Bʼa snajtil ja jabʼil 2021, a ja COVID-19 jelni ya wokolanuk ja luʼumkʼinali. Jastalni cholxi ja bʼa artikulo «Koltanel sbʼaja chamel wa spuku sbʼaj ja bʼa luʼumkʼinali», jchʼakunejtik jitsan miyon dolarik b bʼa oj jkoltay jbʼajtik, sok kʼulaxel mas ja 950 Tsome Olomalik bʼa Koltanel.

 Yajni ja chamel wa spuku sbʼaj wan yajel yiʼ wokol ja kristyanoʼiki, cha ajyini tuk desgrasyaʼik bʼa kʼajyelni wa x-ekʼi ma ayni yeʼn wa xya ekʼuk ja winiki, cha jelni ya wokolanuk ja kermanotiki. Ja yuj ja Tsome Olomalik bʼa Koltanel bʼa Tsome Tojwanum yaʼa permiso bʼa oj axuk makunuk 8 miyon dolarik bʼa stʼaspujel 200 ja bʼa wokolik jaw sok mini kechanuk ja janekʼ pilubʼal bʼa oj koltanuke ajyi ja bʼa chamel wa spuku sbʼaji La kiltik jastal wa x-axi makunuk ja donasyonik jaw bʼa chabʼe ja bʼa desgrasyaʼik ajkʼachto ekʼeli.

 Ja 22 bʼa mayo bʼa 2021, ja volcán Nyiragongo, ja bʼa República Democrática del Congo, och bʼojtuk. Ja slabaʼili xchʼaya snajel naʼitsik, eskuelaʼik sok ja bʼa wa xyawe eluk jaʼi. Pe mini kechanuk ekʼ ja jaw. bʼa jitsan kʼakʼujik, ja volcáni ya eluk polboʼik bʼa wa xbʼobʼ milwanuk sok ti koʼ bʼa chonabʼ Goma sok jitsan ekʼele och kʼitkʼunuk ja luʼumi. Tʼusan mi yibʼanaluke ja swinkil ja lugari aji eluke. Sok jitsan mil kristyanoʼik spakawe ajnel sok asta jujuntik kʼotye man Ruanda.

 Ja bʼa matik elyeʼi, ajyi mas ja 5.000 testigoʼik bʼa Jyoba. Jujuntik xchʼayawe ja snaje yuja volcani, jaxa tuki elkʼajiyile ja yajni mixa ti ayuke tiwi. Ja Olomalik bʼa Koltanel bʼa Ruanda sok bʼa República Democrática del Congo skoltay sbʼaje. Ja Betel bʼa Congo wa xyala kabʼtik ke june ja bʼa tsome olomaliki: «Bʼajtanto ke oj aljuk yabʼye ke oj eluke, ja Tsome Olomalik bʼa Koltanel jaw kʼe spile waʼelalik, jaʼ, mantaʼik, sabanaʼik sok kʼuʼalik, ama ja chonabʼi jelni jomel kanel juntiro». Bʼa jun chonabʼ bʼa kʼotye mas ja 2,000 hermanoʼik, jun Tsome Olomalik bʼa Koltanel yawe kʼe yal naʼitsik, yaʼa cubrebocaʼik sok xcholo yabʼye jastal oj stalnay sbʼaje bʼa mi oj ya ekʼ sbʼaje ja COVID-19 sok ja cólera.

 Bʼa oxe ixaw, ja kermanotiki spilawe mas ja 6 tonelada bʼa arroz, 6 tonelada bʼa harina de maíz, mas ja 8,000 litro bʼa aseyte bʼa stojbʼesel waʼelal sok mas ja 8.000 litro jaʼ. Bʼa mi jel oj chʼakxuk takʼin, ja Beteli bʼobʼ sman jitsan lek waʼelal ja bʼa negosyoʼik bʼa lugari sok mi smanawe bʼa pilan lugarik.

 Jun hermana wa xyala: «Jelni wantikon yijel wokol ajyi». Ja volcani xchʼaya snajel ja yajkʼachil snajeʼi, pe tsaʼan ja yeʼn soka spamilya koltajiye ja bʼa jastal ay wa xyabʼ ayeʼi sok ja bʼa jastal wa xyila sbʼaje soka Dyosi. Ja wego wa xyala: «Stsʼakatal ja Jyoba, ay kiʼojtikon ja jas wa xmakunikujtikoni. Kilunejtikon jastal wegoxta wa xkoltani ja Jyoba bʼa oj kuchkujtik ja jwokoltiki sok bʼa mi jel wokoluk oj kabʼtik».

 Ja Venezuela jitsanxani jabʼil wane wokolanel yuj takʼin. Mixani ay lek waʼelal sok ipaxitaʼel ja mal smodoʼe ja kristyanoʼiki. Jelni wokol ja sakʼanile ja kermanotiki. Pe mini chʼayeluk skʼujol bʼa yeʼnle ja xchonabʼil ja Jyoba.

 Ja bʼa tsaʼanxta jabʼil bʼa kaʼteltiki chʼakxi mas ja jun miyon sok snalan bʼa dolarik bʼa smanjel waʼelalik sok jabón, sok yijel ochyile ja pamilyaʼik bʼa mas wa xmakuniyujileʼi. Ja Betel bʼa Venezuela wa xyala: «Mini tʼun pasiluk sjekjel kada ixaw 130 toneladaʼik waʼelal ja bʼa kada lugarik bʼa paisi sok yijel ochyile ja hermanoʼik wa xmakuni yujileʼi». Bʼa jachuk mi oj jomuk ja waʼelaliki, ja hermanoʼiki wa sjekawe jastik junuk bʼa mi xjomi. Ja Beteli wa xyala: «Wani xmanatikon tʼusan mi yibʼanaluk ja waʼelalik ja yajni wa xyawe eluki, jitsan lek sok yajni masto koʼel tsʼakoli. Sok wani xchʼak jektikon bʼa jun modo mi jel karoʼuk oj eluk».

 Ja Leonel, yeʼnani kʼotel june ja bʼa Tsome Olomalik bʼa Koltanel bʼa Venezuela, sok jelni skʼulan gusto ja cholal yiʼoji. Ja yeʼn wa xyala: «Ajyel ja bʼa aʼtel bʼa koltanel jel chaʼanyabʼal bʼa keʼna. Skoltunejon bʼa mi jel triste oj ajyukon masan yajni cham ja jcheʼum yuja COVID-19. Chomajkil, jelni makan ajyelon sok wa xkabʼ wani xbʼobʼ jkoltay ja hermanoʼik bʼa wa skʼana skoltajeleʼi. Kilunej keʼn mismo ke ja Jyoba wani xya kʼotuk ja jas skʼapunej bʼa mini oj sjipkan ja xchonabʼi».

 Ila ja jas wa xcholo jun hermano ke aʼtiji ja bʼa tsome olomalik bʼa koltanel ja bʼa tyempo ekʼtaʼi wa xyala: «Ja wego keʼnxani ja maʼ wa skʼana skoltajeli. Mini kechan yawekitikon jastik junuk ja hermanoʼiki. Ja yeʼnleʼi cha skoltayoni ja keʼn soka jcheʼumi bʼa mi oj xiwkotikon, yaʼawe kulan jkʼujoltikon, stalnayotikon sok stsatsankʼujolanotikon».

 Jujuntik desgrasyaʼik mini wa xmajlaxi oj ekʼuk. Ama jachuk, ja xchonabʼil ja Dyosi wani xbʼobʼ staʼ sok wa xbʼobʼ skʼep jastik junuk stsʼakatal yuja wa donasyonex waxa wawex sbʼaja kaʼteltik bʼa sutanal ja luʼumi. Ja bʼa donate.pr418.com. Wani xbʼobʼa taʼex jastal wa xbʼobʼa waʼex donasyonik. ¡Jelni xkaʼatikon tsʼakatal yuja jel jamana kʼujolexi!