Ja bʼa julio bʼa 2022, ilxi ke bʼa yibʼanal ja luʼumkʼinal jelxani jelxel wa x-ekʼ ja skʼixnal ja kʼaʼuj.

•   «Ja bʼa ixaw it, jaxani xchabʼil ekʼele ja matik ay xchol ja bʼa China, wa xyalweyabʼ ja kristyanoʼik ja jastal jelxelxa oj ekʼuk ja skʼixnal ja kʼaʼuj bʼa junuk 70 chonabʼik» (25 bʼa julio bʼa 2022, notisyaʼik ja bʼa CNN).

•   «Yuja bʼa Europa jelxelxa wa x-ekʼ ja skʼixnal ja kʼaʼuji, jelni wan ajyel tsikʼinal bʼa wan spukjel sbʼaj bʼa jitsan país» (17 bʼa julio bʼa 2022, The Guardian).

•   «Ja bʼa domingo, jitsan chonabʼ ja bʼa Estados Unidos jelxelxani ekʼ ja skʼixnal ja kʼaʼuj, yuja skʼixnal ja kʼaʼuj bʼa kuaresma wan spukujel sbʼaj ja bʼa costa este, parteʼik ja bʼa sur sok ja bʼa Medio Oeste» (24 bʼa julio bʼa 2022, The New York Times).

 ¿Wan maʼ stojolan ja it ke mi oj bʼobʼ ajyukotik sakʼan ja bʼa Luʼum ja bʼa tyempo jakumi? ¿Jasa wa xyala ja Biblia sbʼaja it?

 Yalaniʼa. Ja jastal jel kʼixin wa x-ekʼ ja kʼaʼuj wani xchiktes lek ja jas wa xyala ja Biblia sbʼaja jas oj ekʼuk ja bʼa jtyempotiki. Jun sjejel, ja Jesús yala ke ojni kiltik «jastik jel xiwela sbʼaj» (Lucas 21:11). Jitsan kristyano jelni xcham skʼujole yuja jel wan kʼeʼel ja skʼixnal ja kʼaʼuj sok wani xiwye mixa oj bʼobʼ ajyuk sakʼanil ja bʼa Luʼumi.

 Ojniʼa. Yujni ja Dyosi skʼulan ja Luʼumi bʼa ti oj ayuke sakʼan tolabida ja kristyanoʼiki (Salmo 115:16; Eclesiastés 1:4). Ja yeʼn mini oj yakan bʼa oj chʼayjuk snajel ja luʼumi. Jaʼuktoma, ja yeʼn wani skʼapa oj xchʼay snajel «ja matik wane sjomjel ja luʼumi» (Apocalipsis 11:18).

 Cha la kiltik chabʼ jasunuk yalunej ja Dyos oj skʼul soka Luʼumi:

•   «Ja takin kʼinal soka takin luʼumi oj bʼut-el gustoʼil, sok ja lajan kʼinal bʼa takini gusto oj ajyuk sok oj nichinuk jastal ja azafrán» (Isaías 35:1, Ja yajkʼachil sjuʼunil ja Dyosi, [YD]). Ja Dyos mini oj yakan ke ja Luʼumi oj pax jun desierto bʼa mi oj ajyuk swinkil, jaʼuktoma ojni stojbʼes ja jastal jomubʼali.

•   «Ja weʼn waxa talnay ja luʼumi sok jelni lek sok tsamal xwa ajyuk» (Salmo 65:9). Ja Dyos ojni ya paxuk ja luʼum jun Tsamal Lugar.

 Bʼa oja naʼ mas ja jastal wa xtukbʼi ja tyempo jani wan kʼotel smeranil ja jas yalunejkan ja Biblia, kʼuman ja artikulo «¿Qué dice la Biblia sobre el cambio climático y nuestro futuro?».

 Bʼa oja naʼ mas sbʼaja skʼapjelal wa xyaʼa ja Biblia ja jastal ojto tojbʼuk ja jastik wa sjomo ja luʼumkʼinali, kʼela ja artikulo, «¿Quién salvará el planeta?».