilan ansyano ma jun siervo ministerial bʼa oj koltajuk; pe kechani ja ansyanoʼik oj stsaʼe maʼ oj ya ekʼuk ja parteʼik mi bʼa eskuelanteʼuki.

24. Kada semana, jun ansyano yeʼn oj skʼul presidir ja reunión Ja Sakʼaniltik soka Kaʼteltik (ja bʼa kongregasyonik bʼa mey mas ansyanoʼik wa xbʼobʼ yawe makunuk siervo ministerialik bʼa chapane). Ja presidente yeʼnani oj xchap ja yaljelik bʼa skʼeʼulabʼil sok bʼa xchʼakulabʼil. Yeʼnani oj ya ochkan ja matik oj ekʼuki, sok ta mey jitsan ansyanoʼik, bʼobʼta oj ya ekʼ jujuntik loʼil, jastal ja bʼa parteʼik bʼa kechan ayiʼoj jun bideo. Mini jel oj cholxuk ja yajni xchʼak ja parteʼiki sok bʼa yajel ochkan ja maʼ nochani. Ja tsome ansyanoʼik yeʼn oj yil-e matik ansyano chapane oj bʼobʼ skʼuluke ja cholal it. Ja matik tsaʼubʼali cholni oj ekʼuke. Ta ayni stʼilanil, ja olomal bʼa reunión Ja Sakʼaniltik soka Kaʼteltik oj bʼobʼ axuk makunuk mas tikʼan yuja tuk ansyanoʼik bʼa chapane. Ta jun ansyano wa xbʼobʼ ya ekʼuk ja «Spaklajel ja Biblia soka kongregasyon», bʼobʼta cha chapani ay bʼa skʼulajel presidir ja reunioni. Pe ja presidente tʼilani a-snaʼ jastal oj skʼul felicitar ja eskuelanteʼik, sok ta ay stʼilanil, kʼunxta ayayile rasonik bʼa wa xmakuni. Cha yeʼnani kajan sbʼaj skʼeljel bʼa mok ekʼuk ja tyempo ja bʼa reunioni (kʼela ja  parrapoʼik 17 sok  19). Bʼa mi oj chʼayxuk mas tyempo, ta ay lugar ja bʼa plataporma sok lek xyila ja presidente, wa xbʼobʼ axuk makunuk jun micropono bʼa ayiʼoj pedestal bʼa jachuk ja eskuelanteʼik ojxa bʼobʼ ekʼuke bʼa stsʼeʼel ja atril malan wane ajel ochkani. Cha ojni bʼobʼ axuk jun mesa sok jun siya bʼa oj kulanuk ja presidente yajni wan ekʼel ja skʼumajel ja Biblia sok ja xetʼan «Kʼotan jun lekil jeʼuman».

25. Ta wa xbʼobʼi, tʼilani oj lexuk jun ansyano bʼa ayiʼoj experiencia bʼa yajel ekʼuk loʼilik. Yajni ay stʼilanil, oj yayi rason ja ansyanoʼiki sok ja siervo ministerialiki bʼa wa xyawe ekʼ sparteʼe ja bʼa reunión Ja Sakʼaniltik soka Kaʼteltik, ja loʼil elel bʼa Biblia, wa spaklaye Ja Juʼun Cholumani ma ja «Spaklajel ja Biblia soka kongregasyon», ma ja matik wa skʼumane ja parrapoʼiki (kʼela ja  parrapo 19). Ta aʼay ja ansyanoʼik bʼa chapane yajel ekʼuk loʼilik sok lekil jeʼumane, oj bʼobʼ jeltexuk kada jabʼil ja akʼa rason. Mi tʼilanuk oj ya rason bʼa kada parte wa x-ekʼi.

26. Ta ay jitsan eskuelanteʼik, ja kongregasyoni ojni bʼobʼ ya makunuk ja tuk salaʼik. Kada sala tʼilani oj ajyuk jun akʼa rason bʼa chapan, pe mastoni lek ta jun ansyano. Ta ay stʼilanil, oj bʼobʼ makunuk jun siervo ministerial bʼa chapan. Ja tsome ansyano yeʼn oj yil-e matik oj bʼobʼ axukyi ja cholal it sok ta chol oj ekʼuke. Ja akʼa rason ojni snoch ja jas wa xyala ja  parrapo 18. Ojni kʼanxukyi ja eskuelanteʼiki awajuke ja bʼa salaʼik tsaʼan ja bʼa loʼil «Leʼa jastik chaʼanyabʼal sbʼa Dyos», ja bʼa xetʼan «Sjejelik jel chaʼanyabʼal bʼa Biblia». Cha oj kumxuke ja bʼa bʼajtan sala yajni xchʼak ja xetʼan «Kʼotan jun lekil jeʼuman».

27. Ja bʼa reunión bʼa yoj semana oj axuk makunuk jujuntik bideoʼik bʼa wa xbʼobʼ ilxuk bʼa tuktukil aparatoʼik ja bʼa aplikasyon JW Library®.

© 2023 Watch Tower Bible and Tract Society of Pennsylvania

S-38-TJO 11/23