JA JASTAL WA XKATIKON MAKUNUK JA DONASYONIK
Ja misioneroʼik wa xkʼotye «b’a yibʼanal ja luʼumi»
1 B’A JUNIO B’A 2021
Ja Jesús yalayab’ ja snebʼumaniki: «Oj kʼotanik jtestigoʼik [...] bʼa yibʼanal ja luʼumi» (Hechos 1:8). Ja testigoʼik bʼa Jyoba gustoxta wa skʼujolane skʼulajel ja aʼtel it. Anima jachuk, mini bʼobʼeluk jcholtikon bʼa jujuntik lugarik ja bʼa Luʼumi, jun sjejel, ja bʼa chonabʼik jel niwak sok bʼa jel ja swinkili. Chomajkil, bʼa jujuntik paisik mini ay lek Testigoʼik (Mateo 9:37, 38). ¿Jas wantikon skʼulajel bʼa oj jcholtikonyabʼ mas kristyanoʼik?
Bʼa skʼulajel ja mandar yaʼa ja Jesús, ja Tsome Olomalik bʼa Xcholjel bʼa Tsome Tojwanuk bʼa Testigoʼik bʼa Jyoba wa sjeka misioneroʼik ja bʼa lugarik wa xkʼanxi mas koltanel. Ja bʼa jtyempotik ay 3,090 misionero bʼa wane aʼtel bʼa sutanal ja luʼumi. a Tʼusan mi yibʼanaluk yiʼoj xchapjelale bʼa jujuntik eskuela, jastal ja Eskuela bʼa Cholumanik sbʼaja sGobyerno ja Dyosi. Ja misioneroʼik it puestoni ajyele bʼa yajelkan ja snaje sok wajel bʼa pilan país. Ja jastal takʼane, ja jastal chapane, sok ja yexperienciaʼe koltanele bʼa xcholjel ja lekil rasoni sok yaʼuneje jun lekil sjejel sbʼaja ja yajkʼachil nebʼumaniki.
Missionaries help preach the good news where there is a great need for Witnesses
Yajni wa xkoltaytik ja misioneroʼik cha wa xkoltaytik ja tuk
Bʼa kada betel, ja Tsome bʼa wa skʼela ja Matik tey bʼa Campo bʼa Departamento maʼ wa skʼela ja xcholjel wa x-aʼtijisok ja Olomalik bʼa Naʼits Betel bʼa oj yayi ja jas wa xmakuniyuj ja misioneroʼik. Wa skoltaye sok jun lugar bʼa oj jijluke, ja yajni wa xkoye chamel, sok tʼusan sgastoʼe bʼa oj sleʼe ja jas tʼilan wa xmakuniyujile. Snajtil ja jabʼil bʼa kaʼteltik bʼa 2020, ja testigoʼotik bʼa Jyoba jchʼakunejtik mojan 27 miyon dólar sbʼaja misioneroʼiki. Stsʼakatal ja koltanel it, ja misioneroʼik wani xbʼobʼ waj lek skʼujole ja xcholjel sok stsatsankʼujolajel ja kongregasyoniki.
Missionaries help strengthen congregations
¿Jastal wa xkoltaniye ja misioneroʼik bʼa wane aʼtel bʼa campo ja bʼa xcholjeli? Ja Frank Madsen, june ja bʼa Olomalik bʼa Naʼits Betel bʼa Malaui, wa xcholo: «Ja jastal mi xiwye, sok jas wa snaʼawe, ja misioneroʼik skoltuneje ja kongregasyonik bʼa oj kʼe xchole ja bʼa territorioʼik jel wokoli, jastal ja bʼa komonik mi maʼ wa xbʼobʼ x-och lek sok ja bʼa lugarik wa xkʼumaniye pilan kʼumal. Chomajkil, yajni wa xyilawe ja janekʼto wa skʼujolane bʼa oj snebʼe ja cultura sok ja kʼumal ja bʼa lugari wani xyaʼawe jun lekil sjejel sbʼaja tuk. Ja yuj cha wani stsatsankʼujolane ja keremtik akʼixuk bʼa oj aʼtijuke bʼa tyempo tsʼikan. Tʼilani jel oj katikyi tsʼakatal ja Jyoba yuja misioneroʼiki».
Jun Olomal bʼa Naʼits Betel bʼa pilan país wa xyala: «Ja misioneroʼik juni lekil sjejel ke ja testigoʼotik bʼa Jyoba kʼotelotik jun chonabʼ bʼa tuktukil paisik sok tsoman aytik. Asta ja matik mi Testigoʼuke wa xyaʼa sbʼaje kuenta ke anima tuk ja jculturatik mini wa spilawotik. Ja jasa wa xnebʼatik bʼa Biblia jani wa xyaʼakan bʼa oj kʼotkotik jun niwan pamilya».
¿Jastal wa skoltayotik ja misioneroʼik ja matik kʼotelotik cholumani? Ja Paulo, bʼa Timor Oriental, jel xyaʼa tsʼakatal ja aʼtel wa skʼulane ja misioneroʼik ja bʼa kongregasyonik. Ja yeʼn wa xcholo: «Teytikon bʼa jun lugar bʼa jel ja kʼaʼuji. Anima ja misioneroʼik ti jakele bʼa jun lugar mas cheʼej, mini wa xyawekan bʼa oj timjuke yuja kʼaʼuji. Mini skʼulane palta ja bʼa tsomjelik bʼa elel xcholjel ja bʼa saʼan sakbʼeli, sok jitsan ekʼele wa xkan skʼuluke rebisitaʼik man nalan kʼakʼu, yajni jel yaj ja kʼaʼuji. Cha wantoni x-elye xcholjel ja bʼa ochkʼakʼuji. Jel skoltuneje kristyanoʼik bʼa oj snaʼe ja smeranili bʼa tini chʼikanon ja keʼn. Gustoxtani yaʼunejeyi ja sakʼanile ja Jyoba, sok ja jaw wa snika ja kongregasyon bʼa oj skʼujoluke yaʼteltajel mas ja Jyoba».
Ja Ketti, jun precursora regular b’a Malaui, wa xcholo jastal jun nupanum b’a misionero’e skoltay ja spamilya: «Yajni jekjiye ja bʼa jkongregasyontikon kechantani keʼna ja bʼa jpamilya ja Testigoʼoni. Ja yeʼnle jelni skoltayone sok kʼotyeni lekil yamigoʼik ja jpamilya. Ja kuntikili snebʼawe bʼa yeʼnle ke ja yaʼteltajel ja Jyoba wani xyaʼa meran gustoʼil. Stsʼakatal soka lekil sjejel yaweʼi, ja oxwane kakʼixi kʼotele precursoraʼik regular sok ja jtatami kʼeta wajuk ja bʼa reunioniki».
¿Bʼa wa x-el ja takʼin wa xmakuniyujile ja misioneroʼik bʼa wa xkoltaniye ja bʼa campo? Ti bʼa donasyonik bʼa wa x-axi makunuk ja bʼa aʼtel bʼa yibʼanal ja luʼumi. Jitsan ja bʼa it ti wa xkʼulaxi bʼa donate.pr418.com. Tsʼakatalex yuja jel jamana kʼujolexi.
a Ja misioneroʼik it ti wa xjekjiye bʼa kongregasyonik bʼa wa xkʼanji mas koltanel ja bʼa xcholjeli. Chomajkil, ay 1,001 misioneroʼik bʼa wane koltanel ja bʼa aʼtel bʼa circuito.