Ja bʼa marzo bʼa 2020 yajni ja Tsome matik wa skʼelawe sbʼaja chamelik bʼa yibʼanal luʼumkʼinal yalawe sbʼaja COVID-19, jelni tʼusan wa x-ekʼ bʼa spensare ke ojto ekʼ mas ja jun jabʼil ja oj ya wokolanukotik ja chamel it bʼa yibʼanal ja luʼumkʼinali. Yuj smul ja chamel it, miyonik kristyano, bʼa ti chʼikane jitsan testigoʼik bʼa Jyoba, yiʼuneje wokol ja bʼa sakʼanile, ja bʼa jastal wa xtaxye sok ja jastal mey stakʼine. ¿Jastal wa xchapa sbʼaje ja Testigoʼik bʼa oj bʼobʼ skoltaye ja yermanoʼe ja bʼa yoj wokolik it?

 Yuja tojelalik yaʼa ja Tsome Olomalik bʼa Koltanel yiʼoj ja Tsome Tojwanum ja bʼa testigoʼik bʼa Jyoba, bʼobʼel kʼulaxuk mas ja 950 Tsome Olomalik bʼa Koltanel bʼa sutanal ja luʼumi bʼa oj bʼobʼ koltanuke ja bʼa chamel wa spuku sbʼaj ja COVID-19. Bʼa jujuntik ekʼele, ja Tsome Olomaliki xchapuneje jaʼita oj skoltay ja smoje ja bʼa lugari, pe cha ayni wa skʼanawe ja skoltanel ja matik ay xcholi. Cha xchapuneje koltanel jach jitsan ja Tsome Olomalik bʼa Koltaneli.

 Jun sjejel, ja jas wan ekʼel ja bʼa Paraguay. Jun peryodiko wa xyala ke yuja mixa ay lek takʼin yuja chamel wa spuku sbʼaji, jitsan paraguayoʼik wane stekʼjel waʼin. Pe ja Tsome Olomalik bʼa Koltanel b’a Paraguay kʼe spil-e waʼelalik bʼa chabʼ semana. Kada paquete, tsʼakol 30 dolar, bʼa ayiʼojan waʼelalik, jastik wa xmakuni bʼa yajel ajyuk asyado sok ja jastik wa xmakuniyuj june bʼa jun pamilya bʼa chanwane.

 ¿Jas wa skʼulane ja matik wane koltanel bʼa oj stalna sbʼaje yuja COVID-19 sok bʼa stalnajel ja tuki? Wa xyawe makunuk cubreboca sok mini jel mojan wa x-ajyiye ja jastal sbʼeji. Cha wani x-ajyiye seguro ke ja matik wa xjak yakan ja waʼelaliki aʼtijuke bʼa lugarik jel sak sok snochjel tsʼikan jastik kanel kulan ja bʼa jastal oj talnay jbʼajtik. Cha seguro wa x-ajyiye ke ja matik wa syamawe ja paqueteʼik bʼa waʼelaliki bʼa ayawe makunuk ja jastik tʼilani bʼa mi jas oj ekʼ sbʼaje, wa xyawe ajyuk asyado sok wa skusuwe lek ja skarroʼe, sok wa xyawe ajyuk latsan ja paquete waʼelalik bʼa lugarik asyado lek. Sok ja matik wane spiljeli mi mojanuk wa x-ajyiye ja yajni wane yajel yile ja hermanoʼiki.

 Ja bʼa enero bʼa 2021, ja Tsome Olomalik bʼa Koltanel yala ke oj bʼobʼ axuk makunuk mas ja 25 miyon dolarik bʼa skoltajel ja matik wane wokol yuja COVID-19. Ja naʼitsik betel sok ja Tsome Olomalik bʼa Koltanel mini xjelxiye ja jastal wa xyawe makunuk ja donasyonik sok wa skʼulane ja janekʼ wa xbʼobʼ yujile bʼa stajel ja jastik wa xmakuni bʼa mi jel chaʼanuk tsʼakol. Jun sjejel ja bʼa Chile, ja hermanoʼik matik kajan sbʼaje ja bʼa koltaneli skʼanaweni oj sman-e 750 kilo lentejaʼik. Pe kechan bʼa jun ixaw ja stsʼakol ja lentejaʼik wegoni kʼeʼi. Ja hermanoʼik smanaweni ja lentejaʼik ja bʼa stsʼakol jaw. Pe chabʼ ora tsaʼan, ja chonbʼanum yala ke pilan manbʼanum yata kumxuk ja lentejaʼik smana. Ja yuj jaʼuktoma oj xchon ja bʼa janekʼ tsʼakol kaneli, yala ke oj xchon yile ja lentejaʼik bʼa aji kumxuki jastalni ja stsʼakol ja bʼa ixaw ekʼi.

 Pe yajni ja hermanoʼik waj sleʼe ja lentejaʼiki, ja chonbʼanum yalani mixa oj xchon ja jastal kaneleʼi. Lejiyi smule bʼa wane skʼepjel waʼelalik bʼa jun modo mi stojoluk, jastalni wa skʼulane jujuntik tuk kʼoleʼik. Jun hermano skʼulan orasyon bʼa mi albʼeluk jach chʼabʼan sok tsaʼan yala yabʼ ja chonbʼanum ke sjobʼuneje bʼa spetsanil ja kongregasyoni bʼa oj snaʼe matik meran wan ekʼel yujile wokoli. Ja hermanoʼik cha xcholowe yabʼi ke yajni wa stojbʼese ja paqueteʼik wa xyaʼa tʼabʼan skʼujole ja tuktukil kostumbre yiʼoje ja hermanoʼik bʼa wan ekʼel yujile wokoli. Ja yuj bʼa kada paquete wa xtukbʼi ja jastik yiʼoji sok wa xchʼikawe ja jastik bʼa mas wa xmakuniyujile bʼa kada pamilya. Sok tsaʼanxta, yalawe yabʼi ke spetsanil ja donasyonik wa xyaʼawe ja testigoʼik bʼa Jyoba, ja takʼini jastal wa xkoltaniye bʼa jun aʼtel, bʼa wa xyaʼawe sok spetsanil skʼujole. Ja winik jel cham yabʼi. Ja yuj mi kechan yala mi oj xchon ja jastal kaneleʼi, yalani oj cha skʼebʼ 400 kilo lentejaʼik ja bʼa pilan ekʼele xjak smaneʼi.

 Ja Lusu jun hermana bʼa ayxa skʼujol sok bʼa biudaxa ke ti sbʼaj bʼa Liberia soka jowane ja bʼa spamilyaʼiki. Jun saʼan sakbʼel, yajni wane skʼuljel desayunar sok spaklajel ja teksto bʼa kʼakʼu, ja yij ja Lusu bʼa ayto yiʼoj juke jabʼil yaʼa sbʼaj kuenta bʼa mixa ay waʼelal ja bʼa naʼitsi. «¿Jaxa yan jasa oj kabʼtiki?», sjobʼo. Aji kʼulan skʼujol yuja ja yala mexepi bʼa yata yi jun orasyon ja Jyoba sok bʼa skʼanata yi akoltajuke, sok seguro ay bʼa oj ajukyi yuj ja jas wa xmakuniyuj. Ja bʼa ochkʼakʼu jaw, ja ansyanoʼik ja bʼa kongregasyoni spayawe ja Lusu sok aljiyabʼ ke oj bʼobʼ waj yijan jujuntik waʼelal. Ja yeʼn wa xcholokabʼtik: «Ja kiji wa xyala ke ja yan skʼuʼunej lek ke ja Jyoba wa sjakʼa ja orasyoniki yujni sjakʼaki ja jbʼaji».

 Jun ixuk ja bʼa República Democrática del Congo bʼa mojan yiʼoj ja snaj jun pamilya bʼa Testigoʼik. Yajni yila ke ja besinoʼik wa x-ajiyile waʼelalik yuja tuk Testigoʼik ja yeʼn yala: «yajni x-ekʼ ja chameli, ochkotik testigoʼik bʼa Jyoba, yujni ja yeʼnleʼi wa cham skʼujole ja yermanoʼe ja bʼa tyempoʼik it jel wokoli». Ja statami sjobʼoyi: «¿Oj ochan testigo bʼa Jyoba kechanta yuj jun bolsa arroz?». Ja yeʼn sjakʼa: «Miyuk, mi jaʼuk yuj jaw. Pe ja bolsa arroz jaw wani sjeʼawe ke wa skʼana sbʼaje meran».

 Tsʼakatal soka donasyonik ja waxa waʼunejexi, ja testigoʼik bʼa Jyoba bʼobʼel yujile skoltajel wego ja yermanoʼe ja bʼa yoj chamel wa spuku sbʼaji. Jitsan tsʼakatal yuja donasyonik waxa waʼawex bʼa tuktukil modo ja bʼa donate.pr418.com.