¿Jelxa maʼ mojan ja xchʼakelal ja luʼumkʼinali? ¿Jasunkiluk ja Apocalipsis?
¿Bʼa jas waxa pensaraʼan yajni waxa wabʼ ja yaljel Apocalipsis? ¿Wan maʼ xa pensaraʼan bʼa jun niwan desgrasya bʼa bʼobʼta oj xchʼaysnajel ja sakʼanil ja bʼa Luʼumi? Jujuntik kristyano wa skʼuʼane ke jani jaw ja jas mero oj ekʼuki, sok mas ja yajni wa skʼumane jujuntik notisya jastal ja it.
«Wani xbʼobʼ kʼot smeranil ja oj nijkuk jun niwan guerra, sea gana, yuj jun desgrasya ma yuj mi abʼxi stojol jun jasunuk» (Boletín de Científicos Atómicos).
«Ja bʼa tsaʼanikxta 10 jabʼili, bʼa yibʼanal ja luʼumi jelxa jelxita-el ja tsatsal ikʼ sok jaʼ, ja tsikʼinalik, ja mi xyaʼa jaʼi, ja jel yaj ja kʼaʼuji, ja bʼutʼ jaʼik sok ja wa x-el ja yelaw ja coraliki» (National Geographic).
«Ja nole jachʼbʼenik ja bʼa África masxani jel niwakik sok masxani jel wego xchʼakwani» (The Associated Press).
¿Oj maʼ chʼayjuk snajel ja Luʼum yuj jun Apocalipsis? ¿Jasa wa xyala ja Biblia?
¿Jelxa maʼ mojan ja xchʼakelal ja luʼumi?
Miyuk. Ja Yabʼal ja Dyos, ja Biblia, wa skʼapakitik ke ja Luʼumi ojni ajyuk bʼa tolabida (Eclesiastés 1:4). Jaʼuktoma oj xchʼaysnajel ja luʼum yeʼn skʼulani, ja Dyosi ojni xchʼaysnajel «ja matik wane sjomjel ja luʼumi» (Apocalipsis 11:18).
¿Jelxa maʼ mojan ja xchʼakelal ja luʼumkʼinali?
Soka jastalni wa xyala ja Biblia, ja «luʼumkʼinal» bʼa wanxa mojxel ja xchʼakelali jani kʼotel ja tsome kristyanoʼik bʼa mi skisawe ja stojelal ja Dyosi sok wa skʼulane ja jas wa skʼanaweʼi. Ja Dyosi jachni junxta oj skʼuluk jastal skʼulan ja bʼa skʼakʼujik ja Noé: ojni xchʼaysnajel ja «luʼumkʼinal bʼa mi xiwyeyuj ja Dyosi» (2 Pedro 2:5; 3:7).
Jastalni wa xyala ja 1 Juan 2:17, «ja luʼumkʼinali wanxa chʼakel sok cha jachuk ja jastik wa xkʼankʼuniyuji». Ja yaljelik it bʼa Biblia wani xchiktes lek ke ja Dyosi mini oj xchʼaysnajel ja luʼumi, jani oj xchʼaysnajel ja kristyanoʼik bʼa mi xyaʼawekan skʼulajel jastik mi lekuk.
¿Jas tyempo oj jakuk ja chʼakelal?
Ja Biblia mini xyala jas mero tyempo (Mateo 24:36). Ja jas wa xyala es ke jelxa mojan. ¿Jastal wa xnaʼatik? Ja Biblia yalakan ja it:
Oj ajyuk guerraʼik, waʼin, chamelik wa spuku sbʼaj sok tsatsal terremotoʼik «bʼa tuktukil lugar» (Mateo 24:3, 7, 14; Lucas 21:10, 11; Apocalipsis 6:1-8).
Ja kristyanoʼiki jelxelxa oj waj skʼujol sbʼaje. Jun sjejel, «ojni syajtaye ja takʼini» sok mi oj yaʼe tsʼakatal, sok mi oj skom sbʼaje (2 Timoteo 3:1-5).
Jitsan kristyano akuerdoni aye ke masan bʼa jabʼil 1914 ja jas wan ekʼel ja bʼa luʼumi wani slaja sbʼaj soka jas yalunejkan ja Biblia, sok ja yujil, akuerdoni aye ke jelxa mojan ja chʼakelal. Ta waxa kʼana oja naʼ mas, kʼuman ja artikuloʼik «¿Qué indica la cronología bíblica sobre el año 1914?» sok «¿Cuál es la señal de ‘los últimos días’ o de ‘los tiempos finales’?».
¿Jas wa stojolan ja bʼa Biblia ja yaljel Apocalipsis?
Ja bʼa Biblia, ja yaljel axi makunuk ja bʼa griego sok wa sutxi jastal «apocalipsis» wa stojolan ‹yajel eluk ja smajkili› ma ‹yajel eluk ja smusulabʼili›. Jani wa xkʼan yal ja yajni wa x-aji chijkajuk jun jasunuk bʼa nakʼan ay ajyi. Ja Biblia cha wani staʼa tiʼal sbʼaja apocalipsis ma ja yajni xjeji ja Kajwaltik Jesús, sok ja it ojni ilxuk yajni xchijkaji ke ja Jesús yeʼn yiʼoj ja ipal bʼa yajel eluk ja jas mi lekuk ja bʼa Luʼumi sok oj yayi stsʼakol ja matik wa stoyowe ja Dyosi (2 Tesalonicenses 1:6, 7; 1 Pedro 1:7, 13).
Ja bʼa tsaʼanxta libro ja bʼa Biblia wa sbʼiʼilan Apokálypsis yujni wa xchiktes jastik junuk bʼa oj ekʼuk ja bʼa tyempo jakumi (Apocalipsis 1:1). Ja bʼa libro it ayiʼoj lekil rasonik sok jun smajlajel (Apocalipsis 1:3). Wani sjeʼa ke ja Dyos ojni xchʼaysnajel yibʼanal ja jastik bʼa mi tojuki sok oj ya paxuk ja Luʼumi jun tsamal lugar. Yajni x-ekʼ ja it, ja kristyanoʼiki mixa oj yabʼye syajal, mixa oj yiʼe wokol... Asta mixa oj ajyuk ja chamelal (Apocalipsis 21:3, 4).
¿Wan maʼ xa kʼana oja naʼ mas sbʼaja jastik jel tsamal wa skʼapa ja Biblia? Ja testigoʼik bʼa Jyoba wa skʼapawe estudio bʼa Biblia jach kʼebʼubʼal? ¿Jas mixa leʼa ja yeʼnleʼi?