«Ja kristyano jelni jas wane skʼulajel bʼa wa sjomo ja tyempo: Niwan chonabʼik wa xbʼutʼ jaʼ. Ja jelxelxa ja skʼixnal ja kʼaʼuj. Tsatsal ikʼ jaʼ xiwelaʼik sbʼaj. Ja mixa ay lek jaʼ. Ja jastal wan chʼayjel snajel miyonik kʼulik sok chanteʼik. Ja jas wa xkala mini lomuk sok mini jelxeluk. Jani ja jas wa xyala ja ciencia, ja jas oj ekʼuk ta ja gobyernoʼik mi stukbʼese ja jastal wane yajel makunuk ja lusi» (Ja sloʼil ya ekʼuk ja António Guterres, jun secretario ja bʼa Naciones Unidas, bʼa ti ya eluk ja bʼa inporme bʼa Grupo Intergubernamental de Expertos sbʼaja Cambio Climático bʼa 4 bʼa abril bʼa 2022).

 «Ja científicoʼik wa xyalawe ke ja bʼa jabʼilik jakumi, ja desgrasyaʼik bʼa ti chʼikan soka jastal wa xtukbʼi ja tyempo ojni sjom tʼusan mi yibʼanaluk ja parke bʼa Estados Unidos, bʼa jani mas kʼixin wa x-ekʼ ja kʼaʼuj. Ja jastal oj jomjuk ja 423 parkeʼik jelni xiwela sbʼaj: wa x-el kʼakʼ sok bʼutʼ jaʼ, ja wan ulbʼel ja hielo, ja mar bʼa wan smusjel ja luʼumi sok ja skʼixnal ja kʼaʼuj» («Flooding Chaos in Yellowstone, a Sign of Crises to Come» [Ja jastal jelxa ja bʼutʼ jaʼik ja bʼa Yellowstone, juni senya ja bʼa wokolik jakumto], The New York Times, 15 bʼa junio bʼa 2022).

 ¿Ojto maʼ tojbʼuk ja wokolik wan sjomjel ja luʼumkʼinali? Ta jachuki, ¿jastal? Ila ja jas meran wa sjeʼa Biblia.

 Ja Biblia wa xyala ke ja Dyos oj «xchʼayjel snajel ja matik wane sjomjel ja luʼumi» (Apocalipsis 11:18). Ja bersikulo it wa sjeʼakitik oxe jasunuk:

1.  1. Ja kristyanoʼik jelni oj sjome ja Luʼumi.

2.  2. Ja wokolik wa sjomo ja luʼumkʼinali ojni tojbʼuk.

3.  3. Yeʼnani ja Dyos oj stojbʼes ja wokolik it, sok mi jaʼuk ja kristyano.

 Ja Biblia wa xya jkʼuʼuktik ke «ja luʼumi tolabida oj ajyuk» (Eclesiastés 1:4). Tolabidani oj ajyuk swinkil.

•    «Ja matik toji oj sbʼajuke ja luʼumi, sok ti tiw oj ajyuke sakʼan bʼa tolabida» (Salmo 37:29).

 Ja Luʼumi ojni pax jastal ajyi sok jelni tsamal oj ajyuk.

•    «Ja takin kʼinal soka takin luʼumi oj bʼut-el gustoʼil, sok ja lajan kʼinal bʼa takini gusto oj ajyuk sok oj nichinuk jastal ja azafrán» (Isaías 35:1, Ja yajkʼachil sjuʼunil ja Dyosi).