Ja asamblea b’a oxe k’ak’u b’a 2020 jelni chaʼanyabʼal waji: Jani ja sbʼajtanil ekʼele kʼulxi grabar ja junxta programa bʼa sutanal ja luʼumi sok kʼe bʼa Internet. Pe ja kermanotik sok kermanatik ja bʼa Malawi sok ja bʼa Mozambique, yaweni el slekilal ja asamblea bʼa mi yawe makunuk ja Internet. ¿Jastal bʼobʼ ja it?

 Ja Tsome Olomalik bʼa Koltanel sok ja bʼa Sjejel yiʼoj ja Tsome Tojwanum, yalawe oj bʼobʼ kʼelxuk ja asamblea bʼa oxe kʼakʼu jach bʼa telebisyon sok bʼa radyo ja bʼa Malawi sok ja bʼa Mozambique. ¿Jas yuj kʼulaxi ja it? Ja Malawi jani ja lugar bʼa mas jel karo stupjel ja Internet, ja yuj, jelni tʼusan ja testigoʼik ja bʼa país jaw ayiʼoje internet. Ja William Chumbi, Olomal bʼa Naʼits Betel bʼa Malawi wa xcholo: «Ja radyo sok ja telebisyon jaʼitani wa xbʼobʼ makunuk bʼa yajel ekʼyile ja waʼelalik bʼa Dyos ja hermanoʼiki». Ja Luka sok ja Sibeko bʼa cha kʼotele Olomalik bʼa Naʼits Betel bʼa Malawi, cha wa xyalawe: «Mokxta jaʼuk ja radyo sok ja telebisyon, jel tʼusan ja hermanoʼik ja bʼa jterritoriotikon yama yuj ja Betel oj yawe el slekilal ja asamblea». Cha jachni junxta wan ekʼel ja bʼa Mozambique, jelni tʼusan ja hermanoʼik wa xbʼobʼ sman-e aparatoʼik bʼa lek, jaʼuktoma oj skʼuluke kontratar internet.

 Yuja chamel wa spuku sbʼaj ja COVID-19, ay jujuntik radyoʼik sok telebisyon wanexa yajel ekʼuk ja reunionik wa xkʼulantik ja bʼa kongregasyon. a Ja kermanotik skʼanaweyi mas oraʼik ja radyoʼik bʼa oj bʼobʼ yawe ekʼuk ja asamblea bʼa oxe k’ak’u.

 Pe ja hermanoʼik ja b’a Malawi stʼaspune pilan wokol. Ja matik wa xya ekʼ jun programa ja bʼa radyo kechantani jun ora wa x-ajiyi bʼa oj ay ekʼuk. Yujni ja radyoʼiki wa xcham skʼujol bʼa jel oj axwuke smaklajel ta jel albʼel x-ekʼ ja programaʼiki. Pe ja hermanoʼik xcholowe yabʼ ke ja kaʼteltiki wa skoltay ja kristyano. Jun sjejel ja yajni mi xbʼobʼ elkotik ja bʼa jnajtiki, wani xbʼobʼ jkoltaytik ja kristyano bʼa oj smaklaye ja lekil rason bʼa Biblia, ja it oj koltajuke bʼa oj kʼotuke jun lekil kristyano sok ajyel yujile jun spamilya-e bʼa gusto. Yajni yabʼye ja jas xcholji yabʼyeʼi, skʼanaweni oj yaweyi mas oraʼik ja bʼa radyo ja hermanoʼiki.

 Ja bʼa Malawi, yawe ekʼ ja asamblea bʼa oxe kʼakʼu bʼa telebisyon sok bʼa radyo, bʼa kʼotni yabʼye miyonik kristyano ja bʼa paisi. Ja bʼa Mozambique, 85 radyoʼik sok june bʼa telebisyon yawe ekʼuk ja asamblea bʼa oxe kʼakʼu.

 Ja bʼa chabʼ país it, chʼakxi 28,227 b dolar bʼa yajel ekʼ ja asamblea bʼa oxe kʼakʼu bʼa telebisyon sok tʼusan mi 20,000 dólar chʼakxi jach bʼa radyo. Ja stsʼakol ja radyo bʼa axi ekʼuk ja asamblea tuktukilni waji 15 dolar ja bʼa radyoʼik mas nuxi sok $2,777 ja bʼa radyoʼik bʼa mas niwani.

 Jelni aʼtijiye ja hermanoʼik bʼa yajel makunuk lek ja donasyonik. Jun sjejel ja bʼa Malawi, sleʼawe ja radyoʼik bʼa mas koʼel oj stupe, bʼa ajiyile koʼuk junuk 30 por siento. Jachuk yiʼajetokan 1,711 dolar. Jujuntik radyoʼik ja bʼa Mozambique, yawe koʼuk ja stsʼakoli tsʼakatal ja Testigoʼik bʼa jel lek sjeʼa ja smodoʼe sok jel lek stupuwe.

 Ja hermanoʼik jelni yaʼawe tsʼakatal yuja bʼobʼ skʼele sok smaklaye ja programaʼik bʼa asamblea jach bʼa radyo sok bʼa telebisyon. Ja Patrick, jun ansyano bʼa Malawi, wa xyala: «Jel xkatikonyi tsʼakatal ja Tsome Tojwanum bʼa spetsanil ja jas skʼulunej bʼa keʼntikon ja bʼa yoj chamel wa spuku sbʼaji». Pilan hermano bʼa Malawi sbʼiʼil Isaac wa xyala: «Mey kiʼojtikon pilan aparatoʼik, ja yuj jel xkaʼatikon tsʼakatal yuja bʼobʼ jmaklaytikon ja asamblea bʼa oxe kʼakʼu jach bʼa radyo. Juni majtanal jel chaʼanyabʼal waj ja bʼa xchonabʼ ja Jyoba, tsʼakatal yuj ja it spetsanil ja jpamilya yawe el slekilal ja programa, jkʼuʼunejtikon lek ke ja Jyoba wa syajtay ja xchonabʼi.

 Jun choluman bʼa Mozambique ja sbʼajtanil ekʼele waj ja bʼa asamblea bʼa oxe kʼakʼu bʼa 2020. Ja yeʼn wa xyala: «Yiljel ja asamblea bʼa oxe kʼakʼu jach bʼa tele juljkʼujol bʼa Jyoba, juni Dyos jel ja yipi. Mini stima ja chamel wa spuku sbʼaj bʼa oj yakitik ja Jyoba ja jwaʼeltik man bʼa jnajtik. Kila jaman lek ke ja xchonabʼ ja Jyoba wani syajta sbʼaje. Jkʼuʼunejni lek bʼa jani it ja relijyon smeranili».

 Jun ansyano sbʼi’il Wyson wa xyala: «Wa xkʼana oj kayi stsʼakatal ja Moso bʼa jel toj yuja altantoxta ay bʼa keʼntikon ja bʼa yoj chamel wa spuku sbʼaji. Mey lek jtakʼintikon sok teytikon bʼa jun parte bʼa jel pobre ja bʼa sutanal ja luʼumi, pe tsʼakatal yuj bʼobʼ ajyukujtikon ja asamblea jach bʼa radyo sok bʼa telebisyon, bʼobʼni kabʼtikon stsamalil sok katikon el slekilal».

 Ja Tsome Olomalik bʼa Koltanel sok ja bʼa Sjejel cha yalawe ni oj cha yawe ekʼuk jach bʼa telebisyon sok bʼa radyo ja asamblea bʼa oxe kʼakʼu ja bʼa 2021 bʼa jujuntik lugar. ¿Jastal wa xtupxi ja gastoʼik it? Jani tsʼakatal sok ja donasyonik wa x-axi sbʼaja aʼtel bʼa xcholjeli, ja bʼa tuktukil modo wa xtax ja bʼa donate.pr418.com. Tsʼakatal yuja waxa waʼawex jawa donasyonexi.