¡AJYANIK K’ELAN JAKAN!
Ja snochumanik Kristo sok ja guerra | ¿Jasa wa xyala ja Biblia?
Ja guerra bʼa Ucrania sjeʼunej jaman lek ke jitsan olomalik bʼa relijyon wa xnikwaniye wajel ja bʼa guerra. Ila jastal skoltuneje bʼa xchabʼil lado:
«Wa xkʼana oj jtoytikon sok yajelyi tsʼakatal ja jsoldadotikon bʼa wa skoltaye ja xchonabʼe Ucrania ja bʼa skontraʼe […]. Tolabida tini oj ajyukontikonsoke, yajelyi orasyon bʼa yeʼnle sok oj koltayetikon» (metropolitano Epifanio I de Kiev, The Jerusalem Post, 16 bʼa marzo bʼa 2022).
«Ja domingo it, ja olomal bʼa Iglesia ortodoxa rusa yaʼa jun misa sbʼaja soldadoʼik bʼa Rusia bʼa stsatsankʼujolajel a-skoltaye ja spaise ‹jastalni kechan yeʼn wa xbʼobʼ skʼuluke›. Jaxa soldadoʼik bʼa Moscú titoni wane tiroʼanel bʼa Ucrania» (Reuters, 3 bʼa abril bʼa 2022).
¿Tʼilan maʼ oj wajuke bʼa guerra ja snochumanik Kristo? ¿Jasa wa xyala ja Biblia?
Ja jas wa xyala ja Biblia
Ja Biblia wa xcholo ke ja meran snochumanik Kristo mini xwajye ja bʼa guerraʼik.
«Nolo bʼa snaj jawa wespada, yujni spetsanil ja maʼ wa xya makunuk ja espada ojni chamuke sok espada» (Mateo 26:52). Ta jun kristyano lek xyila ja guerraʼik ma wa xwaji, ¿meran maʼ wan skʼuʼajel ja jas yalakan ja Jesús?
«Wa xkawilex jun yajkʼachil mandar: yajta abʼajik; sok jastalni jyajtunejex ja keʼn, cha yajta abʼajik ja weʼnlexi. Sok ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik» (Juan 13:34, 35).
Ta jun kristyano wa skoltay ja guerraʼik, ¿wan maʼ sjejel ja tikʼe yajtanel yala ja Jesús bʼa wa xchiktes ja snebʼumaniki?
Ta waxa kʼana oja naʼ mas, kʼuman ja artikulo «El cristianismo y la guerra: ¿son compatibles?».
Ja snochumanik Kristo ja bʼa jtyempotik sok ja guerraʼik
¿Ay maʼ sbʼej smajlajel ke ja meran snochumanik Kristo mini tʼun xchʼika sbʼaje ja bʼa guerraʼik ja bʼa jtyempotik? Ayniʼa. Ja Biblia yalaxakan ke ja bʼa jtyempotik oj ajyuk jun tyempo wa sbʼiʼilan «tsaʼanikxta kʼakʼu» bʼa oj ajyuk kristyanoʼik bʼa spetsanil ja chonabʼi bʼa «mixani oj snebʼ-e mas ja guerra», bʼa wani syaka sbʼaj sok ja jas sjeʼa ja Jesús (Isaías 2:2, 4, nota).
Bʼa oja naʼ mas, kʼuman ja artikuloʼik ja bʼa Ja Juʼun Cholumani «¿Lek maʼ xyila ja Dyos ja kʼakʼaneli?».
Bʼa tʼusanxta ja Jyoba, a ja «Dyos bʼa lamanil», oj ya makunuk ja sgobyerno bʼa satkʼinal bʼa oj ya el libre ja kristyano «ja bʼa tʼenwanel sok ja bʼa spekʼjel chikʼi» (Filipenses 4:9; Salmo 72:14).
Bʼa oja naʼ jastal oj skʼuluk, kʼela ja bideo ¿Jasunkiluk ja sGobyerno ja Dyosi?
a Ja sbʼiʼil ja Dyosi Jyoba (Salmo 83:18).