¡AJYANIK K’ELAN JAKAN!
Tujkʼajiye ja bʼa eskuela | ¿Ay maʼ jas wa xyala ja Biblia?
Ja 24 bʼa mayo bʼa 2022, ekʼ jun desgrasya xiwela sbʼaj ja bʼa yal chonabʼ Uvalde (Texas, bʼa Estados Unidos). Jastalni wa xyala ja peryodiko The New York Times, «jun winik stujkʼan 19 yal untik sok chabʼ maestra [...] ja bʼa eskuela primaria Robb».
Tristeni yabʼjel, pe ja jastik it bʼa jel xiwela sbʼaj yabʼjel tikʼani wa x-ekʼi. Ja peryodiko USA Today yala ke kechan ita ja bʼa Estados Unidos «ajyi 249 tujkʼanel ja bʼa eskuelaʼik ja jabʼil ekʼi, masni ipaxita ke yuj chikan jas jabʼil ekʼeljan masan bʼa 1970».
¿Jas yuj wa x-ekʼ ja desgrasyaʼik it bʼa jel xiwela sbʼaj? ¿Jastal wa xbʼobʼ kuchkujtik ja syajal wa xyiʼajan ja jastik it mi lekuki? ¿Wan maʼ xbʼobʼ jmajlaytik ke oj kʼot jun kʼakʼu oj chʼaysnajel ja milwaneli? Ja Biblia wa xyaʼa ja sjakʼjeli.
¿Jas yuj ja bʼa luʼumkʼinal jel wa x-ajyi ja milwanel?
Ja Biblia wa xya sbʼiʼiluk «tsaʼanikxta kʼakʼu» ja bʼa tyempo ayotiki. Ja it kʼotel jun tyempo bʼa «mi yaj oj ilwanuke» ja kristyanoʼiki sok «jelni kʼakʼ oj ajyuke», bʼa jelni kalax oj ajyuke sok oj ixtalanuke. Soka tikʼe kristyanoʼik jaw «masto oj ipaxuke ele» (2 Timoteo 3:1-5, 13). Ta waxa kʼana oja naʼ mas, kʼuman ja artikulo «¿Predijo la Biblia cómo sería la gente en nuestros días?».
Jitsan kristyano wa sjobʼo sbʼaje: «¿Jas yuj ja Dyos wa xyaʼakan oj ekʼuk desgrasyaʼik bʼa jel xiwel sbʼaj jastal ja tujkʼanelik ja bʼa eskuela?». Bʼa oja naʼ ja jas wa xyala ja Biblia, kʼuman ja artikulo «¿Por qué le pasan cosas malas a la gente buena?».
¿Jastal wa xbʼobʼ kuchkujtik ja syajal wa xyiʼajan ja jastik it mi lekuki?
«Yibʼanal ja jastik tsʼijbʼajikani tsʼijbʼajinikan bʼa oj sjekitik, bʼa jachuk [...] yuja wa xyaʼa kulan jkʼujoltik ja Yabʼal ja Dyosi ojni ajyukujtik smajlajel» (Romanos 15:4).
Ja rasonik wa xyaʼa ja Biblia ojni koltanuk bʼa oj kuchkujtik ajyel ja bʼa luʼumkʼinal it jel malo. Ta waxa kʼana oja naʼ mas, kʼuman ja rebista ¡Despertad! wa xyoloman «¿Acabará algún día la violencia?».
Ay ekʼele, ja bʼa notisyaʼik, ja yal untiki wa xyabʼye ma wa xyilawe notisyaʼik bʼa wa x-aji xiwukeyuj. Ta nantatalex sok waxa kʼana akoltajelex bʼa oja koltayex, kʼumanik ja artikulo «El efecto de las noticias en los niños».
¿Oj maʼ kʼot jun kʼakʼu oj chʼaysnajel ja milwaneli?
«Ja yeʼn oj ya elanik libre ja bʼa netʼwanel sok ja bʼa ixtalanel» (Salmo 72:14).
«Oj yawe paxuk ja yespadaʼe bʼa sjutjel luʼum sok ja slansaʼe bʼa xajlanel. Ja chonabʼ jumasaʼ mixa oj kʼeʼuke tiro sok mixa oj snebʼe tiroʼanel bʼa guerra» (Miqueas 4:3).
Ja Dyos ojni skʼuluk ja jas mi xbʼobʼ skʼuluke ja kristyano. Ja sGobyerno bʼa tey bʼa satkʼinali oj xchʼaysnajel spetsanil ja armaʼik sok ja milwanel. Ta waxa kʼana oja naʼ mas ja jas oj lajxukyuj skʼulajel ja sGobyerno ja Dyos, kʼuman ja artikulo «El Reino de Dios traerá “paz en abundancia”».