Ja bʼa tsaʼanikxta 30 jabʼil, jitsan kristyano spensaraʼunej ke ayxa lamanil ja bʼa luʼumi, sok wan tojbʼel. Pe ja pensar jaw wani tukbʼel, jastalni wa xyala ja notisyaʼik nochani:

•   «Kʼini ja chamkʼujol ke ja guerra bʼa Gaza apukxuk yuja tiro yiʼoj ja Israel sok ja Hizbulá ja bʼa frontera bʼa Líbano» (Reuters, 6 bʼa enero bʼa 2024).

•   «Ja Irán yajkʼachil ekʼele wa skʼana oj tiroʼanuk soka Occidente, pe ja ekʼele it tey smok ja Rusia sok ja China. Ja soldadoʼik bʼa Irán wane tiroʼanel bʼa jitsan parte, sok junta chʼaykʼujol ja país it cha kʼe stulyi skʼulajel niwak bombaʼik» (The New York Times, 7 bʼa enero bʼa 2024).

•   «Ja ixtalanel bʼa Rusia jeltoni wan yajel wokol ja bʼa Ucrania» (UN News, 11 bʼa enero bʼa 2024).

•   «Ja jastal wan rikoʼaxel sok ja wan ajyel mas soldadoʼik ja bʼa China, ja jastal wa skʼana oj ajyuk libre ja Taiwán jastal País sok ja kʼumal yiʼoj ja Pekín sok ja Washington snikunej bʼa oj kʼeʼuke tiro» (The Japan Times, 9 bʼa enero bʼa 2024).

 ¿Ay maʼ jas wa xyala ja Biblia sbʼaja tiroʼik wa xkilatik ja bʼa jtyempotik? ¿Oj maʼ snik bʼa oj ajyuk jun guerra bʼa sutanal ja luʼumi?

 Ja Biblia mi yalakan jastik guerra oj kiltik ja bʼa jtyempotik. Pe yalanikan ke oj ajyuk jitsan tiroʼanel bʼa wan sjapjel «ja lamanil ja bʼa luʼumi» (Apocalipsis 6:4).

 Ja bʼa libro bʼa Daniel yalakan ke «ja bʼa xchʼakulabʼil ja tyempo» ja chonabʼik bʼa jel ja yipe ja bʼa luʼumi bʼa skontra sbʼaje oj ochuke bʼa «jun guerra», ma jun tiro yuja mandaranel. Ja bʼa tiro jaw ojni sjeʼe janekʼto yip yiʼoje sok oj xchʼake jitsan jastik «jel chaʼanyabʼal», wa xkʼan kaltik, jitsan takʼin (Daniel 11:40, 42, 43).

 Ja Biblia wa xyala ke ja jas wan ekʼel ja bʼa luʼumi ojni jomuk mas. Ja Jesukristo yalakan ja it: «Oj ajyuk jun niwan wokol. Man kʼejan ja luʼumkʼinali sok man wego, mini bʼa ajyel jun wokol jastal jaw» (Mateo 24:21). Ja «niwan wokol» jaw oj chʼakuk sok jun guerra wa sbʼiʼilan Armagedón, bʼa wa x-alxi ke jaʼa «guerra oj ajyuk ja bʼa niwan skʼakʼu ja Dyosi, ja Maʼ kechan jel ja yipi» (Apocalipsis 16:14, 16).

 Pe ja Armagedón mini oj xchʼaysnajel ja kristyanoʼik, jaʼuktoma ojni skoltay. Soka guerra jaw, ja Dyos oj xchʼaysnajel ja gobyernoʼik, bʼa yeʼnani smule yuja ay jitsan guerraʼik jel xiwela sbʼaj. Ta waxa kʼana oja naʼ jastal ja Armagedón oj yijan lamanil bʼa tolabida, kʼuman ja artikuloʼik it:

•   ¿Jasunkiluk ja Armagedón?

•   Ja Armagedón juni lekil notisya