¡AJYANIK K’ELAN JAKAN!
Jel ja spekʼjel chʼik soka armaʼik ja bʼa luʼumkʼinali | ¿Ay maʼ jas wa xyala ja Biblia?
Ja bʼa julio bʼa 2022, jelni ajyi ja spekʼjel chikʼ soka armaʼiki:
«Ja milji jun politiko jel naʼubʼal sbʼaj ja bʼa Japón, [ja maʼ ministro ajyi, ja Shinzo Abe]. Jelni chamyabʼ ja kristyanoʼik bʼa yibʼanal ja luʼumkʼinali, pe masto yuja bʼa Japón mey lek ja spekʼjel chikʼi sok yuja ay leyik sbʼaja yajel makunuk ja armaʼiki» (10 bʼa julio bʼa 2022, The Japan Times).
«Jun winik bʼa armado ay jelni ya xiwuk ja kristyanoʼik bʼa Dinamarca, yajni smila oxwane kristyano bʼa ay niwak negosyoʼik ja bʼa Copenhague» (4 bʼa julio bʼa 2022, bʼa Reuters).
«Ja bʼa Sudáfrica, jujuntik winik smilawe 15 kristyanoʼik sok armaʼik bʼa jun bar bʼa Soweto» (10 bʼa julio bʼa 2022, The Guardian).
«Mas ja 220 kristyano chamye yuj armaʼik ja bʼa Estados Unidos, yajni wan kʼintajel ja 4 bʼa julio» (5 bʼa julio bʼa 2022, CBS News).
¿Ay maʼ rasonik bʼa smajlajel oj chʼakuk spetsanil ja spekʼjel chikʼi? ¿Ay maʼ jas wa xyala ja Biblia?
Ja jastal oj chʼakuk ja spekʼjel chikʼi
Ja Biblia wa xyala ke tixa aytik ja «bʼa tsaʼanikxta kʼakʼu», jun tyempo bʼa jel kʼakʼ ja kristyanoʼik, bʼa wa sjeʼa ja smodoʼe jastal bʼa chante sok jel maloʼe (2 Timoteo 3:1, 3). Yajni wa spekʼawe chikʼ jastal it, jelni xyawe xiwuk ja kristyanoʼiki (Lucas 21:11). Pe ja Biblia wa skʼapa oj kʼotuk ja skʼakʼujil bʼa oj chʼakuk ja spekʼjel chikʼi sok ja kristyanoʼik ojxa ‹ajyuke bʼa jun lugar tolabida laman, mixa jas oj ekʼuk ja bʼa oj ajyuke sok oj ajyukyujile lamanil ja bʼa wane jijleli› (Isaías 32:18). Anto, ¿jastal oj chʼakuk ja spekʼjel chikʼi?
Ja Dyos oj xchʼak-el ja matik malo sok yibʼanal ja armaʼiki.
«Ja matik malo ojni chʼayjuk snajel ja bʼa luʼumi» (Proverbios 2:22).
«Ja [Dyos] wan yajel kʼot tikʼan ja guerra’ik bʼa yibʼanal ja luʼumi. Ja Yeʼn wa sbʼija ja arco sok wa skʼoktalan ja lanza; ja Yeʼn wa stsika sok kʼakʼ ja karretaʼik bʼa soldadoʼiki» (Salmo 46:9).
Ja Dyos oj sjeyi ja kristyanoʼik bʼa oj ajyuke laman sok jach oj xchʼay snajel ja jas yiʼonejan ja spekʼjel chikʼi.
«Mixatoni maʼ oj yixtalaʼuk sok oj sjom yibʼanal ja jwitsi, yujni ja luʼumi bʼutʼelni oj ajyuk soka snajel yiʼoj ja Jyoba jastalni ja jaʼiki sbʼutʼunej el ja mari» (Isaías 11:9).
Man jtyempotik, ja Jyoba wan sjejelyi ja kristyanoʼik bʼa mok spekʼ-e chikʼ, mok yawe makunuk ja armaʼik sok yajel paxuk «ja yespadaʼe bʼa sjutjel luʼum sok ja slansaʼe bʼa xajlanel» (Miqueas 4:3).
Ta waxa kʼana oja naʼ mas ja bʼa skʼapjelik wa xyaʼa ja Biblia bʼa jun luʼumkʼinal mixa oj ajyuk ja xiweli, kʼuman ja artikulo «¿Es posible librarse del miedo?».
Bʼa oja naʼ mas ja jastal oj tojbʼuk ja wokolik sbʼaja spekʼjel chikʼi, kʼuman ja artikulo «¡Por fin paz en la Tierra!».