Kada jabʼil wani xyiʼaje jaʼ jitsan mil kristyano. Ja yuj wani xkʼanatik mas naʼitsik bʼa oj toyxuk ja Jyoba. Ja Departamento bʼa xChapjel sok sKʼulajel Naʼitsik bʼa Sutanal ja Luʼumi xchapawe yajel kʼeʼuk ma stojbʼesel mas ja 2.700 naʼitsik ja bʼa jabʼil bʼa kaʼteltik 2020. a

 Tristeni yabʼjel, ja chamel wa spuku sbʼaj ja COVID-19 yaʼunej jitsan wokolik sbʼaja aʼtelik it. Bʼa oj talnaxuk ja hermanoʼiki sok skʼulajel ja jastik yaʼunej kujlajuk ja gobyernoʼiki, ja Tsome Olomalik bʼa yajel el juʼunik bʼa Tsome Tojwanum yaʼunej kʼot t’an tekʼan tʼusan mi yibʼanaluk ja aʼtelik it. Pe ja bʼa jabʼil bʼa kaʼteltik 2020 bʼobʼni axel kʼeʼuk sok tojbʼexuk mas ja 1.700 naʼitsik bʼajtanto oj kʼeʼuk ja chamel wa spuku sbʼaji. Chomajkil, bʼobʼni cha kʼulaxuk mas ja 100 aʼtelik jel tʼilan ja bʼa Betelik. La kiltik chabʼe ja bʼa aʼtelik it sok jastal yaʼunej el slekilal ja hermanoʼiki.

 Ja Betel bʼa Camerún. Ja poko Betel, bʼa ti wa xtax ajyi bʼa chonabʼ Duala, jel chʼin sok wani skʼana stojbʼesel. Ja Tsome Olomalik bʼa yajel el juʼunik spensaraʼan oj stojbʼes ja Betel, pe mastoni karo oj eluk yuja janekʼ stsʼakoli. Cha yilawe oj bʼobʼ yawe kʼe yajkʼachil naʼitsik bʼa pilan lugar ma smanjel sok stojbʼesel jun naʼits. Pe mini june ja bʼa it bʼobʼ kʼulaxuk.

 Pe, ja hermanoʼiki yabʼye ke ja matik ay xchol ja bʼa lugari wane xchapjel oj stojbʼese jun karretera ja bʼa norte bʼa Duala, bʼa tey june ja jsalontik bʼa Asamblea. Ja yajkʼachil karretera oj koltanuk bʼa pasil ochel ja bʼa Betel sok yajel ochuk ja jastik junuk wa xmakuni. Jani ja jas mero wa xmakuniyuj ja Betel. Ja yuj ja Tsome Tojwanum yaʼa permiso bʼa oj axuk kʼeʼuk jun yajkʼachil Betel jun parte ja bʼa slujmal ja bʼa Salón bʼa Asamblea.

 Bʼa oj kʼulaxuk jujuntik parteʼik ja bʼa aʼteli, ja hermanoʼiki stupuwe jun empresa bʼa yajel kʼe naʼitsik, sok ja it koltani bʼa mi oj yiʼ mas tyempo sok takʼin. Pes ja naʼitsi mi chʼak yiʼ ja janekʼ takʼin wa xpensaraxi ajyi, kanto mas ja chabʼ miyon dolarik. Ja pamilya Betel bʼobʼni ekʼuke ja bʼa yajkʼachil Betel bʼajtanto oj kʼeʼuk ja chamel wa spuku sbʼaj ja COVID-19.

 Ja wego ja betelitaʼik bʼa Camerún tixani aye sok jelxani lek ja bʼa wane aʼteli, cha wani xyilawe ja ajkʼach Betel jastal jun majtanal bʼa Jyoba. Jun nupanum wa xyala: «Ja wego wani xkʼana oj aʼtijukotikon mas sok wani xkilatikon jastal jun majtanal».

 Opisina bʼa sutjel bʼa tojol-abʼal (México). Bʼa jitsan jabʼil, ja kʼole sutumanik bʼa tojol-abʼal tini aʼtijiye bʼa Betel bʼa Centroámerica, mojan yiʼoj ja chonabʼ México. Pe ja matik wa xkʼumani tojol-abʼali tini aye ja bʼa municipio bʼa Altamirano sok bʼa Las Margaritas, wa xkanyuj junuk 1.000 kilometro ja bʼay ja Betel. Yuja it, ja sutumaniki jelni wokol xyabʼye bʼa oj sut-e ja jastal mero wa xkʼumani ja kristyano. Sok ja Betel wani x-wokolani bʼa oj staʼe hermanoʼik bʼa mojan aye bʼa oj bʼobʼ koltanuke ja bʼa sutjel sok bʼa skʼulajel grabar ja audioʼik.

 Yuja jastik it, ja Tsome Olomalik bʼa yajel el juʼunik bʼa Tsome Tojwanum, spensaraʼan ke ja kʼole sutumanik awajuke ja bʼa lugar wa xkʼumaniye tojol-abʼali. Yuja it, ja Betel smana sok stojbʼes jun naʼits. Ja it mastoni koʼel tsʼakol eli, ke yuja yajel kʼeʼuk ma skʼulajel rentar opisinaʼik.

 Jun sutuman wa xcholo jastal ay xyabʼi: «Ja bʼa lajune jabʼil aʼtijiyon jastal sutuman ja bʼa Betel mini jun pamilya jtaʼa bʼa wa xkʼumaniye ja jkʼumali. Pe ja wego, ja opisina tixa ay bʼa mero wa xkʼumaniye ja tojol-abʼali. Kada kʼakʼu wa xbʼobʼ loʼilanukon sok kristyanoʼik ja bʼa jkʼumali. Sok ja it skoltunejon ja bʼa jastal wala kʼumaniyon sok skoltunejon ja bʼa kaʼteli».

 Ja bʼa jabʼil bʼa kaʼteltik 2021, ta bʼobʼi, wa xkʼana oj katik kʼeʼuk 75 opisinaʼik bʼa sutjel sok naʼitsik bʼa Eskuela bʼa Biblia. Chomajkil oj nochxukyi skʼulajel waxake proyectoʼik bʼa tuktukil Betel, tini chʼikan ja aʼtel bʼa Rámapo (Nueva York) sok yajel kʼe bʼa pilan lugar ja Betel bʼa Argentina sok Italia. Chomajkil, wani xkʼanxi mas ja 1,000 yajkʼachil Naʼitsik bʼa Tsomjelal. Pe cha ayni mas ja 6.000 lugarik bʼa tsomjelal bʼa mixa lekuk wa xtaxi sok tʼilan yajel kʼe yajkʼachil, cha ay 4.000 Naʼitsik bʼa Tsomjelal bʼa tʼilan oj tojbʼexuk.

 ¿Jastal wa xtupxi yibʼanal ja aʼtelik it? Ja hermano Lázaro González, june ja bʼa Olomalik bʼa Betel bʼa Centroamérica, wa xyayi sjakʼjel ja sjobʼjeli. Stajel tiʼal ja aʼtel bʼa Opisina bʼa sutjel bʼa tojol-abʼal, wa xyala: «Ja hermanoʼik ja bʼa territorio bʼa yeʼn wa xyila ja Betel bʼaytikoni, mini ayiʼoje jitsan jastik. Lek mi jaʼuk yuja skoltanel ja kermanotik bʼa sutanal ja luʼumi, mini oj bʼobʼ axuk kʼeʼuk opisinaʼik bʼa sutjel sbʼaja kermanotik. Stsʼakatal yuja sdonasyone, wani xbʼobʼ jektik ja sutumanik ja bʼa lugarik mero wa xkʼumaniyeʼi. Wani xkatikonyi tsʼakatal yibʼanal ja hermanoʼik yuja jel jaman skʼujole». ¿Awila maʼ? Yibʼanal ja aʼtelik bʼa yajel kʼeʼuk naʼitsik jani stsʼakatal yuja donasyonik sbʼaja kaʼteltik bʼa sutanal ja luʼumi. Jitsan ja bʼa it wani skʼulane bʼa donate.pr418.com.