•    «Ja bʼa janekʼ ochelkan juʼun, ja China jaxani ja yoxil verano mas takin wan ekʼelyuj sok jelni wan yijel wokol yuja syajal ja kʼaʼuj» (The Guardian, 7 bʼa septiembre bʼa 2022).

•    «Wani xmajlaxi ke ja bʼa Gran Cuerno de África ja mi xyaʼa jaʼi, jaxani oj snochyi ja sjoʼil jabʼili» (Notisyaʼik bʼa ONU, 26 bʼa agosto bʼa 2022).

•    «Ja bʼa mas ja snalan ja Europa xiwelani sbʼaj ay bʼa mixa oj ya jaʼ, bʼobʼta jani ja mas oj jelxuk yuja janekʼ ekʼelxajan ja bʼa 500 jabʼil» (BBC News, 23 bʼa agosto bʼa 2022).

 Jitsan matik jel chapan wani xyalawe ke ja mixa oj ya jaʼi ojni snochyi ma asta oj ipaxuk mas. ¿Wan maʼ xbʼobʼ jmajlaytik ke ja jastik junuk oj tojbʼuk? ¿Jasa wa xyala ja Biblia?

 Ja it ja jas yalunejxakan ja Biblia sbʼaja jtyempotik:

•    «Bʼa tuktukil lugar oj ajyuk waʼin» (Lucas 21:11).

 Bʼa jitsan ekʼele, ja mi xyaʼa jaʼ wa xyiʼajan waʼin. Sok ja jastik alubʼalxakan ja bʼa Biblia jani wa staʼa tiʼal sbʼaja waʼin sok ja jastik wa xyiʼajani: wokol sok chamelal (Apocalipsis 6:6, 8).

 Ja Biblia wani xchiktes june ja bʼa rasonik mas tʼilani. Ja tiw wa xyala:

•    «Sok mini ja winik wan bʼejyeli wa sbʼajin oj stoj ja sbʼeji» (Jeremías 10:23).

 Ja jaw wa stojolan ke ja kristyano mini lek oj wajyujile ta yeʼn wa sleʼawe modo stojel ja sbʼejeʼi ma bʼa yeʼnta oj ya sbʼaje mandar. Sok tikʼanxta ja jastik mi lek wa stsaʼawe wa xyiʼajan bʼa oj chʼakuk ja jaʼik sok bʼa mixa oj ya.

•    Tʼusan mi yibʼanaluk ja científicoʼik akuerdoni aye ke ja jastik wa skʼulan ja kristyano wani xyiʼajan bʼa oj ajyuk ja calentamiento global. Sok yuja jaw mixani xyaʼa lek jaʼ bʼa yibʼanal ja luʼumi.

•    Ja parteʼik bʼa ay jaʼ cha xiwelani sbʼaj ay. ¿Jas yuj? Yujni ja kristyanoʼik bʼa yeʼnta wa xwaj skʼujol sbʼaje sok bʼa wa sleʼawe yeʼnta oj yawe el slekilal bʼa mi spensarane sbʼaja tyempo jakum, wa xyiʼajejan wokolik jastal ja skʼutsjel ja teʼaltik, yajel kuxbʼuk ja luʼumi sok ja mi xyawe makunuk lek ja jastik ay ja bʼa luʼumi.

 Pe ja Biblia wa xyakitik jun smajlajel.

 Ja Biblia wa skʼapa ke ja Dyos oj stojbʼes ja wokol bʼa jaʼi. ¿Jastal oj skʼuluk?

1.  1. Ja Dyos oj ‹xchʼaysnajel ja matik wane sjomjel ja luʼumi› (Apocalipsis 11:18). Oj xchʼaysnajel june ja bʼa wokolik wa xyiʼajan ja mixa oj ajyuk ja jaʼi: ja kristyanoʼik jel malo sok bʼa yeʼnta wa xwa skʼujol sbʼaje bʼa wa xyixtalane ja luʼumi (2 Timoteo 3:1, 2).

2.  2. «Ja luʼum bʼa takinxa yuja kʼaʼuji oj pax jun pampa jaʼ bʼutʼel kʼaʼemik» (Isaías 35:1, 6, 7). Ja Dyos oj stojbʼes yibʼanal ja jastik sjomunej ja mixa xyaʼa jaʼi sok oj ya paxuk ja Luʼum jun tsamal lugar bʼa mixa oj chʼakuk ja jaʼi.

3.  3. «Weʼn waxa talnay ja luʼumi sok jel xwa bʼaʼalanuk juntiro» (Salmo 65:9). Soka skoltanel ja Dyos, ja Luʼumi bʼutʼel oj ajyuk lekil waʼelal sok lekil jaʼ bʼa jpetsaniltik.