Ja bʼa enero bʼa 2021, ja Tsome Tojwanum skʼulan anunsyar oj el jun yajkʼachil yamkʼabʼal bʼa skʼulajel estudiar ja Biblia, wa sbʼiʼilan, Abʼan stsamalil jawa sakʼanili. a ¿Jastal awabʼ ja yajni axi ja anunsyo it? Ja Matthew, bʼa Canadá, wa xcholo kabʼtik jastal yabʼi: «¡Mini xbʼobʼ jkʼuʼuk! Yajni jmaklay ja loʼili sok kila ja bideoʼik wa xcholo jas yuj kʼulaxi ja juʼun it sok jastal axelxa makunuk, jelni snikawon. ¡Jelxani jgana oj kʼele sok oj kʼe ka makunuk!».

 Ja juʼun it wa xya makunuk jun yajkʼachil modo bʼa yajel estudio bʼa Biblia, pe mini kechan ja stukil ja jaw yuja bʼajtan yamkʼabʼaliki. Ta ayxa awiʼoj jun kopya jach juʼun, bʼobʼta awilata ayni stukil. ¿Wan maʼ xa kʼana oja naʼ jasa? Jani jastal wa xkʼulaxi ja libro Abʼan stsamalil tolabida jawa sakʼanili.

 Ja spimil ja juʼuni. Bʼa skʼulajel ja libro Abʼan stsamalil tolabida jawa sakʼanili wani skʼana jun juʼun mas pim. ¿Jas yuj? Ja libro it ayiʼoj mas ja 600 potoʼik bʼa ay yelawik, kasi 10 ekʼele mas yuja libro wa sjeʼakitik. Chomajkil, ay kanel jaman bʼa mey yiʼoj tekstoʼik sok sjejelik. Ja chabʼ stukil it, ayiʼojan jun swokolil. Yajni ja juʼun jel jay, wani xchiknaji ja poto’ik b’a pilan slam, ama tʼusanuk. Bʼa mi oj ekʼuk ja it, ja Departamento bʼa Skʼulajel Imprimir bʼa Spetsanil ja Luʼum, ja bʼa Wallkill (Nueva York), skʼulane jun preba bʼa chane tikʼe juʼun bʼa kaʼunejtikxa makunuk bʼa imprentaʼik. Ja Tsome Olomalik bʼa Tsʼijbʼanum bʼa Tsome Tojwanum, spaklaye sok stsaʼawe ja juʼun mi jel xchiknaji ja bʼa pilan slami. Anima ja tikʼe juʼun it masni karo jun 16% yuja juʼun kʼajyel wa xkatik makunuki, pe ojni koltajuke ja estudianteʼik b’a mi oj jomjuk yolome yuja potoʼik ja bʼa pilan slami.

 Ja spotsulabʼil ja spatiki. Ja spotsulabʼil ja libro Abʼan stsamalil tolabida jawa sakʼanili tukni wa x-abʼxi yuja tuk libroʼiki yujni axel makunuk jun tikʼe spotsulabʼil b’a mas lek. Ja tuk libroʼiki mas wa xlijpi ja spatiki, pe ja bʼa it axi makunuk jun tikʼe juʼun sbʼiʼil mate bʼa mas oj chiknajuk ja dibujoʼiki. Chomajkil, ja jastal tojbʼeli ja spatiki wa xkoltaji ja libro bʼa mi wego oj jomuk yuja jel oj axuk makunuki. Ja spotsulabʼil sok mate ja spatik ja juʼun it, joʼe ekʼele masto chaʼan stsʼakol yuja spotsulabʼil ja juʼunik bʼa wa xlijpi. Ja yuj jitsan naʼits Betel, aʼtijiye lajan bʼa stajel jun spotsulabʼil bʼa mas barato.

 Anto ta mas chaʼan stsʼakol, ¿jas yuj jach tojbʼesji? Jun hermano bʼa wa x-aʼtiji ja bʼa Departamento bʼa wa xkʼulaxi Imprimir bʼa spetsanil ja luʼum wa xcholo: «Yuja libro it jel oj axuk makunuk, wa xkʼanxi aʼajyuk lek ja janekʼ tyempo oj bʼobʼuki». Ja Eduardo, bʼa ti wa x-aʼtiji bʼa Opisina bʼa Imprenta bʼa Betel bʼa Brasil, wa xyala: «Jel xyaʼa gusto yuja xchonabʼ ja Dyos wa xya makunuk materialik bʼa jel lek. Ojni ya gusto yajel makunuk ja tsamal libro it bʼa wa xkuchyuj sok b’a oj axuk makunuk lek ja donasyoniki».

 Kʼe jkʼultikon imprimir ja libro Abʼan stsamalil tolabida jawa sakʼanili bʼa marzo bʼa 2021, bʼa yojol ja chamel COVID-19, ja yuj jtʼaspuntikon pilan wokolik. Yuja lutxi ja Betel, mixa xbʼobʼ lokxuk hermanoʼik bʼa oj koltanuke aʼtel cha mini xbʼobʼ lokxuke yajkʼachil betelitaʼik. Ja yuj bʼa jujuntik, mini ajyi jitsan aʼtijumik, jaxa bʼa tuk imprenta, tʼilani lutxi bʼa jun tyempo yuja sley ja Gobyerno.

 ¿Jasa kʼulaxi yuja wokolik it? Yajni cha kʼe kʼulaxuk imprimir, kʼanxiyi ja tuk betelitaʼik bʼa wa x-aʼtijiye bʼa tuk departamento akoltanuke jun tyempo bʼa skʼulajel imprimir. Ja Joel, ja maʼ ti wa x-aʼtiji bʼa Departamento bʼa skʼulajel imprimir bʼa spetsanil ja luʼumi, wa xyala: «Yuja puesto ajyiye sok wa skʼanawe snebʼjel yajkʼachil aʼtel, koltani bʼa oj kʼulaxuk spetsanil ja aʼtel ajyi».

 Anima yuja wokolik ajyi, jkʼulantikonta imprimir miyonik ja libro Abʼan stsamalil tolabida jawa sakʼanili, sok axelni makunuk jitsan jastik junuk, jastal plancha bʼa skʼulajel imprimir, bʼa wa spotso ja spatiki, juʼun, tinta sok pegamento. Ja bʼa sbʼajtanil joʼe ixaw kʼulaxi imprimir, kʼulaxi gastar dos miyon trescientos mil dólarik yuja jastik jaw. Bʼa mi jel oj chʼakxuk takʼin, wa xkʼujolantikon bʼa jaʼita oj kʼulaxuk imprimir ja janekʼ mero oj makunuk yuja kongregasyoniki.

 ¿Jastal wa xyabʼye ja maestroʼik sok ja matik wan yijel estudio soka yajkʼachil libro it? Jun hermano bʼa Australia sbʼiʼil Paul wa xyala: «Jel jgusto yajel makunuk ja libro it sok jelni snikawon bʼa yajel estudioʼik. Jelni xpaywani sok mi xyaʼa axwel, wa syaka sbʼaj lek ja jastik wa xyala, sjobʼjelik jel chaʼanik yabʼal, bideoʼik, imajenik, tablaʼik sok ja jas wa xkʼanxi sbʼaja estudiante. Jelni tsamal tojbʼel; sok ja it wani xkʼana oj kʼotkon jun lekil maestro».

 June maʼ wan skʼulajel estudiar ja Biblia bʼa Estados Unidos yala: «Jel jgusto ja yajkʼachil libro. Ja dibujoʼiki wa skoltayon bʼa yabʼjel stojol ja jastik mas tʼilani, jaxa bideoʼiki wa xkʼot man jkʼujol sok wa snikawon bʼa oj ka makunuk ja jas wa xnebʼa». Ja estudiante it wa xwaj spetsanil ja bʼa reunioniki sok wa skʼulan estudiar chabʼ ekʼele ja semana.

 Ojtoni kʼulaxuk imprimir miyonik libro bʼa jitsan kʼumal. Pes ja Tsome Tojwanumi, ja wego skʼuluneje aprobar aʼeluk bʼa 710 kʼumalik, ekʼel mas ja 340 ke yuja libro wa sjeʼakitik.

 ¿Bʼa wa x-el ja takʼin bʼa stupjel ja gastoʼik it? Ti bʼa donasyonik wa x-axi bʼa skʼulajel ja kaʼteltik bʼa spetsanil ja luʼumi. Jitsan ja bʼa donasyonik it, ti waxa waʼawex bʼa donate.pr418.com. Jelni chaʼanyabʼal xkilatikon ja jel jamana kʼujolexi. Stsʼakatal ja jaw, wa xbʼobʼ katik eluk libroʼik bʼa oj skʼuluke estudiar ja Biblia ja kristyanoʼik matik wa skʼana oj snaʼe sbʼaj ja Jyoba sok yabʼjel stsamalil ja sakʼanile bʼa tolabida (Salmo 22:26).