Bʼa jitsan país, ja matik ay xcholi yaluneje yabʼ ja kristyano bʼa najat oj yil sbʼaje sok timwanele bʼa stsomjel sbʼaje jitsan. Ja testigoʼotikon bʼa Jyoba wani xkʼanatikon skʼuʼajel ja jas yaluneje, pe mini xkaʼatikonkan stsomjel jbʼajtikon bʼa jun modo mi xiwelaʼuk sbʼaj. Ja yuj, ja kongregasyonik wane yajel makunuk aplikasyonik jastal ja Zoom bʼa stsomjel sbʼaje jach bʼa bideollamada.

 Bʼa mi oj kʼot tekʼan ja jtsomjeltikoni, ja Tsome Tojwanum skʼulan aprobar bʼa oj axuk makunuk ja donasyonik wa x-axi bʼa smanjelyi kuentaʼik bʼa Zoom ja kongregasyoniki. Ja it jelni koltubʼal jujuntik kongregasyonik bʼa mi xbʼobʼ stupe 15 ma 20 dólar, ma asta mas, bʼa jachni stsʼakol june ja kuentaʼik it. Ja kongregasyonik it kechani wa xyawe makunuk ajyi aplikasyonik kʼebʼubʼal bʼa kechanta tʼusan ja matik wa skʼulan sbʼaje conectar ma mi jel seguroʼuk. Yibʼanal ja kongregasyonik bʼa wa xyawe makunuk kuentaʼik bʼa Zoom bʼa yeʼn stupunej ja xchonabʼil ja Dyosi masni pasil wa xyawe ajyuk seguro, sok wa xbʼobʼ ochuke jitsan kristyano. Man wego, mas ja 65.000 kongregasyon bʼa mas ja 170 país wane yajel el slekilal ja kuentaʼik it.

 Ja kongregasyon Kairagi, bʼa chonabʼ Manado (ja bʼa lugar Célebes Septentrional, Indonesia), yakan yajel makunuk jun aplikasyon kʼebʼubʼal sok jaxa kʼe ya makunuk ja Zoom wa xyaʼa ja xchonabʼil ja Dyos. Ja hermano Hadi Santoso wa xyala: «Asta ja hermanoʼik matik mi jel snaʼawe bʼa aparatoʼik wani xbʼobʼ yawe el slekilal ja reunioniki, pes yujni mixa skʼulan sbʼaje conectar jitsan ekʼele ja bʼa reunioni».

 Ja Léster Jijón uninal, jun ansyano ja bʼa kongregasyon Guayacanes Oeste, bʼa Guayaquil (Ecuador), wa xyala: «Yuja mi jel stakʼine ja hermanoʼiki, jitsan kongregasyon mini oj lajxukyujile smanjel jun kuenta bʼa Zoom bʼa oj bʼobʼ skʼul sbʼaj conectar yibʼanal ja kongregasyon. Pe ja wego, stsʼakatal ja xchonabʼil ja Dyosi, ay kiʼojtikon jun kuenta bʼa Zoom bʼa wa xbʼobʼ jkʼul jbʼajtikon conectar jitsan. Jachuk wa xbʼobʼ jloktikon mas kristyano sok mixa wala xiwtikon ta oj ekʼuk ja janekʼ wa xbʼobʼ jkʼul jbʼajtikon conectar».

 Ja Johnson Mwanza, jun hermano ja bʼa kongregasyon Norte Ngwerere, bʼa chonabʼ Lusaka (Zambia), stsʼijbʼan: «Bʼa jitsan ekʼele, jitsan hermanoʼik yaluneje kabʼtikon: ‹Ja Zoom bʼa yeʼn stupunej ja xchonabʼil ja Dyos mi kechan wa xkabʼtikon mas mojan aytikon soka hermanoʼiki, cha wani xkabʼtikon ja syajal skʼujol sok ja jastal jel yaj xyilawotikon ja Jyoba›».

 Ja takʼin axi makunuk bʼa smanjel ja kuentaʼik it bʼa Zoom tini axi eluk ja bʼa takʼin tsomxel sbʼaja aʼtelik bʼa koltanel bʼa wa x-ekʼ jun desgrasya. Ja takʼin it wa xtaxi stsʼakatal ja donasyonik wa x-axi sbʼaja kaʼteltik bʼa spetsanil ja luʼumi. Jitsan ja donasyonik it tini wa x-axi bʼa donate.pr418.com. Jitsan tsʼakatalex yuja waxa jama jawa kʼujolex bʼa yajel jawa donasyonex, bʼa cha wani x-axi makunuk ja bʼa aʼtelik bʼa koltanel ja yajni wa x-ekʼ jun desgrasya bʼa chikan jas lugar (2 Corintios 8:14).