Wani xbʼobʼ ajyuke seguro ja ixukeʼi | ¿Jasa wa xyala ja Biblia?
Bʼa yibʼanal ja luʼumi wa x-ixtalajiye miyonik ixuke sok yal akʼixuk. ¿Ay maʼ bʼa ekʼela bʼaj ja weʼn? Ja il oja naʼ jas yuj ja Dyos jel xyayi stʼilanil ja oj ajyan seguro sok jasa oj skʼuluk soka wokol it.
«Man yal jchʼinil jel smakʼawon sok jel xyutajon ja jnuʼi. Sok yajni nupaniyon, ja kalibʼi mi lek xyilawon. Ja yeʼn sok ja kalibʼ winiki wa xyilawone jastal skriadaʼe. Kʼot jpensaraʼuk oj mil jbʼaj» (Madhu, a India).
Ja Tsome matik wa skʼelawe sbʼaja chamelik bʼa yibʼanal luʼumkʼinal wa xyala ke «ja ixtalanel sbʼaja ixuki wan ekʼel bʼa yibʼanal ja luʼumi». Chomajkil, wa xyala ke june bʼa kada oxe ixuk wa x-ixtalajiye ma wa xkʼulajiye biolar ama jun ekʼeleʼuk ja bʼa sakʼanileʼi.
Ta jach wan ekʼela bʼaj, bʼobʼta wala xiw ke xiwela sbʼaj ja bʼa wala waji bʼa oj bʼobʼ makʼjan, oj utjan ma oj kʼuljan biolar. Yuja tikʼe ixtalanelik ma utanelik it, bʼobʼta waxa pensaraʼan ke mi maʼ skisa ja ixukeʼi. Pe ¿jastal wa xyila ja Dyosi?
Ja Biblia wa sjeʼa ke ja Dyos wa xcham skʼujol bʼa oj ajyuke seguro ja ixukeʼi.
¿Jastal wa xyila ja ixuk ja Dyosi?
Teksto bʼa Biblia: «Skʼulan winik sok ixuk» (Génesis 1:27).
Ja jas wa stojolan: Ja Dyosi skʼulan ja winik sok ja ixuki, bʼa yeʼna wani skʼana oj kistike. Chomajkil, wani smajla ke jun tatamal a-syajtay «ja xcheʼumi jastalni wa syajtay sbʼaj ja yeʼni», mini kechan oj yayi mandar, sok mini oj syajbʼes sok yaljelik bʼa yaj ma oj smakʼe (Efesios 5:33; Colosenses 3:19). Chikani lek ke ja Dyosi wani skʼana aʼajyuke seguro ja ixukeʼi.
«Man yal jchʼinil jujuntik ja bʼa jpamilya skʼulanone biolar. Yajni ay kiʼoj 17 jabʼil, ja jpatroni yalkabʼ ta mi la wayonsok oj snutson ja bʼa kaʼteli. Sok yajni niwanonxa, ja jtatami, ja jnantati sok ja jbesinoʼiki wa xyilawone ke mi jas kaʼtel. Pe tsaʼan jnaʼa sbʼaj ja Jyoba, b ja Kʼulumani. Jnebʼa ke ja yeʼn wani skisa ja ixukeʼi, soka jaw ya jkʼuʼuk lek ke wani skʼanawon sok jel chaʼanyabʼal kʼotelon bʼa yeʼna» (María, Argentina).
¿Jasa oj skoltaya bʼa oj tojbʼuk ja jastal yajbʼel aya xa wabʼi?
Teksto bʼa Biblia: «Ay jun kamigotik bʼa mas kʼubʼan ke yuj jun kermanotik» (Proverbios 18:24).
Ja jas wa stojolan: Jun meran amigo ma amiga ojni skoltaya. Cholo yabʼ june maʼ waxa jipa kʼujol ja jastal aya xa wabʼi ta waxa wila oj skoltaya.
«Ekʼ 20 jabʼil mi maʼ kalayabʼ ay maʼ skʼulanon biolar. Mini tʼun gusto ajyiyon. Jel chamkʼujol ajyiyon sok yaki depresión. Pe yajni tsamalxta smaklayon ja maʼ jcholo yabʼi, jel xlikiki kabʼ wajyon» (Elif, Turquía).
Teksto bʼa Biblia: Awik «ekʼyi spetsanil jawa chamkʼujolex ja yeʼni [ja Dyos], yujni ja yeʼni wa xcham skʼujola mokex» (1 Pedro 5:7).
Ja jas wa stojolan: Yajni waxa wayi orasyon ja Dyosi, ja yeʼn tolabida wa smaklay (Salmo 55:22; 65:2). Jelni skʼanawa ja Dyosi, ja yuj ojni skoltaya bʼa oja wil jel chaʼana wabʼalil.
«Snajel sbʼaj ja Jyoba skoltayon bʼa kʼe tojbʼukon ja bʼa jastal ayon xkabʼ yuja jastik skʼulanekiʼi. Ja wego wanxani xbʼobʼ jcholyabʼ jaman lek ja jastal ayon xkabʼ bʼa orasyon. Ja Dyosi jach jastal jun kamigo bʼa wa xyabʼyon lek stojol ja jastal ayon xkabʼi» (Ana, Belice).
¿Oj maʼ kʼot jun kʼakʼu oj xchʼaysnajel ja Dyos ja jastal wa x-ixtalaji ja ixuki?
Teksto bʼa Biblia: «Oja kʼulyi bʼa toj ja matik mebʼa sok ja matik tʼenan ay xyabʼi bʼa jachuk mixa oj ajuk xiwuke mas yuja winik bʼa luʼumi» (Salmo 10:18).
Ja jas wa stojolan: Jelxa mojan oj xchʼaysnajel ja Jyoba ja jastik mi tojuk, bʼa tini chʼikan ja yixtalajel sok skʼulajelyi bʼa mi lekuk ja ixukeʼi.
«Snajel ke ja Jyoba ojxta xchʼaysnajel ja ixtalanel sbʼaja ixuki sok ja yal akʼixuki jelni xlikiki xkabʼi. Yaʼunejki lamanil ja bʼa jpensari» (Roberta, México).
Ta waxa kʼana oja naʼ mas sbʼaja smajlajel wa xyaʼa ja Biblia, jas yuj wa xbʼobʼa jipa kʼujol sbʼaja smajlajel sok jastal ja testigoʼik bʼa Jyoba wala koltanitikon soka Biblia, kʼana maʼ oj yulataya.
a Tukbʼesnubʼal ja bʼiʼilalik.
b Ja Dyosi sbʼiʼil Jyoba (Salmo 83:18). Kʼela ja artikulo «¿Machunkiluk ja Jyoba?».