Kada jabʼil, jitsan matik wane aʼtel bʼa tyempo tsʼikan bʼa yibʼanal ja luʼumi wa xwajye ja bʼa Eskuela bʼa Biblia bʼa Galaad bʼa Watchtower, bʼa ti wa xkʼulaxi bʼa Yechalil ja Chapjelal bʼa Watchtower bʼa Patterson (Nueva York). a Ja bʼa eskuela it, ja estudianteʼik wa snebʼawe bʼa skʼulajel mas lek ja tuktukil cholalik yiʼoje ja bʼa xchonabʼil ja Dyos. Ja chapjelal it wa xkoltajiye bʼa yajel tsatsbʼuk sok yajel ajyuk tsʼunan lek ja kongregasyonik sok ja betelik bʼa yibʼanal ja luʼumi.

 Ja Galaad juni eskuela bʼa sutanal ja luʼumi. Jun sjejel, ja clase 147, bʼa skʼulan sbʼaje graduar bʼa 2019, ajyi 56 estudiante bʼa 29 paisik. Ja matik wa xwajye ja bʼa eskuela it wane aʼtel bʼa tyempo tsʼikan jastal betelitaʼik, misioneroʼik, precursorik especial ma biajanteʼik.

 Bʼa skʼulajel ja eskuela it, wa xkʼe chapxuk bʼajtanto lek oj kʼe stulyi. Jun sjejel, ja Departamento bʼa Biajeʼik ja bʼa Yechalil wa xkʼelxi ja kaʼteltiki wa smana ja sboletoʼe ja matik oj wajuke ja bʼa eskuela. Ja bʼa clase 147, ja gasto yiʼaj ja wajye sok kumxiye ja bʼa Patterson chʼakxi 1,075 dólar kada estudiante. Ja estudianteʼik bʼa islas Salomón tʼilani syamawe chane avión bʼa oj kʼotuke man Patterson, sok syamawe oxe avión ja kumxiyeʼi. Bʼa yibʼanal skʼulane biajar mas ja 35,400 kilometro. Ja boletoʼik jaw tupxi 2,300 dólar kada jujune. Bʼa mi jel oj chʼakxuk takʼin, ja Departamento bʼa Biajeʼik wa xya makunuk jun programa bʼa stajel boletoʼik mi jel karoʼuk. Yajni smakaweta, ja programa wantoni sleʼa bʼa jitsan semana ma asta ixawik boletoʼik bʼa masto barato. Ja Departamento bʼa Biajeʼik cha wa xya makunuk ja puntoʼik wa x-ajiyi yuja empresa bʼa avioni ma ja puntoʼik wa skʼebʼawe jujuntik pasajero.

 Jitsan estudianteʼik wani skʼana oj ajyuk svisaʼe bʼa oj ochuke ja bʼa Estados Unidos. Ja yuj, ja Departamento bʼa Jastik ti chʼikan soka Leyi ja bʼa Yechalil wa xkʼelxi ja kaʼteltiki wa xkoltaniye bʼa yajel el jun svisaʼe ja estudianteʼiki. Bʼa stojbʼesel ja visaʼik it wa xchʼakxi junuk 510 dólar kada jujune.

 ¿Jastal wa xkatik el slekilal ja chapjelal wa x-ajiyile ja estudianteʼik it? Ja Hendra Gunawan kʼotel jun ansyano bʼa jun kongregasyon ja bʼa Sureste Asiático sok cha teysok jun nupanum graduadoʼe bʼa Galaad. Ja yeʼn wa xcholo: «Mini ay precursorik regular ajyi ja bʼa jkongregasyontikoni. Pe yajni julye ja nupanum it, sjeʼaweyi ja tuk ja jastal kongana wa x-aʼtijiye, sok yuja it cha ochye precursorik ja tuki. Sok mas tsaʼan jun hermana ja bʼa jkongregasyontikoni waj ja bʼa Eskuela bʼa Cholumanik sbʼaja sGobyerno ja Dyosi».

 Ja Sergio Panjaitan wan aʼtelsok jujuntik graduadoʼik bʼa Galaad ja bʼa Betel bʼa Sureste Asiático. Ja yeʼn wa xyala: «Ja chapjelal ajiyile ja hermanoʼik it jelni wa xkatikon el slekilal jastalni ja yeʼnle. ¡Jelni jas snebʼawe! Pe jaʼuktoma oj ya sbʼaje mas niwan yuja tuk, wani sjeʼawe ja jasa snebʼawe. Ja it wa stsatsankʼujolanotikon, jaxa keʼntikoni wa stsatsankʼujolantikon ja tuki».

 ¿Bʼa wa xchʼak eluk ja gastoʼik ja bʼa eskuela it? Tini bʼa donasyonik wa x-axi sbʼaja kaʼteltik wa xkʼulaxi bʼa yibʼanal ja luʼumi. Jitsan ja bʼa it ti wa xyaʼawe ja bʼa tuktukil modoʼik wa xtax ja bʼa donate.pr418.com. Tsʼakatalex yuja wa donasyonex waxa waʼawex sok spetsanila kʼujolexi. Soka it wa xbʼobʼ kʼulaxuk ja eskuela it bʼa wa xjakye bʼa tuktukil parte ja bʼa luʼumi.