¡AJYANIK K’ELAN JAKAN!
¿Meran ma’ wa xbʼobʼ stsom ja kristyano ja futbol mundial? | ¿Ay maʼ jas wa xyala ja Biblia?
Wani xmajlaxi ke junuk 5 mil miyon kristyano oj yil-e ja Copa Mundial bʼa FIFA, bʼa kʼe stulyi bʼa 20 bʼa noviembre man 18 bʼa diciembre 2022. Jitsan wa spensaraʼane ke ja tajnelik jastal it, mini kechanuk oj lajxukyuj bʼa stsomjel ja kristyano bʼa oj skʼel-e, ojni lajxukyuj mas.
«Ja tajneli ayni yiʼoj ja ipal bʼa stukbʼesel ja luʼumkʼinali, ayiʼoj ja ipal bʼa yajel gustoʼaxukotik, ayiʼoj ja ipal bʼa stsomjel ja kristyanoʼiki, bʼa mini xlajaxiyuj tuk jasunuk» (Nelson Mandela, expresidente bʼa Sudáfrica).
«Ja futboli […] wa xya ajyukotik tsoman ja bʼa smajlajel; sok wa xya ajyukotik tsoman ja bʼa gustoʼil, ja bʼa yajalkʼujol sok ja jastal tuktukil kʼotelotik » (Gianni Infantino, presidente bʼa FIFA). a
¿Oj maʼ lajxukyuj ja fútbol mundial ma pilan tuk tajnel ja jastik jaw bʼa lek? ¿Ay maʼ jun smajlajel bʼa oj taxuk ja lamanil soka ajyel tsoman?
¿Wan maʼ xya ajyukotik tsoman?
Ja mundial ja bʼa jabʼil it, mini kechanuk kʼotel fútbol. Ja tajnel it yaʼunej kʼe kʼumal sbʼaja jastal wa xyila sbʼaje soka tuk, sbʼaja politika sok sbʼaja jastik ti chʼikan ja sderecho ja kristyanoʼik, ja stsajel ja maʼ lek yiljeli soka jujuntik pobreʼeʼi.
Anima jachuk, jitsan wa spensaraʼane ke ja tajnel jastal it bʼa wa xjakye bʼa tuktukil lugar, jastal ja fútbol mundial, wani xyaʼakan ke ja kristyano oj yawe ekʼ jun rato tsamal. Pe anima jach wa skʼana ja kristyano, ja tajnelik it mini wa stsomo ja kristyano bʼa tolabida. Pes wani xchiktese ja jasa wa spensaraneʼi sok jasa wa skʼulane bʼa spiljel ja kristyano. Ja Biblia wanxani staʼa tiʼal ja tikʼe modoʼik jaw sok wa xyala jach oj sjeʼ ja smodoʼe ja bʼa tyempo wa sbʼiʼilan «tsaʼanikxta kʼakʼu» (2 Timoteo 3:1-5).
Ja jas meran oj ya ajyuk tsoman ja luʼumkʼinali
Ja Biblia wa staʼa tiʼal bʼa jun meran smajlajel bʼa oj ajyuk tsoman ja kristyano. Wa skʼapa ke yibʼanal ja kristyano bʼa luʼum oj ajyuk tsoman yuja gobyerno bʼa satkʼinal, wa sbʼiʼilan ja «sGobyerno ja Dyosi» (Lucas 4:43; Mateo 6:10).
Ja sReyil ja gobyerno jaw, ja’a Jesukristo, sok ye’nani oj yil ke oj ajyuk slamanil ja b’a Luʼumi. Ja Biblia wa xyala:
«Ja maʼ toji oj nichinuk, sok ja slamanili oj pojxuk el» (Salmo 72:7).
«Oj skoltay ja pobre bʼa wa skʼana skoltajeli […]. Oj ya el libre ja bʼa tʼenwanel sok ja bʼa spekʼjel chikʼi» (Salmo 72:12, 14).
Ja bʼa jtyempotiki ja jas sjeʼa ja Jesús, stsomunejxa miyon kristyanoʼik, bʼa 239 paisik sok lugarik sok skoltunej bʼa oj eluke libre soka ilkʼujolanel. Bʼa oja naʼ mas kʼuman ja artikuloʼiki «Jastal yajelkan smakʼlajel ja ilkʼujoli».
a Ja Federación Internacional bʼa Fútbol Asociación jani ja institución bʼa wa xyaʼa mandar ja matik wa x-och bʼa futbol bʼa sutanal ja luʼumi.