Ja Jyoba wa skʼana ke bʼa spetsanil ja luʼumi, chikan jastal wa xtaxi, a-snebʼe bʼa yeʼna soka bʼa sGobyerno (1 Timoteo 2:3, 4). Ja yujil ja testigoʼik bʼa Jyoba wa xyawe el Bibliaʼik sok koltanelik bʼa oj spaklaye jitsan kristyano ja janekʼ oj bʼobʼuki, cha tini chʼikan ja matik mi xyabʼ kʼinali. Chomajkil, ja xchonabʼi yaʼunej el bʼa bideo a jitsan mil juʼunik bʼa mas ja 100 kʼumalik ja bʼa lenguaje bʼa señas. ¿Jastal wa xkʼulaxi sok jastal wa xpilxi ja juʼunik it? ¿Jasa tukbʼeljan ja bʼa tyempo ekʼeljani?

 Ja bʼa sutanal ja luʼumi ay sutumanik bʼa tuktukil lenguajeʼik bʼa señas. Yajni wa sutxi jun juʼun, kada equipo bʼajtan wa spaklaye lek. Tsaʼan wa xyilawe jastal mero oj yawe ekʼuk ja bʼa lenguaje bʼa señas. Bʼa tsaʼanxta wa xkʼulxi grabar ja juʼun jaw bʼa bideo. Ja wego ay 60 equipoʼik bʼa ye’n kajan sbʼaje sutjel ja koltanelik bʼa spaklajel ja Biblia. Pilan 40 jujuntik kʼakʼu wa xkoltaniye.

 Ja bʼa tyempo ekʼeljani, skʼulajel bideoʼik bʼa lenguaje bʼa señas jelni karo stsʼakol. Ja kamaraʼik sok ja yamkʼabʼalik wa xmakuniyujile masni karoʼik. Chomajkil, ja grabasyonik ti wa skʼulane bʼa jun estudio. Ay ekʼeleʼik tʼilani kʼulaxi syajkʼachil ma ay ekʼele kechani tojbʼexi ja naʼitsi. Yajelkan chapan spetsanil jun equipo bʼa sutjel bʼa lenguaje bʼa señas wa xchʼakxi mas ja 30.000 dólar b.

 Bʼa oj axuk makunuk lek ja donasyoniki, ja organisasyon skʼujolanunej bʼa stojbʼesel sok bʼa mas pasil oj kʼulaxuk ja sutjeli. Sbʼaja jaw wan axel makunuk yamkʼabʼalik mas ajkʼach, sok mas koʼel stsʼakol sok jel xmakuni jun. sjejel, mixani tʼilan oj ajyuk jun lugar bʼa skʼuljel grabar. Kada equipo bʼa sutjel ojni bʼobʼ skʼuluke grabar ja bideoʼik man bʼa yoficinaʼe sok wa xbʼobʼ skʼuluke pintar bʼa yaʼax. Yajni wa x-ekʼ jitsan hermano bʼa jun bideo, kada jujune wa skʼulane grabar ja bʼa wa xkoʼ sbʼajeʼi man bʼa yoficinaʼe ma man snaje.

 Chomajkil jkʼulunejtikon programaʼik bʼa oj skoltay ja equipoʼik ja ma wa xyawe eluk ja juʼunik. Stsʼakatal yuja jaw, yajel eluk ja juʼunik bʼa lenguaje bʼa señas masni tʼusanxta tyempo wa xyiʼaj. Ja hermanoʼik jel xyawe tsʼakatal yuja jastik it tojbʼeljani. Jun hermano sbʼiʼil Alexánder wa xyala: «Jelni gusto ayon yujni wa x-eljan bideoʼik bʼa lenguaje bʼa señas bʼa mas tikʼanxa yuja jastal ajyi. Kada kʼakʼu wa xkila jun bideo».

 Ja bʼa jtyempotiki, yajelkan chapan jun equipo bʼa sutjel mini xchʼakxi mas ja 5.000 dolarik. Yuja jaw, wa xbʼobʼ axuk el mas jitsan bideoʼik bʼa lenguaje bʼa señas.

 Tsaʼan yajni wa xchʼak kʼulxuk grabar jun juʼun, ojni jekxukyi ja matik wa xmakuniyuji. Ja ajyi, ja jastik wa xkʼulxi grabari wa xjekxiyi june maʼ wa xyawe el kopyaʼik bʼa videocinta sok DVD, tsaʼan wa sjekaweyi ja kongregasyoniki. Yibʼanal ja it wani skʼana jitsan tyempo, wa skʼana yajelyi puersa sok takʼin. Kechan ja bʼa 2013 chʼakxi mas ja chabʼ miyon dolarik bʼa yajel eluk DVD bʼa lenguaje bʼa señas.

 Ja matik mi xyabʼye kʼinali jelni gustoʼaxiye yuja bideoʼiki, pe ja smeranil mini jel pasiluk yajel makunuk, mas ja yajni jelxa aʼay ja numeroʼik bʼa cintaʼik sok bʼa DVD. Bʼa jujuntik ekʼele, bʼa kechanta jun libro bʼa Biblia wani xyiʼaj jitsan DVD. Jun hermano bʼa Brasil sbʼiʼil Gilnei wa xjul skʼujol: «Kada ekʼele wa xkʼana oj jkʼumuk jun teksto tʼilan oj jleʼ bʼa videocinta wa xtaxa sok tixa wa xleʼa ja bersikulo. Jelni wokol». Jun hermana sbʼiʼil Rafayane, wa xya makunuk ja DVD bʼa lenguaje bʼa señas, wa xyala: «Skʼulajel estudiar jach bʼaj tuchʼil jelni xyaʼa axwel. Jelni wa xchʼaya tyempo slejel ja tekstoʼik sok ja referenciaʼik». Ja bʼa xcholjeli, ja hermanoʼik tʼilani oj yiʼe och ja DVD sok ja videocintaʼik bʼa oj yawe okʼuk bʼa stele ja kristyanoʼik maʼ wa xyiʼaj gusto ja lekil rason. Jujuntik wani xcha yiʼaje och ja yaparatoʼe bʼa oj yawe okʼuk ja DVD. Pe tʼusan tsaʼan kʼe eluk ja yal aparatoʼik bʼa yajel okʼuk ja DVD bʼa ayxani spantayaʼil, bʼa mas pasilxani yajel makunuk sok yajel okʼuk ja DVD. Ja Bobby, bʼa ti sbʼaj bʼa Estados Unidos, wa xyala: «Tsaʼan yajni xchʼaka jeʼ jun teksto sok waxa kʼana oja jeʼ pilan, Bʼa jitsan ekʼele tʼilan oja tukbʼes ja DVD. Ja it wani skʼana tyempo, sok mini pasiluk yajel makunuk ja Biblia ja bʼa xcholjeli»

 Ja bʼa 2013, ja xchonabʼil ja Jyoba ya eluk ja aplikasyon JW Library Sign Language, sok ja it ja hermanoʼik wani xbʼobʼ yawe koʼuk ma yajel okʼuk bideoʼik bʼa lenguaje bʼa señas ja bʼa steleponoʼe ma bʼa tablet. Ja ajyi kechantani ay bʼa lenguaje bʼa señas americano, pe ja bʼa 2017 kʼulaxi actualisar bʼa jachuk oj bʼobʼ yawe makunuk spetsanile ja bʼa lenguaje bʼa señas. Ja hermanoʼik jelni gustoʼaxiye. Jun hermano bʼa Brasil sbʼiʼil Juscelino yala: «Mi xbʼobʼ jkʼuʼuk. Mi xkakan spensarajel ke ja Tsome Tojwanum jel syajtayotikon ja matik mi xkabʼtikon kʼinali sok wa skʼana oj kʼikotikon ja bʼa smeranil jastalni ja matik wa xyabʼye. Yajni el ja aplikasyoni, jel gusto axiyon sok mastoni wa xkʼana oj kʼul estudiar ja Biblia».

 Ja wego, wa xkatikon eluk spetsanil ja bideoʼik bʼa lenguaje bʼa señas sok wa xpukutikon bʼa jsitiotikon bʼa internet sok bʼa aplikasyon JW Library Sign Language. Tsʼakatal yuja it, ja sutjel, ja skʼuljel grabar, sok spukjel juʼunik bʼa señas mixa xyiʼaj ixawik ma jabʼilik, kechanxtani jujuntik kʼakʼu. Chomajkil bʼa jitsan kʼumalik ja juʼunik lajanxa wa x-el soka bʼa tuk kʼumalik.

 Ilawik ja jasa yalawe jujuntik hermanoʼik bʼa mi xyabʼye kʼinal. Jun hermana sbʼiʼil Klízia yala: «¿Jas organisasyon jel xcham skʼujol sbʼaja ma mi xyabʼye kʼinali bʼa jach puestoxta oj yayile ja waʼelal bʼa Dyos? Bʼa sutanal ja luʼumi mini maʼ xbʼobʼ yakitik ja jasa wa xyakitik ja xchonabʼil ja Jyoba». Sok ja Vladimir yala: «Ja bideoʼik wa sjeʼaki ke ja Jyoba wa skisa ja matik mi xyabʼ kʼinali jastalni ja matik wa xyabʼyeʼi».

 Jitsan ja bʼa bideoʼik bʼa lenguaje bʼa señas wa xchʼika ja yaljel: «Ja juʼun it wa xpilxi bʼa yibʼanal ja luʼumi bʼa sjejel sbʼaja Biblia sok wa xbʼobʼ kʼulaxuk soka takʼin wa xyaʼawe sok spetsanil skʼujole ja kristyano». Wa xkaʼatikon tsʼakatal sok spetsanil jkʼujoltikon yuja donasyon waxa waʼawexi, jitsan ekʼele ti bʼa donate.pr418.com. Soka it wa xbʼobʼ axuk eluk Bibliaʼik sok tuk koltajelik bʼa skʼulajel estudiar sbʼa yibʼanal ja kristyanoʼik, bʼa ti chikan ja matik wa xyawe makunuk ja lenguaje bʼa señas.