¡AJYANIK K’ELAN JAKAN!
¿Maʼ oj stalnay ja matik mi xchʼika sbʼaje? | ¿Jasa wa xyala ja Biblia?
Ja Naciones Unidas wa xyala ja it:
Yuja tiroʼik ajyi ja bʼa Gaza sok bʼa Israel ja bʼa 7 man 23 bʼa octubre bʼa 2023, smila mas ja 6,400 kristyano sok yajbʼelkan 15,200, jitsan ja bʼa jaw mi soldadoʼuke. Chomajkil, jitsan spakuneje ajnel.
Jaxa bʼa 24 bʼa septiembre bʼa 2023, yuja guerra bʼa Rusia soka Ucrania chamyetani 9,701 bʼa mi soldadoʼuke sok yajbʼelkan 17,748 ja bʼa Ucrania.
¿Ay maʼ jas wa xyala ja Biblia bʼa oj yayi smajlajel ja matik wa xyiʼaje wokol yuja guerra?
Jun rason bʼa oj ajyukujtik smajlajel
Ja Biblia wa xyala ke ja Dyosi oj xchʼaysnajel ja guerra bʼa sutanal ja Luʼumi (Salmo 46:9). Bʼa oj lajxukyuj, jani oj xchʼaysnajel ja gobyernoʼik ja bʼa luʼumi bʼa jaxani oj yakan ja sGobyerno bʼa satkʼinali (Daniel 2:44). Ja sGobyerno ja Dyos oj yijanyi lamanil ja kristyano.
Kʼelawik jasa oj skʼuluk ja Jesukristo, ja Rey ja bʼa sGobyerno ja Dyos:
«Oj skoltay ja pobre bʼa wa x-awani skʼanjel skoltajeli, cha jachuk ja maʼ chʼin wa xyaʼa sbʼaji sok yibʼanal ja matik mi maʼ wa xkoltajiyuji. Oj snaʼ syajulal ja maʼ chʼin wa xyaʼa sbʼaji sok ja pobreʼi, sok oj skoltay ja sakʼanil ja matik pobre. Oj ya el libre ja bʼa tʼenwanel sok ja bʼa spekʼjel chikʼi» (Salmo 72:12-14).
Ja Dyos oj yamakunuk ja sGobyerno bʼa oj xchʼaysnajel ja wokolik sok tristeʼil wa xyiʼajan ja guerra sok ja spekʼjel chikʼi.
«Oj skusyi ja yalel sateʼi, sok mixani oj ajyuk chamelal, mixani tristeʼil, mini mebʼa okʼel sok mini syajal. Ja jastik mi lekuk wa x-ekʼ ajyi chʼayta snajel» (Apocalipsis 21:4).
Ja sGobyerno ja Dyos jelxani mojan oj stukbʼes jastik ja b’a Luʼumi. ¿Jastal wa xnaʼatik? Yujni ja Biblia yala ke oj ajyuk guerra’ik sok «yabʼalil guerraʼik» bʼa wani xkilatik ja wego (Mateo 24:6). Ja it sok pilan jastik wan ekʼel wa sjeʼa ke tixa aytik ja b’a «tsaʼanikxta kʼakʼu» sbʼaja gobyernoʼik ja bʼa luʼumi (2 Timoteo 3:1).