Ja testigoʼik bʼa Jyoba wa skʼulane aʼtelik ja bʼa srelijyone sok wa skoltaye ja tuk bʼa mas ja 200 paisik sok lugarik. Pe kechan 35 ja bʼa paisik it wa xkʼot sbʼaje lek donasyon wa xyaʼawe ja hermanoʼik bʼa stupjel ja gastoʼik yiʼojeʼi. Anto, ¿jasa wa x-ekʼ soka lugarik mas pobre?

 Ja Tsome Tojwanum bʼa testigoʼik bʼa Jyoba wa spaklaye ja yaʼtele soka jastal wane yaʼteltajel ja Dyos bʼa spetsanil ja luʼumkʼinal ja Testigoʼiki. Ja takʼin wa xkʼot sbʼajeʼi wani xkʼelxi lek jastal oj makunuk. Ta jun naʼits Betel mas wa xkʼot sbʼaj ja takʼin wa x-axi, ja janekʼto wa xkani wa xjekxiyi ja tuk naʼits Betel wa skʼulanyuj palta. Ja it wani kʼulaxel snochjel ja sjejel yaʼawekan ja bʼajtan nochumanik bʼa Kristo. Ja yeʼnle wa xyawe makunuk ja janekʼto wa xkani bʼa skoltajel ja tuk nochumaniki ja matik jel tʼusan yiʼoji, sok bʼa jachuk «junxta yabʼalil oj ajyuk» (2 Corintios 8:14).

 ¿Jastal wa xyabʼye ja hermanoʼik yajni wa x-ajiyile ja takʼin wa xkanyuj ja tuk naʼits Betel? Ja bʼa Tanzania, jun ita sjejel, mas ja snalan ja país kechan wa x-ajyiyujile chabʼ dólar ja bʼa kʼakʼu, jani ja takʼin axi makunuk bʼa stojbʼesel mas ja Naʼits bʼa Tsomjelal ja bʼa kongregasyon bʼa Mafinga. Ja hermanoʼik ja bʼa kongregasyon it yalawe: «Man kʼe tojbʼexuk ja naʼits bʼa tsomjel, jitsanxa lek ja maʼ wa xjaki. Jel xkatikonyi tsʼakatal ja xchonabʼ ja Jyoba sok ja jpamilyatikon bʼa yibʼanal ja luʼumi ja jastal jel jaman skʼujole. Ja wego ayxa kiʼojtikon jun lugar tsamal bʼa wa xtoyotikon ja Jyoba».

 Yuja chamel COVID-19, jujuntik hermanoʼik ja bʼa Sri Lanka mini ayiʼoje mas waʼelal. Tini ay ja hermana Imara Fernando soka yal skerem Enosh. Pe stsʼakatal ja donasyonik bʼa tuktukil paisik, ajiyi ja koltajel wa skʼana. Wegoxta stsʼijbʼane jun yal tarjeta: «Wa xkatikon yile tsʼakatal ja hermanoʼik bʼa wa sjeʼa syajal skʼujol jmoktikon ja bʼa tyempoʼik it jel wokoli. Jelni gusto aytikon yuja kʼotelotikon spamilyaʼe sok wantikon yajelyi orasyon ja Jyoba akoltajuke spetsanil hermanoʼik ja bʼa tsaʼanikxta kʼakʼu it».

 Chikan bʼa wa xtaxye ekʼ ja kermanotik, spetsanile jel gusto wa skʼepawe ja jas yiʼojeʼi. Jun sjejel, ja Enosh, skʼulan jun yal skaja bʼa donasyon bʼa jachuk oj ya ja sdonasyon sok oj skoltay ja pamilyaʼik matik jel tʼusan yiʼoji. Ja Guadalupe Álvarez, ja yeʼn jel jaman skʼujol. Ja yeʼn tey bʼa jun parte ja bʼa México bʼa tʼusan mi yibʼanaluk ja kristyano mi jel xkoltajiye tikʼan yuja gobyerno sok jelni tʼusan wa skʼulane ganar. Ja yeʼn wani skʼulan ja janekʼ oj bʼobʼyuj bʼa oj koltanuk. Ja Guadalupe wa xyala: «Jel xkayi tsʼakatal ja Jyoba yuja syajal skʼujol sok yuja lekil skʼujoli. Wa xnaʼa ke ja jdonasyoniki soka bʼa tuk, jelni oj koltajuk yujile ja hermanoʼik matik wan ekʼel sbʼaje wokolik».

 Ja naʼits Betel bʼa wa sjekawe takʼin jelni gustoʼaye yuja wa xbʼobʼ skʼulukeʼi. Ja Anthony Carvalho, Olomal ja bʼa naʼits Betel bʼa Brasil, wa xyala: «Bʼa jitsan jabʼil, ja tuk naʼits Betel tʼilani skoltayotikon sok takʼin. Stsʼakatal soka koltanel it, jelni jitsanbʼel ja aʼteli. Ja jastal wala taxtikon ja wego tukbʼelxa sok ayni kiʼojtikon ja cholal bʼa skoltajel ja tuk. Ja hermanoʼik wani xyilawe ja xcholjel jastal jun aʼtel bʼa sutanal ja luʼumi sok wani snaʼawe ojni bʼobʼ koltanuke, jastal lekil snochumane Kristo».

 ¿Jastal wa xbʼobʼ skoltaye ja testigoʼik bʼa Jyoba ja yermanoʼe wan ekʼel sbʼaje wokoli? Masni lek oj yaʼe ja sdonasyone sbʼaja kaʼteltik wa xkʼulantik bʼa yibʼanal ja luʼumi sok mi oj sjeke ja takʼin bʼa Betelik bʼa tuk país. Ojni bʼobʼ axuk donasyonik ja bʼa yal kaja bʼa kongregasyon bʼa wa xyala «Kaja bʼa aʼtel bʼa xcholjeli» ma bʼa donate.pr418.com. Spetsanil jawa donasyonexi jelni chaʼanyabʼalil.