¡AJYANIK K’ELAN JAKAN!
¿Ti maʼ oj stulyi bʼa Israel ja Armagedoni? | ¿Jasa wa xyala ja Biblia?
Ja Biblia mi xyala ke ja Armagedón oj ajyuk jun tiroʼanel bʼa jun ita lugar. Jaʼuktoma, wa xyala ke juni sguerra ja Dyos soka gobyernoʼik bʼa yibʼanal ja luʼumi.
«Kʼotel rasonik jakel bʼa pukujik [...] bʼa jachuk oj tsomjuke ja reyik ja bʼa guerra oj ajyuk ja bʼa niwan skʼakʼu ja Dyosi, ja Maʼ kechan jel ja yipi [...]. Sok stsomowe ja reyik ja bʼa lugar wa sbʼiʼilan Armagedón ja bʼa hebreo» (Apocalipsis 16:14, 16).
Ja yaljel Armagedón ti eleljan bʼa yaljel hebreo Har Meghiddóhn, bʼa wa stojolan «wits bʼa Meguidó». Ja Meguidó wajni jun chonabʼ ja bʼa slujmal ja poko Israel. Ja yuj, jujuntik wa skʼuʼane ke ja Armagedón ti oj ajyuk bʼa Israel. Pe ja bʼa slujmal Meguidó sok ja bʼa slujmal ja oeste bʼa Asia (Oriente Próximo) mini jel niwanuk bʼa oj stsom sbʼaje ja «reyik bʼa yibʼanal ja luʼumi» sok ja soldadoʼiki.
Ja libro bʼa Apocalipsis tsʼijbʼaji «sok senyaʼik», wa xkʼan alxuk, axi makunuk jun kʼumal bʼa kechanta wa senyaʼan (Apocalipsis 1:1). Ja yuj, ja Armagedón mini kʼoteluk jun meran lugar, pes jani ja jastal wa xtax ja luʼumkʼinali bʼa oj stsom sbʼaje yibʼanal ja chonabʼik ja bʼa tsaʼanxta tiroʼanel oj ajyukyujile soka smandaranum ja Dyosi (Apocalipsis 19:11-16, 19-21).