¿Wan maʼ skoltayotik ja Biblia bʼa oj tekʼxukujtik?
Ja tekʼxelkujtik «jani ja modoʼal bʼa wa xya ajyuk ja lamanil» (Declaración de Principios sobre la Tolerancia de la Unesco, 1995).
Pe ja mi oj tekʼxukujtik, wani xbʼobʼ yakan ke ja kristyanoʼik mi oj skise ma oj yilkʼujoluke ja tuki. Sok ja pensarik jaw tʼusan mi spetsanil ekʼele wa x-ikʼwani och bʼa snikjel kʼumal, bʼa ilkʼujolanel ma yiljel menos ja tuk sok ixtalanel.
Pe jitsan kristyano tuktukilni ja jastal wa spensarane sbʼaja jasun kʼotel ja stekʼjel. Jujuntik wa spensarane ke jun kristyano bʼa wa xtekʼxiyuj, tʼilani akuerdo oj ajyuk sok tuktukil skʼuʼajel sok modoʼalik. Pe jujuntik jachni wa spensarane ja jastal wa xyala ja Biblia, jun kristyano bʼa wa xtekʼxiyuj wani skisa ja derecho yiʼoj spetsanil ja kristyanoʼik bʼa stsajel ja skʼuʼajel wa skʼanawe sok skʼulajel ja jas chaʼanyabʼal jeʼubʼalyile, anima mi akuerdo ayukesok.
¿Wan maʼ xbʼobʼ skoltayotik ja Biblia bʼa oj tekʼxukujtik ja bʼa yojol ja siglo 21?
Ja Biblia sok ja oj tekʼxukujtik
Ja Biblia wani xkoltani bʼa oj tekʼxukujtik. Wa xyala: «A-snaʼe yibʼanale ke ja weʼnlexi kʼotelex kristyanoʼik bʼa wala ochyex rason» (Filipenses 4:5). Cha wani stsatsankʼujolanotik bʼa oj pensaraʼuktik ja tuk, bʼa yajxta oj kiltike sok bʼa oj kʼuluktikyile ja bʼa toji. Ja yujil, ja matik wa snochowe ja rason it mini stimawe ja tuk bʼa oj skʼuluke ja jas wa skʼanawe soka sakʼanile, ama mi akuerdo ayuk soka jas wa skʼanawe sok mini spensaraʼane jastal yeʼnle.
Pe ja bʼa Biblia wani xnebʼatik ke ja Dyosi yaʼunejniyi ja bʼa skʼujole ja kristyanoʼik ja jastik yaʼunej kujlajuk sbʼaja modoʼalik. Ja tiw wa xyala: «Ja [Dyos] yalunej awabʼ, kala winik, ja jas bʼa leki» (Miqueas 6:8). Ja Dyosi wa xcholo kabʼtik ja bʼa Biblia ja jas tʼilan oj kʼuluktik ta wa xkʼana oj kabʼtik stsamalil ja bʼa lekil sakʼanili (Isaías 48:17, 18).
Chomajkil, ja Dyosi mini wa xyakitik ja cholal bʼa skʼulajel jusgar ja tuk. Ja Biblia wa xyala, «kechan ay june ja Maʼ wa xya kujlajuk ja leyi sok kechan ay jun Jues, [...] ¿machunkiluka bʼa skʼulajel jusgar jawa moji?» (Santiago 4:12). Ja yeʼn wani xyaʼakan ke kada jujune libre oj ajyuk bʼa stsajel ja jas wa skʼana sok yeʼnani oj yil ja swokolil (Deuteronomio 30:19).
Ja Biblia soka kiswanel
Ja Biblia wa xyala: «Kisawik ja tuktukil tikʼe kristyanoʼiki» (1 Pedro 2:17). Ja yuj ja matik wa stsaʼawe oj snoch-e ja jastik kujlajel ja bʼa Biblia wani skisawe yibʼanal ja kristyanoʼi, chikan jas skʼuʼajel yiʼoje ma ja tikʼe sakʼanil yiʼoje (Lucas 6:31). Pe ja it mi wa stojolan ke wa skʼulane aseptar yibʼanal ja jas wa skʼuʼane ma ja jas wa spensarane, ma wa skoltaye yibʼanal ja jas wa stsaʼawe skʼulajel ja tuk. Jaʼuktoma mi lek oj yile ma mi oj skise, wani skʼujolane bʼa lek oj yile jastalni skʼulan ja Jesús.
Jun sjejel, bʼa jun ekʼele ja Jesús snaʼa sbʼaj jun ixuk bʼa ayiʼoj jun srelijyon bʼa mini akuerdo ayuksok ja yeʼn. Chomajkil ja winik teysoki mini statamuk, sok ja Jesús mini cha lek xyila. Pe ja it mini timjiyuj bʼa oj skise (Juan 4:9, 17-24).
Jastalni ja Jesús, ja snochumanotik Kristo wani xcholotikyabʼ chikan machʼa ja skʼuʼajel kiʼojtiki, bʼa puesto aye bʼa oj smaklaye, pe wani skʼulane bʼa jun modo jastalni ja Jesús, ja snochumanik Kristo wani xcholoweyabʼ chikan maʼ puesto ay bʼa smaklajel ja skʼuʼajel yiʼoje, pe wani skʼulane bʼa jun modo wa ‹xkʼulwaniye respetar› (1 Pedro 3:15). Pes wa Biblia wani xyayi mandar ja snochumanik Kristo bʼa mokni skʼuluke obligar ja tuk bʼa a-skʼuluke aseptar ja jas wa spensaraneʼi. Wa xyala ke jun snochuman Kristo, «mini tʼilanuk oj tiroʼanuk, pes tʼilani oj sjeyi lekil smodo ja tuk», asta soka matik tuk wa spensarane (2 Timoteo 2:24).
Ja jas wa xyala ja Biblia sbʼaja ilkʼujolanel
Ja Biblia wa xyala kabʼtik: «Leʼawik ajyel laman sok yibʼanal ja kristyano» (Hebreos 12:14). Ja kristyano bʼa wa sleʼa ja lamanil wani xyijnay ja ilkʼujolanel sok wani skʼujolan bʼa ajyel laman soka tuki. Pe mini skʼoko ja jastik toj snebʼuneji (Mateo 5:9). Pes ja Biblia wa stsatsankʼujolan ja snochumanik Kristo bʼa a-syajtay ja skontraʼeʼi. Ja jaw wa stojolan sjejel lekil skʼujole asta soka matik mi lek wa x-iljiye yuji (Mateo 5:44).
Meraniʼa, ja Biblia wa xyala ja bʼa Proverbios 6:16-19 ke ja Dyos wa xyijnay ja skʼulajel jastik bʼa wa sjomo ja kristyano ma bʼa wa syajbʼes ja tuk. Pe ja il, ja Biblia wa xya makunuk ja yaljel yijnajel bʼa xchiktesel ja jastik jel kistal xyila ja Dyos: ja skʼulajel jastik mi lekuk. Ja Biblia wa xcholo ke ja Dyos puesto ay bʼa oj akʼwanuk perdon sok skoltajel spetsanil ja matik wa skʼana oj stukbʼes sbʼaje sok skʼuʼajel ja jastik yaʼunej kujlajuki (Isaías 55:7).
Tekstoʼik bʼa Biblia bʼa wa staʼa tiʼal ja tekʼxelkujtik sok ja kiswanel
Tito 3:2: «Aʼochuke rason sok tolabida manso aʼajyukesok yibʼanal ja winikeʼi».
Jun kristyano bʼa wa x-och rason, wani x-ajyi laman yajni wa xyalawe ja tuk ja jas wa spensaraʼane yajni mi jachukuk wa spensaraʼan ja yeʼn sok wani xkoltani bʼa oj skis sbʼaje.
Mateo 7:12: «Kʼulanikyi ja tuk yibʼanal ja jas waxa kʼana oj skʼulukawilex ja weʼnlexi».
Jpetsaniltik wa xkʼanatik oj kisjukotik sok oj kisjuk ja jas wa xpensaraʼantiki sok ja jastal wa xkabʼ aytiki. Bʼa snajel mas sbʼa jastal oj katik makunuk ja mandar it sbʼaja modoʼal sjeʼakan ja Jesús, kʼela ja artikulo «¿Qué es la Regla de Oro?»
Josué 24:15: «Tsaʼawik ja yan maʼ waxa kʼana oja waʼteltayex».
Wa xkatik ajyuk ja lamanil yajni wa xkisatik ja sderechoʼe ja tuk bʼa stsajel ja jas wa skʼana oj skʼuluke ja tuk.
Hechos 10:34: «Ja Dyosi mini june maʼ menos wa xyila».
Ja Dyosi mini maʼ menos wa xyila yuja skultura, ta ixuk ma winik, ja xchonabʼi, ja srasa ma ja jastal ja sakʼanil ajyi ma ja jastal wa xtax ja wego. Ja matik wa skʼanawe oj snoch-e ja smodo ja Dyosi wani skisawe yibʼanal ja kristyanoʼik.
Habacuc 1:12, 13: «Mini xkuchawuj yiljel ja bʼa malo».
Ja janekʼ wa xkuchyuj ja Dyosi ayni stikʼanil, ja yeʼn mini oj yakan ke ja kristyanoʼiki oj snoch-e skʼulajel jastik mi lekuk bʼa tolabida. Bʼa oja naʼ mas kʼela ja bideo ¿Jas yuj ja Dyos wanto yajelkan aʼekʼuk wokolik?
Romanos 12:19: «Awikan yeʼn a-sjeʼ ja stajkelal ja Dyosi. Yujni tsʼijbʼunubʼal: ‹Keʼn oj ka stupe; keʼn oj kayile kastigo›, jach wa xyala ja Jyoba». a
Ja Jyoba mini maʼ yaʼunejyi permiso bʼa oj yayi stup ja tuk. Ja yeʼn stsaʼunejxani ja styempoʼil bʼa oj skʼuluk ja bʼa toji. Bʼa oja naʼ mas kʼuman ja artikulo «¿Alguna vez se hará justicia en el mundo?».
a Ja sbʼiʼil ja Dyosi, jani ja Jyoba (Salmo 83:18). Kʼela ja artikulo «¿Machunkiluk ja Jyoba?».