Mas ja 60% ja b’a equipo b’a tolabida wane sutjeli tini wane a’tel b’a opisinaʼik bʼa sutjel bʼa mero wa xkʼumaniye, sok mi tiʼuk bʼa Betel. ¿Jastik slekilal yiʼoj ja it? ¿Jastik wa xmakuniyujile ja sutumanik ja bʼa naʼitsik bʼa sutjeli? ¿Jas yuj ja naʼitsik bʼa sutjel wa xkoltani bʼa oj tojbʼuk ja jastal wa sutxi?

 Stsʼakatal ja naʼitsik bʼa sutjeli, ja sutumaniki wanxani xbʼobʼ ajyuke ja bʼa lugar wa xkʼumaniye ja skʼumale. Ja Karin, bʼa wa xkʼumani bajo alemán wa xcholo: «Man yajni jekjitikon ja bʼa naʼits bʼa sutjel bʼa Cuauhtémoc, bʼa Chihuahua (México), tolanibida wala kʼumanitikon bajo alemán. Mini kechanuk soka sutumaniki ma ja bʼa xcholjeli; cha jachni ja wala wajtikon manbʼanel. Tolabida ja wantikon kʼumal ja jkʼumaltikoni. Wa xkabʼtikon yaljelik bʼa ayxa kʼakʼu mi bʼa kabʼunejtikon. Ja wego wanxani xnaʼatikon jastal mero wa xkʼumaniye ja kristyanoʼiki».

 Ja James, ti sbʼaj bʼa Ghana sok jani wan aʼtel sok ja equipo bʼa sutjel bʼa Frafra. Ja yeʼn wa xyala ke ayni ekʼele wa snaʼa ja pamilya Betel. Pe cha wa xyala: «Jelni xkʼulan gusto ajyel ja bʼa naʼits bʼa sutjel. Xcholjel ja bʼa mero jkʼumali sok yiljel jastal wa xyabʼ ja kristyanoʼik ja lekil rasoni jelni snikawon».

 ¿Jastal wa stsaxi ja lugarik bʼa yajel kʼe naʼits bʼa sutjel? Ja Joseph, bʼa wan koltanel ja bʼa Departamento bʼa xChapjel sok Skʼulajel Naʼitsik bʼa Sutanal ja Luʼumi bʼa Warwick (Nueva York), wa xcholo: «Jun wokol wa xtʼaspuntikon jani yuja bʼa jujuntik lugar mini ay jaʼ sok lus, sok ja internet mini xyaʼakan bʼa oj axuk koʼ archiboʼik bʼa sutjel. Ja yuj bʼajtanto oj jtsatikon bʼa yajel kʼe jun naʼits bʼa sutjel, wani xleʼatikon lugarik bʼa mero wa xkʼumaniye».

 Ja jas mas wego sok mi jel chaʼanuk stsʼakol, jani yajel kʼeʼuk jun naʼits bʼa sutjel, bʼa jun naʼits wa x-ajyi asambleaʼik, bʼa jun naʼits bʼa tsomjelal ma bʼa jun naʼits wa x-ajyi misioneroʼik bʼa wa xbʼobʼ wajuke ja sutumaniki. Ta mini june kiʼojtik ja it, ja hermanoʼiki ojni bʼobʼ skʼan-e permisoʼik bʼa oj sman-e naʼitsik sok lugarik bʼa oj ajyuk opisinaʼik sok bʼa ti oj bʼobʼ ajyuke sok oj bʼobʼ aʼtijuke ja sutumaniki. Ta tukbʼi ja jas wa xmakuniyujile ja sutumaniki, ja naʼitsik it wegoni wa xbʼobʼ chonxuk sok ja takʼini wani xbʼobʼ axuk makunuk ja bʼa wa xkʼanxi.

 Snajtil ja jabʼil 2020 ja bʼa kaʼteltiki chʼakxi 13 miyon dólar bʼa stalnajel ja naʼitsik bʼa sutjeli. Ja equipoʼik bʼa sutjel wa xmakuniyujile computadoraʼik, programaʼik bʼa jel chapan, equipoʼik bʼa skʼulajel grabar audioʼik, Internet sok tuk jastik wa xmakuni. Jun sjejel, wa xmakuni 750 dólar bʼa smanjel jun computadora sok yajelkan chapan sok programaʼik bʼa jel xmakuni. Chomajkil, ja sutumaniki wa xmakuniyujile ja programa Watchtower Translation System, bʼa wa xkoltajiye xchapjel sok stojbʼesel ja yaʼtele bʼa oj ajyukyujile ja jas wa xmakuniyujile bʼa sutjel.

 Ja sutumaniki cha wani x-ajiyile computadoraʼik bʼa oj skʼuluke grabar audio ja bʼa yopisinaʼe. Ja computadoraʼik it jelni tʼilan waj ja yajni kʼe ja COVID-19, yujni jitsan sutumanik bʼobʼ yiʼe bʼa snaje sok jachuk oj bʼobʼ skʼuluke grabar ja jas wa sutuwe ja bʼa juʼunuk sok bideoʼik.

 Ayni hermanoʼik ja bʼa lugari wa xkoltaniye skʼulajel rebisar ja jas sutubʼal sok wa xkoltaniye bʼa yajel ajyuk sak ja naʼitsik bʼa sutjeli. Ja Cirstin, bʼa wan aʼtel ja bʼa naʼits bʼa sutjel ja bʼa afrikáans Ciudad del Cabo (Sudáfrica) wa xyala: «Jitsan cholumanik sok precursorik regular ayiʼoje ja cholal bʼa yajel makunuk ja jas wa snaʼawe bʼa oj koltanuke il».

 Ja hermanoʼik it jelni xyabʼye tsamalil. Jun sjejel, jun hermana wa xyala ke koltanel bʼa jun naʼits bʼa sutjel «jelni xlikiki juntiro». Jujuntik hermanoʼik ja bʼa lugari wani xkoltaniye bʼa skʼulajel grabar. Ja Juana, jun sutuman ja bʼa kʼumal totonaco ja bʼa estado bʼa Veracruz (México), wa xyala: «Ja wego yuja mas mojanxa aytikon ja bʼa lugar wa xkʼumaniye ja jkʼumaltikoni, masxani pasil ke ja hermanoʼik oj jak skʼuluke grabar sbʼaja juʼuniki sok ja bideoʼiki».

 Pe ¿wan ma’ xkoltani meran lek ja naʼitsik bʼa sutjel bʼa oj tojbʼuk ja jastal wa sutxi? Jitsan miyonik kʼumumanik wa xyalawe ke waniʼa. Ja Cédric, bʼa ti wa x-aʼtiji ja bʼa equipo bʼa sutjel bʼa Congo ja bʼa República Democrática del Congo, wa xyala: «Jujuntik hermanoʼik wa xyalawe ke wantikon sutjel ja congo ‹bʼa Watch Tower›, yujni mini tʼun slaja sbʼaja jastal wa xkʼumaniyeʼi. Pe ja wego wa xyalawe ke wantikon sutjel ja jastalni mero wa xkʼumaniyeʼi, yujni jach wa xkʼumaniye kada kʼakʼu».

 Ja Andile, bʼa wa sutu ja kʼumal xhosa wa xyala ke cha jachni junxta wa x-ekʼ ja bʼa Sudáfrica: «Jitsan yiluneje ke ja sutjeli tukbʼelxa. Asta jujuntik yal untik jawa skʼumane Ja Juʼun Cholumani bʼa inglés ja wego jaxani wa skʼumane ja xhosa. Sok jelni xyiʼaje gusto Ja Biblia: ja Yabʼal ja Dyos sbʼaja matik oj ajyuk sakʼan ja bʼa Yajkʼachil Luʼumi yujni mas wa xyabʼye stojol».

 Ja jastik wa xchʼakxi bʼa stojbʼesel sok stalnajel bʼa lek oj ajyuk ja naʼits sok ja matik teye tini wa x-el ja bʼa jdonasyontik wa x-axi bʼa sutanal ja luʼum, bʼa tini cha chʼikan wa x-axi bʼa donate.pr418.com.