«Bʼobʼta, jitsan ja matik wa skʼumane ja juʼunik it wa snaʼawe sbʼaj ja matik mi xyilawe kʼinal», jach yala ja The Watch Tower (La Torre del Vigía) ja b’a 1 b’a junio b’a 1912. Ja rebista it cha wa xyala ke ayni juʼunik kʼebʼubʼal b’a yeʼnle. Sok yala: «Ja juʼunik it sbʼaja matik mi xyilawe kʼinali wani xkʼulaxi imprimir sok yal punto’ik b’a jachuk ja yeʼnle’i oj bʼobʼ skʼumuke. Jitsan matik mi xyilawe kʼinal jelni cha’anyab’al xyabʼye snajel ke oj kʼot jun sk’ak’ujil ke ja luʼum kʼinali ojni ajuk jitsan slekilalik».

 Yajni tsʼijbʼaxi ja yaljelik it, ja testigo’ik b’a Jyoba wantikxani yajel eluk juʼunik b’a Biblia b’a oj bʼobʼ skʼumuke ja matik mi xyilawe kʼinali ama mitoni kujlajeluk jun modo ja b’a inglés b’a stsʼijbʼajel jach b’a braille. Pe ja wego wantiktoni yajel eluk sbʼaja matik mi xyilawe kʼinali. ¡Sok wani xkʼulantik b’a mas ja 50 kʼumalik! ¿Jastal wa xchapxi?

 Ja jas b’ajtan wa xkʼulaxi, jani yajel ekʼ b’a braille ja jas mero wa xyala ja b’a k’umal aji eluki. Ja Michael Millen, b’a ti wa x-aʼtiji b’a Koltanumik b’a Yajel ekʼuk Teksto’ik, b’a Patterson (Nueva York), wa xyala: «Ja b’ajtanto, wani xkatikon makunuk programa’ik b’a wa xyawe makunuk ajyi ja kristyano’ik b’a stsʼijbʼajel ja braille, pe mini xmakuniyuj yib’anal ja kʼumaliki. Ja wego wa xkatik makunuk ja programa Watchtower Translation System, b’a wani xkoltani stsʼijbʼajel ja braille b’a tʼusan mi yibʼanaluk ja kʼumalik b’a sutanal ja luʼumi. Juni programa jel cha’anyab’al. Wa xk’u’an lek mini ay pilan jastal it».

 Ja b’a juʼuntiki b’a braille mini kechanuk wa xchʼikxi ja jas wa xyala ja juʼuni, cha wani xcholo ja jas wa xk’an yal ja dibujoʼiki ma ja potoʼiki. Jun sjejel, ja b’a dibujo b’a sk’e’ulab’il ja spatik ja Abʼan stsamalil jawa sakʼanili, jach wa xchiktes ja b’a braille: «Jun winik wajum b’a jun bʼej b’a jel yi’oj buelta b’a jel nichimik, slomanal sok witsik». Ja Jamshed, jun siervo ministerial sok precursor b’a mi xyila kʼinal, wa xyala: «Ja jas wa xcholo sbʼaja dibujoʼiki ma ja potoʼiki jelni cha’anyab’al b’a keʼna».

 Yajni chʼakta tsʼijbʼaxuk ja b’a braille, ja archiboʼiki wa xchʼak jekxuk b’a betelik b’a yeʼnxani wa skʼulane imprimir. B’a skʼulajel ja it, wa xyawe makunuk jun tsatsal juʼun b’a mi xchʼi’i ja yajni wa xyawe ochuk ja puntoʼiki sok mi xjom ja yajni wa x-axi makunuk jitsan ekʼele. Sok tixa wa xyawe ochuk ja spatik ja juʼuniki: b’ajtan, wa xlatsxi ja slamiki sok tsaʼan wa xchʼak stsome jach kʼatan sok jun yal yalambreʼil. Sok tixa wa xjekxi soka tuk juʼuniki b’a wa xkʼot sbʼaje ja kongregasyoniki, ma wa xjekxiyi jach kʼebʼubʼal ja matik mi xyila kʼinal ta wa xya’a ja modo it ja correo wa sjeka’i. Ta ja kermanotik matik mi xyilawe kʼinal ma ja matik mi lekuk ay ja sate, wa sk’ana wego oj yi’e ja juʼunik it b’a oj makunuk ja b’a reunionik, ja betelik wego wa xchapawe b’a jachuk mas wego oj sjeke.

 Skʼulajel yib’anal ja it wani xyiʼaj tyempo sok takʼin. Pes ja b’a kimprentatik b’a Wallkill (Nueva York), junxtani tyempo wa xyiʼaj yajel eluk chabʼ Biblia ja b’a Braille sok yajel el 50.000 Biblia’ik normal. Pe chomajkil, kechanta jun Biblia b’a Braille b’a segundo grado ja b’a inglesi ayni yi’oj 25 volumenik. a Ja jastik junuk wa xmakuni b’a yajel eluk, stsʼakolni 123 ekʼele mas ke yuja janekʼ wa xyiʼaj jun Biblia normal. Kechanta ja spatik jun Biblia b’a 25 volumenik stsʼakolni 150 dólar.

 ¿Jastal wa xyabʼ wa x-ajyiye ja matik wa xkoltaniye b’a yajel eluk ja juʼunik it? Ja Nadia, b’a Betel b’a Sudáfrica, wa xyala: « Ja sak’anile ja matik mi xyilawe kʼinali ma ja matik mi xyilawe lek kʼinali mini pasiluk. Ja yuj juni cholal b’a keʼna skʼulajel ja’tel it b’a yeʼnle. Wani xk’u’an lek ke jelni xkʼanjiye yuja Jyoba».

 Ta jun kristyano b’a mi x-ilwani mi snaʼ sk’umajel braille ¿jas wa xbʼobʼa kʼuluk? Ayxa jujuntik jab’il el ja poyeto wa xyoloman, Aprenda a leer braille. Ja yamkʼabʼal it ay yiʼojan teksto’ik jach b’a letra’ik sok teksto’ik b’a braille. Kʼulubʼal sbʼaja kristyano mi xyila kʼinal sok b’a june ma’ wa xbʼobʼ yil b’a oj yawe makunuk lajan. Ja polleto it kʼotel jun yamkʼabʼal b’a ay yiʼojan jun yal regla sok jun jasunuk b’a xchʼubʼjel b’a braille. Ja kristyano ja ma’ wan snebʼjeli wa xbʼobʼ ya makunuk ja yamkʼabʼal it b’a oj snaʼ stsʼijbʼajel b’a braille. Yajel makunuk ja it oj skoltaya b’a oj kan b’a wa pensar soka jastik yiʼojan ja b’a braille sok b’a oj ana’ yajel makunuk soka yal akʼabʼiki.

 ¿Jastal wa xkoltajiyeyuj ja juʼunik b’a braille ja kermanotik b’a mi xyilawe’i ma ja matik mi xyilawe leki? La kiltik ja jas ekʼ sbʼaj ja Ernst, b’a ti sbʼaj b’a Haití. Ja ye’n wani xwaj ja b’a reunionik b’a kongregasyon, pe mini ayi’oj juʼunik b’a braille. Jayuj ja jas wa skʼulani jani oj chʼak yakan b’a spensar ja jas oj yal ja b’a reunioni ma b’a oj ya’ ja skomentario. Ja ye’n wa xyala: «Pe ja wego tukxani lek, wanxa xbʼobʼ jach ja jkʼabʼi sok yajel ja jkomentario chikan jas ora. Sok wa xkabʼ kʼotelonxa parte ja b’a kongregasyon. Jpetsaniltik wa xkabʼtik ja junxta waʼelal wa xyakitik ja Dyosi».

 Ja Jan jun ansyano b’a kongregasyon b’a ti sbʼaj b’a Autria sok ayi’oj jun wokol yuja mi xbʼobʼ ilwanuk leki. Ama jachuk yeʼn wa xya ekʼuk ja spaklajel Ja Juʼun Cholumani soka spaklajel ja Biblia soka kongregasyon. Ja ye’n wa xcholo: «Ja juʼuntik b’a braille jani ja mas jel chikan stojol jnaʼunej sbʼaji. Jun sjejel, ja slamiki ayi’oj snumero’il sok nota’ik b’a pasilxta sok ja dibujo’ik, wa xyala kabʼtik ja jasa wa sk’ana oj jnatiki».

 Ja b’a Corea del Sur, ti sbʼaj jun precursora sbʼiʼil Seon-ok. Ja ye’n mi x-ilwani sok mi xyabʼ kʼinal. Ja ajyi, ja b’a reunioniki wani skʼanayi b’a ay ma’ oj sutjukyi senya’ik b’a yamubʼal ja skʼabʼi. Pe ja wego, wa xbʼobʼ skʼumuk ye’n mismo ja juʼunik jach bʼa braille. Ja ye’n wa xyala: «Jelni wokol sk’umajel ja tuk juʼunik b’a braille yuji wan palta punto’ik, ja schojlali jel lochanik sok ja juʼuniki jel jay. Pe masni pasilxa sk’umajel ja juʼunik bʼa testigo’ik b’a Jyoba yujni ja juʼunik wa xyawe makunuki masni lek sok ja puntoʼiki chikani lek. Ja ajyi, kechan wa xbʼobʼ jpaklay ja juʼunik b’a Biblia ta ay ma’ skoltayon. Pe ja wego ojxa bʼobʼ jkʼul jtuchʼil. Jelni xyaki gusto xchapjel jbʼaj ja b’a reunioniki sok yajel jkomentario ja janekʼ wa xbʼobʼkuji. Wani xchʼak jkʼumuk yib’anal ja juʼunik b’a braille wa xjul jbʼaji. Ja smeranili ¡mini xbʼobʼ ajyukon sak’an ta meyuki!».

 Ja juʼunik b’a braille sok ja tuk juʼunik wa xyijan ja yaljelik it: «Ja juʼun it wa xpilxi b’a yibʼanal ja luʼumi b’a sjejel sbʼaja Biblia sok wa xbʼobʼ kʼulaxuk soka takʼin wa xyaʼawe sok spetsanil skʼujole ja ixuk winiki.mi bʼa xchonjeluk». Tsʼakatal jawa donasyonex waxa wawex b’a tuktukil modo’ik ja b’a donate.pr418.com, ja waʼelal wa xjak bʼa Dyos ayni bʼa kibʼanaltik, asta sbʼaja matik mi x-ilwani sok ja ma’ wokolxa wa x-ilwani. ¡Jel xkaʼatikon tsʼakatal yuja jel jamana kʼujolex!