Ja bʼa tsaʼanikxta kʼakʼu, mini cham xkabʼtik ke ay «yabʼalil guerraʼik bʼa tuktukil lugar» (Mateo 24:6). Jitsan hermano’ik wa xyiʼaje wokol yuja tiroʼanelik it, pe tolabida wa x-ajiyile ja koltanel wa xmakuniyujile. Jelni yaʼa kulan jkʼujoltik yabʼjel ja bʼa Imporme 3 b’a Tsome Tojwanum b’a jab’il 2022 ke ja bʼa Europa del Este wanxa kʼulaxel ja aʼtelik bʼa skoltajel ja hermanoʼik yiʼuneje wokol yuja guerra bʼa Ucrania. ¿Jasa wan kʼulaxel bʼa oj lajxukujtik ja it ama ay guerra? ¿Jastal wa xkoltajiye yuja it ja kermanotik bʼa Ucrania?

 Ja 24 bʼa febrero bʼa 2022, ja k’ak’u k’e ja guerra, ja Tsome Olomalik b’a Coordinadorik skʼulan aprobar yajel makunuk takʼin bʼa skoltajel ja kermanotiki. Ja naʼits betel bʼa Ucrania wegoxta kʼe sman jastik junuk, sok ja 27 Tsome Olomalik b’a koltanel kʼe spil-e.

 Chomajkil, ja hermanoʼik bʼa yechalil wa xkʼelxi ja yaʼtele ja testigoʼik bʼa Jyoba wegoxta kʼe spensaraʼuke jastal oj bʼobʼ skoltaye ja naʼits betel bʼa Ucrania. Ja Tsome Olomalik bʼa Coordinadorik sok bʼa Juʼunik bʼa Tsome Tojwanum yaweyi xchol ja Departamento bʼa smanjel bʼa spetsanil ja luʼum bʼa yeʼn ayil ja aʼtel it sok oj skoltay sbʼajesok jujuntik hermano ja bʼa Betel bʼa Ucrania sok Polonia, sok lajani xchapawe jastal oj skʼuluke. Kada kʼakʼu, jitsan hermanoʼik ja bʼa departamento bʼa sManjel, bʼa sJekjel sok bʼa jastik ti chʼikan soka Ley ja bʼa Betelik it, sok june ja bʼa Olomal bʼa naʼits Betel b’a Ucrania sok jujuntik hermanoʼik ja bʼa Departamento bʼa smanjel bʼa spetsanil ja luʼumi, wa stsomo sbʼaje bʼa chapjel ja aʼteli.

 Ja Jay Swinney, bʼa Departamento bʼa sManjel bʼa sutanal ja luʼumi, wa xcholo: «Bʼajtan tʼilan oj jnatikon jasa wa xmakuniyujile ja hermanoʼik. Wa xkʼana oj katikonyile waʼelalik sok jastik junuk wa xmakuniyujile bʼa kada kʼakʼu bʼa kʼajyelexasok. Pe ja wokoli mi kechan jaʼuk snajel ja jas wa xmakuniyujile, cha tʼilani oj tatikon jun modo bʼa mas seguro sok bʼa mas wego sjekjel ja jastik junuk jaw ja bʼa Ucrania».

 Ja bʼa 9 bʼa marzo bʼa 2022, wanxa xnaxi jasa oj jekxuki. Chapxi oj jekxuk kajaʼik sok jastik junuk bʼa mas tʼilan wa xmakuni, jastal lataʼik bʼa bʼakʼet sok chay, cerealik, arroz, chenekʼ, jabón sok papel bʼa baño. Ja bʼa jutsʼin jaw, wani x-ilxi ke yibʼanal ja jastik junuk jaw bʼa chane semana ojni el junuk 65 dolar bʼa kada kristyano. Yuja wani xbʼobʼ makunuk yujile milik hermanoʼik ja jastik junuk jaw, ja Tsome Olomalik bʼa Coordinadorik skʼulan aprobar oj axuk makunuk ja janekʼ takʼin wa xmakuni bʼa oj axuk kʼotyile. Pe ¿jastal oj pilxuk ja jastik junuk it bʼa mi jel xiwelaʼuk sbʼaj?

 Ja bʼa 13 bʼa marzo, chabʼ hermanoʼik bʼa Polonia skʼulane jun preba: elyesok jastik junuk bʼa naʼits Betel bʼa Polonia sok yiʼaje och bʼa jun niwan naʼits bʼa Ucrania, mojan bʼa chonabʼ Leópolis (Lviv). Kʼakʼujik bʼajtanto, ja hermanoʼik ja bʼa naʼits Betel bʼa Ucrania sok Polonia koltaniye bʼa xchapjel ja biaje. Yawe eluk ja juʼunik bʼa oj bʼobʼ skʼuts-e ja frontera jastal koltanumik, skʼulan sbʼaje asegurar ke ja skarroʼe oj chiknajuk jastal koltanumik. Soka skoltanel ja hermanoʼik b’a lugari, stsaʼawe ja bʼej bʼa mas wego kʼotel ja bʼa niwan naʼits ja yajni tixa aye bʼa Ucrania. Ja koltaneli ti axikan bʼa Leópolis sok, mini yiʼaj jun kʼakʼu, bʼa oj chʼak pilxukyile ja Tsome Olomalik b’a koltaneli, sok ja kermanotiki lekni kumxiye ja bʼa Polonia. Spetsanil ja it bʼobʼni kʼulaxuk stsʼakatal yuja chapxi lek sok yuja ya koʼ slekilal ja Jyoba.

 Ja bʼajtan preba jelni lek eli, pe ja hermanoʼiki kechani bʼobʼ skʼep-e jun tonelada b’a jastik junuk (jun tonelada bʼa Estados Unidos). Wantoni skʼana yujile skʼepjel junuk 200 tonelada (220 toneladaʼik bʼa Estados Unidos). ¿Jastal oj bʼobʼ axuk ekʼuk sok oj pilxuk bʼa mas wego?

 Jitsan kristyano b’a yib’anal ja luʼumi skʼanawe oj koltanuke, tsaʼan yajni skʼumane ja bʼa jw.org ke ja guerra jelni wan yajel wokolanuk ja kermanotiki. Ja matik najat aye bʼa Ucrania yaʼawe sdonasyone ja bʼa yaʼtele bʼa sutanal ja luʼum yiʼoje ja testigoʼik bʼa Jyoba, bʼa wani snaʼawe ke ojni axuk makunuk lek ja takin jaw. Jaxa tuk, bʼa mojan aye, spila ja styempoʼe, ja jastik sbʼaje sok ja yipe. Ja it jani jujuntik sjejel.

 Ja bʼa Polonia, jitsan skʼapa sbʼaje bʼa xchapjel jitsan milik kajaʼik bʼa koltanel, sok jitsan yal untik skʼulane yal tarjetaʼik sok dibujoʼik. Ja Bartosz Kościelniak, bʼa Departamento bʼa smanjel ja bʼa naʼits Betel bʼa Polonia, wa xcholo: «Ja bʼa Salmo 110:3 wa xyala ke ja xchonabʼ ja Jyoba ojni skʼap sbʼaj gusto lek. Bʼa jitsan ekʼele jkʼumunej ja yaljelik jaw, pe mini bʼa kilunej janekʼto smeranil ja yaljelik it masan yajni keʼn kila wegoxta kʼotye jitsan kristyanoʼik bʼa koltanel»

 Jun hermano bʼa ayiʼoj jun empresa bʼa wa skʼulan entregar chikan jasunuk yaʼa majan ja skarroʼiki sok yeʼnani stupu ja gasolina makuni. Ja yeʼn wa xyala: «Bʼa keʼna jani ja sjutsʼinil bʼa sjejelyi ja kermanoʼik sok ja Jyoba janekʼto wa xkʼanawe. Jelni gusto ayon yuja jkʼapa jbʼaj koltanel». Ja yibʼanali, bʼa oj bʼobʼ kʼepxuk ja koltaneli kʼulaxi donar mas ja 7,700 litroʼik bʼa gasolina, sok ja hermanoʼiki yaʼawe ja styempoʼe sok ja yipe bʼa syamjel ja karroʼik, mojan junuk 48.000 kilometro.

 Stsʼakatal yuja yajtanel soka tsatsal aʼtel skʼulane ja matik koltaniye, ja bʼa 28 bʼa marzo junuk 15 kʼakʼu tsaʼan ja kʼulaxi ja bʼajtan preba, jekxitani ja bʼa Ucrania 100 tonelada (110 toneladaʼik bʼa Estados Unidos) waʼelalik, jastik junuk bʼa ajyel sak sok jastik bʼa an. Sok yuja jitsan kermanotik sok empresaʼik yaʼawe jitsan jastik junuk, bʼobʼni kʼulaxuk ahorrar jitsan takʼin ja yajni chapxi ja kajaʼik bʼa koltanel. Man wego, ja testigoʼik bʼa Jyoba jekunejtikon ja bʼa Ucrania mas ja 190 toneladaʼik (209 toneladaʼik bʼa Estados Unidos) bʼa koltanel. ¿Jastal wa xyabʼye ja hermanoʼik bʼa ajiyile ja koltanel jaw?

 Yajni ja kajaʼik kʼot ja bʼa Leópolis, ja Tsome Olomalik b’a koltanel bʼa yibʼanal ja Ucrania spilaweyi ja matik mas oj makunukyuji. Jitsan ja bʼa kajaʼik jaw yiʼaje och ja bʼa chonabʼik bʼa wa xkan mas ja 1,300 kilómetros ja bʼa Leópolis. Anima chapxi lek ja jastal modo oj kʼulaxuki, jelni yiʼaj tyempo. a

 Ja Markus Reinhardt, june ja bʼa Olomalik bʼa naʼits Betel bʼa Ucrania, wa xyala: «Soka jas wan ekʼeli, jitsan hermanoʼik yiluneje jastal ja Jyoba jel ja syajal skʼujol sok ja slekilalik wa x-ilxi yajni wa xnochxi ja tojelalik wa xyaʼa ja yorganisasyon, asta ja yajni bʼajtanto oj ekʼ jun wokol. Jun sjejel, jpetsaniltik wa x-aljikabʼtik la jnoltik waʼelal bʼa jnajtik sok jaʼ bʼa oj albʼuk jujuntik semana. Stajel tiʼal sbʼaja it, jun ansyano bʼa jun kongregasyon bʼa Kiev sbʼiʼil Anton yala: ‹Jel xkaʼatikon tsʼakatal yuja organisasyon wa xchapawotik bʼajtantoyuj jun wokol jastal it. ajyel kujtikon nolan jaʼ waʼelal sok jun radyo, skoltunejotik bʼa oj ajyukotikon sakʼan›. Jelni lek ke ja hermanoʼik snochowe lek ja tojelaliki; jachuk ja naʼits Betel ajiyi tyempo bʼa oj xchap lek ja aʼtel bʼa koltaneli».

 ¿Jastal yabʼye ja kermanotik yajni kʼot ja koltaneli? Ja Míkola soka Zinaida, bʼa ti sbʼaje bʼa Járkov, wa xcholowe: «Yuja jel xcham skʼujole bʼa keʼntikon wani xkʼot man jkʼujoltikon. Jitsan tsʼakatalex soka waʼelal soka anik. Wani x-ilxi ke yeʼnani ja Jyoba wa xnikwani bʼa skʼulajel yibʼanal ja it». Ja Valentina, bʼa cha ti sbʼaj bʼa chonabʼ jaw, wa xyala: «Yajni kʼe ja guerra, tʼilani oj chol jbʼajtikon bʼa oj waj jmantikon ja jwaʼeltikoni, sok mini tolabida wa xtaʼatikon ja jas wa xmakunikujtikoni. Pe ja Jyoba altantoni ay soka jwokoltikoni. Ja yuj skʼulan ke ja hermanoʼiki oj yiʼejan kitikon bʼa jnajtikon kajaʼik bʼa yiʼojan ja jas mero wa xmakuni kujtikon. Yajni ja jastik wan ekʼel wanxta jomel sok waxa kʼuʼan ke mixa ayuka koltajel, anto waxa wila jastal ja Jyoba sok ja xchonabʼil wa stalnaya bʼa jun modo jel tsamal. Jelni xlikiki ja yajni wala koltaji sok waxa taʼa ja koltajel waxa kʼana ja bʼa mero styempoʼili».

 Ja Evguen, Irina sok Mikita, bʼa tʼilani spakawe ajnel ja bʼa Mariúpol, yalawe: «Wa xkaʼatikon tsʼakatal sok spetsanil jkʼujoltikon yuja yajxta atalnunejex ja jpamilyatikoni. Ja smeranili, julni ja bʼa mero styempoʼil. ¿Xa naʼawex? Ja bʼajtani, jpensaraʼantikon ke ja kajaʼiki kechanta yiʼojan jastik junuk, pe yajni jamatikoni kilatikon ke bʼutʼel yajal kʼujol».

 Wani x-ilxi lek ke ja yip soka stojwanel ja Jyoba koltanelni ja bʼa aʼtel it jel tʼilan ja bʼa styempoʼil kʼepxi ja waʼelal ja yajni ay guerra soka b’a wa xkabʼtik «yabʼalil guerraʼik». Pe cha jachni wa xkalatik soka wa donasyonex awaʼawex sbʼaja aʼtel wa xkʼulaxi bʼa sutanal ja luʼum, jitsan ja awawex makunuk ja donate.pr418.com. ¡Tsʼakatalex lek yuja jel jaman akʼujolexi!

La koltanukotik bʼa jun modo seguro sok bʼa mas wego

1. 24 bʼa febrero bʼa 2022: Ja Tsome Olomalik bʼa Coordinadorik wa spilawe takʼin bʼa jachuk ja Betel bʼa Ucrania oj bʼobʼ skolta ja hermanoʼiki.

2. 24 bʼa febrero man 8 bʼa marzo bʼa 2022: Ja Betel bʼa Ucrania smana jastik junuk sok skʼepa soka skoltanel ja Tsome Olomalik b’a koltanel. Ja Betel chomajkil ajyi chapan b’a oj skʼul recibir sok man bʼa Polonia oj sjek ja jastik junuki.

3. 9 bʼa marzo bʼa 2022: Ja Tsome Olomalik bʼa Coordinadorik skʼulan aprobar oj jekxuk koltanel ja bʼa Ucrania.

4. 10 man 12 bʼa marzo bʼa 2022: Wa xchapxi jun biaje bʼa preba bʼa sjekjel waʼelalik sok jastik junuk bʼa Polonia bʼa oj sjeke bʼa Leópolis (Ucrania).

5. 13 bʼa marzo bʼa 2022: Wa xkʼulaxi ja bʼajtan biaje bʼa preba bʼa waʼelal sok jastik junuk bʼa Polonia man Leópolis.

6. 14 man 16 bʼa marzo bʼa 2022: Ja bʼa Polonia, koltanumik ja bʼa Departamento bʼa xChapjel sok sKʼulajel Naʼitsik wa stsomo sbʼaje ja bʼa wa x-ajyi asambleaʼik mojan ja bʼa chonabʼ Poznań bʼa xchapjel kaja’ik waʼelal sok tuk jastik bʼa ajyel sak.

7. 17 bʼa marzo bʼa 2022: Chane kʼakʼu tsaʼan ja bʼa biaje bʼa prueba, wa xkʼe yiʼe och 13 toneladaʼik (14 tonelada bʼa Estados Unidos) b’a koltanel ja b’a frontera b’a Ucrania.

8. 21 man 27 bʼa marzo bʼa 2022: Wa xchapxi mas kajaʼik ja bʼa Polonia sok wa xjekxi bʼa Ucrania. Mini yiʼaj ja 24 ora ja chʼak pilxuk ja bʼa lugarik mas wa xmakuni yujileʼi.

9. 28 bʼa marzo bʼa 2022: Man yajni kʼulaji aprobar bʼa sjekjel koltanel, bʼa ekʼelxa 20 kʼakʼu, pilxitani 100 tonelada waʼelalik, jastik wa xmakuni bʼa ajyel sak sok jastik junuk wa xmakuni b’a an ja bʼa Ucrania (110 tonelada ja sbʼa Estados Unidos).

 Masan wego, ja testigo’ik b’a Jyoba jekunejtikonxa mas ja 190 toneladaʼik ja b’a Ucrania (209 toneladaʼik b’a Estados Unidos) ja b’a koltaneli.