«Lajansok mey skʼuʼajel ajyelkujtik ja waʼelal bʼa Dyos jach bʼa aparatoʼik». ¿Jach maʼ wa xcha pensaran? Ja yaljelik it jaʼ yala ja hermano Geoffrey Jackson ja bʼa Imporme 6 bʼa Tsome Tojwanum bʼa jabʼil 2020. Sok cha yala: «Pe lek wan xa jobʼo abʼaj jas maʼ jun oj jkʼuluktik ja bʼa yojol ja chamel it lek mey ja yamkʼabʼal jastal ja JW Library. Ja Jyoba ayxani jabʼil wan xchapjeljan ja bʼa wokolik jastal it».

 ¿Jastal xchapunejotikjan ja Jyoba? ¿Jasa makuni bʼa stojbʼesel ja aplikasyon JW Library? ¿Sok jasa wa xmakuni bʼa oj kʼulaxuk actualizar sok stojbʼesel mas?

 Ja bʼa mayo bʼa 2013, ja Tsome Tojwanum yayi xchol ja Programación bʼa MEPS, jun departamento ja bʼa yechalil wa xkʼelxi ja kaʼteltiki, bʼa a-stojbʼes jun aplikasyon bʼa tey yiʼoj ja Traducción del Nuevo Mundo. Ja Paul Willies, bʼa ti wan aʼtel bʼa departamento it, yala: «Mini bʼa kaʼunejtikon el jun aplikasyon ja bʼa tiendaʼik bʼa aplikasyoni. Bʼa stojbʼesel, tʼilan katikon kʼot tekʼan jujuntik proyectoʼik, slejel jun equipo sok aʼtelsok tuk departamentoʼik ja bʼa Betel. Jel katikonyi orasyon, sok kilatikon ja skoltanel ja Jyoba: joʼe ixaw tsaʼan, ja aplikasyoni jexi ja bʼa tsomjelal jel chaʼanyabʼalil wa xkʼulaxi jabʼil jabʼil».

 Pe ajyi pilan wokol: yajel paxuk ja JW Library jun niwan biblioteca, bʼa oj ajyuk mas juʼunik sok bʼa jitsan kʼumal. Ja bʼa enero bʼa 2015, ja aplikasyon ayxa yiʼoj tʼusan mi yibʼanaluk ja juʼunik ja bʼa inglés, sok wake ixaw tsaʼan, wanxa xbʼobʼ axuk koʼuk juʼunik bʼa jitsan kʼumal.

 Ja hermanoʼiki waneni stojbʼesel mas ja aplikasyon bʼa jitsan modoʼik. Jun sjejel, xchʼikuneje bideoʼik sok jun entrada bʼa ayiʼojan yibʼanal ja jas wa xmakunikujtik bʼa xchapjel ja reunioni. Chomajkil, ja bʼa Biblia wanxani xbʼobʼ ilxuk ja referenciaʼik ja bʼa Juʼun bʼa koltanel spaklajel.

 Kada ixaw, mas ja 15 miyon aparatoʼik wa sjama ja JW Library. Sbʼaja it, 8 miyon wa skʼulan kada kʼakʼu. ¿Jasa wa skʼana bʼa jachuk ja aplikasyon oj aʼtijuk sok jitsan aparatoʼik? Ja Paul Willies wa xcholo: «Ja it juni aʼtel bʼa mi oj chʼak skʼulajel. Tolabida wantikon xchʼikjel yajkʼachil modoʼik sok slejel modo ke ja aplikasyon it mas pasil yajel makunuk kada ekʼele. Yuja xchijnakʼ ja aparatoʼiki tikʼanxta wa skʼulan actualizar, tʼilani wa xkilatikon bʼa jachuk ja aplikasyon oj sjam ja bʼa aparatoʼik tsaʼanxta kʼulaxi actualizari. Sok yuja kada ekʼele ay mas grabasyonik sok juʼunik ja bʼa JW Library, tʼilani wa xkʼulantikon actualizar ja software kiʼojtikoni sok yajel ajyuk lek». Ja wego, ja bʼa JW Library ay 200,000 juʼunik sok mas ja 600,000 grabasyonik sok bideo bʼa tuktukil kʼumal.

 Bʼa yajel ajyuk lek ja aplikasyon it, mi kechan wa xmakuni programaʼik bʼa aparatoʼik. Cha tʼilani wa xmanxi licenciaʼik bʼa software. Sok jun ita licencia wa xtupxi 1,500 dólar ja jabʼili. Chomajkil, ja Departamento bʼa Programación bʼa MEPS wa stupu junuk 10,000 dólar ja jabʼili yuj aparatoʼik bʼa tuktukil markaʼik bʼa jachuk ja aplikasyon it oj aʼtijuk lek ja bʼa computadoraʼik, tabletaʼik sok teleponoʼik bʼa masto ajkʼach.

 Stsʼakatal ja JW Library, mixa xchʼakxi jitsan takʼin bʼa skʼulajel imprimir, skʼulajel libroʼik sok sjekjel juʼunik. Jun sjejel, la kiltik ja jas ekʼ soka poyeto La jpaklaytik ja teksto bʼa kʼakʼu. Ja poyeto bʼa 2013, kʼulaxi imprimir 12 miyon. Pe ja bʼa 2020, kechanxta kʼulaxi imprimir joʼe miyon ama ay junuk 700,000 cholumanik mas ja bʼa luʼumi. ¿Jasa ekʼi? Ke ja wego jitsan ja bʼa kermanotiki tixa wa skʼumane ja teksto bʼa kʼakʼu bʼa JW Library. a

 Ja JW Library wani xbʼobʼ makunukawuj bʼa jitsan modo. Jun sjejel, ja Geneviève, bʼa tey bʼa Canadá, wani skʼuʼan ke ja aplikasyon koltubʼalyuj bʼa masxa oj yayi estudio. Ja yeʼn wa xyala: «Ja smeranili, lekbʼi oj ka eluk jun latse libroʼik bʼa oj kʼul estudiar, mini oj bʼobʼ jkʼuluk kada saʼan sakbʼel. Pe soka aplikasyoni, ja jas kechan wa xkʼulani jani wa stsana ja jtableta, sok tey kiʼoj bʼa jkʼabʼ spetsanil ja jas wa xmakunikuji. Skʼulajel estudiar tikʼan skoltunejon bʼa masxa yij oj ajyuk ja jkʼuʼajeli sok ajyel mas mojan soka Jyoba».

 Ja aplikasyon it jelni makunel ja bʼa chamel wa spuku sbʼaji ja COVID-19. Jun sjejel, ja Charlyn, bʼa Estados Unidos, wa xyala: «Soka COVID-19 bʼa kada parte ja bʼa luʼumi, ayxani mas ja jun jabʼil mixa wanukon skʼeljel jach juʼunik bʼa kʼulubʼal imprimir. Pe ja bʼa JW Library wa xtaʼatik spetsanil ja jas wa xmakunikujtik ja bʼa jastal wa xkila jbʼajtik soka Dyosi. Wani xkayi tsʼakatal ja Jyoba yuja tsamal majtanal it».

 Jitsan jachni wa xyabʼye jastal ja Faye, bʼa tey bʼa Filipinas. Ja yeʼn wa xyala: «Jelni lek ja aplikasyon it, ayiʼoj spetsanil ja jas wa xmakunikuj bʼa ajyel mojan soka Jyoba. Wa xka makunuk bʼa ay jas skʼumajel ja bʼa saʼan sakbʼeli, bʼa ay jas smaklajel bʼa wa xnikwani yajni wanon skʼulajel ja kaʼtel bʼa yoj naʼitsi, bʼa xchapjel jbʼaj ja bʼa reunioniki sok bʼa skʼulajel estudiar ja Biblia. Jaxa yajni mi jas wanon skʼulajeli, wa xkʼela bideoʼik. Sok yajni wanon smajlajel ja jturno, wa xka makunuk bʼa skʼumajel ja Biblia sok ja juʼuntiki. ¡Ja aplikasyon it jach jastal oro!».

 Chomajkil, ja aplikasyon it jelni xkoltani ja bʼa xcholjeli. Jun sjejel, jun hermana bʼa Camerún jelni skʼulan gusto jun teksto bʼa Biblia ya makunuk ja smoj maʼ elsok xcholjeli. Semanaʼik tsaʼan skʼana oj ya makunuk, pe mi xjul skʼujol jas tekstoʼil. Ja yeʼn wa xcholo: «Lekxtama wa xjuljkʼujol jun yal yaljel ja bʼa teksto. Ja yuj, ochyon ja bʼa aplikasyon, jleʼa ja bʼa Biblia sok jtsʼijbʼan ja yaljeli. Stsʼakatal ja aplikasyon it, wani xtaʼa ja tekstoʼik wa xchʼay jkʼujoli».

 Tsʼakatal yuja wa donasyonex waxa waʼawex bʼa tuktukil modo wa x-axi ja bʼa donate.pr418.com, wa xbʼobʼ jchaptik, skʼulajel actualizar sok stojbʼesel mas ja aplikasyon JW Library. Jachuk ja kermanotik bʼa spetsanil ja luʼumi wa xbʼobʼ yawe el slekilal. Jitsan tsʼakatal yuja waxa waʼawex sok spetsanila kʼujolex jawa donasyonexi.

1. Octubre bʼa 2013: El ja aplikasyon bʼa ayiʼoj ja Biblia bʼa inglés ja Traducción del Nuevo Mundo bʼa rebisadoxa ay.

2. Enero bʼa 2015: Axi ochyi mas juʼunik bʼa inglés, sok tsaʼan, bʼa jitsan kʼumal.

3. Noviembre bʼa 2015: Chʼikxi ja yamkʼabʼal bʼa yajel och yelaw ja yaljeliki.

4. Mayo bʼa 2016: Axi ochyi ja yal entrada «Reuniones».

5. Mayo bʼa 2017: Chʼikxi ja yamkʼabʼal bʼa yajel och notaʼik.

6. Diciembre bʼa 2017: Axi ochyi ja Biblia bʼa estudio bʼa inglés.

7. Marzo bʼa 2019: Chʼikxi ja yamkʼabʼal bʼa yajel koʼ bideoʼik, yiljel bideoʼik jach mi koʼeluk sok yiljel ja referenciaʼik ja bʼa Juʼun bʼa koltanel spaklajel.

8. Enero bʼa 2021: Chʼikxi yajkʼachil modoʼalik sbʼaja juʼun Abʼan stsamalil jawa sakʼanili.