¿Jas tyempo oj chʼakuk ja guerraʼiki? | ¿Jasa wa xyala ja Biblia?
¡AJYANIK K’ELAN JAKAN!
¿Jas tyempo oj chʼakuk ja guerraʼiki? | ¿Jasa wa xyala ja Biblia?
Yuja Irán sjekayi ja Israel jitsan dron bʼa ayiʼoj bombaʼik ja bʼa sábado 13 bʼa abril bʼa 2024, ja secretario general bʼa las Naciones Unidas, ja Antonio Guterres yala ke jani styempoʼil bʼa ajyel laman sok skomjel jbʼajtik.
Ja guerra bʼa Oriente Medio (oeste bʼa Asia) juni sjejel ja bʼa jas wan ekʼel bʼa sutanal ja luʼumi.
Ja 26 bʼa enero bʼa 2023 ja Consejo de Seguridad de la ONU, yala ke ja luʼumkʼinali jelxani ipaxita el ja tiroʼaneli man ja bʼa xchabʼil guerra ekʼ bʼa spetsanil ja luʼumi, sok 2 mil miyon kristyanoʼik tini aye ja bʼa lugarik ixtalanubʼal yuja guerraʼiki.
Ja bʼa lugarik ixtalanubʼal yuja guerra tey ja Israel, Gaza, Siria, Azerbaiyán, Ucrania, Sudán, Etiopía, Níger, Myanmar sok Haití. a
¿Jas tyempo oj chʼakuk ja guerraʼiki? ¿Oj maʼ bʼobʼ lajxukyujile ja matik chaʼan xchole ja bʼa luʼumkʼinali yijeljan ja lamanili? ¿Jasa wa xyala ja Biblia?
Jel ja guerra
Ja guerraʼik wa xkilatik ja bʼa luʼumkʼinali juni senya ke jelxa mojan oj chʼakuk ja guerraʼiki. Jastalni wa xyala ja Biblia, ja guerraʼik it jani wa xchiktes ja bʼa jas tyempo wala taxtiki, bʼa wa sbʼiʼilan ja «xchʼakulabʼil ja jastal wa xtax ja tyempo» (Mateo 24:3).
• «Ja weʼnlexi oja wabʼyex yabʼalil guerraʼik bʼa tuktukil lugar [...]. Yujni yeʼnta oj tiroʼanuke ja chonabʼiki sok yeʼnta oj tiroʼanuke ja gobyerno jumasaʼ» (Mateo 24:6, 7).
Kʼuman ja artikulo «¿Jas senyaʼik oj ajyuk ja bʼa «tsaʼanikxta kʼakʼu» ma ja «jel xa mojan ja tiempo»?» bʼa yiljel jas yuj ja guerraʼik ja bʼa jtyempotiki jani wan kʼotel smeranil ja jas yalunejxakan ja Biblia.
Ja guerra bʼa oj xchʼaysnajel spetsanil ja guerra
Ja Biblia wa xyala ke oj chʼaysnajel spetsanil ja guerra, pe mini jaʼuk yuja jas wa skʼulane ja kristyano, jani stsʼakatal ja Armagedón, ja «guerra oj ajyuk ja bʼa niwan skʼakʼu ja Dyosi, ja Maʼ kechan jel ja yipi» (Apocalipsis 16:14, 16). Tsaʼan ja bʼa guerra it, ja Dyos ojni ya kʼot smeranil ja jas skʼapunejyi ja kristyano bʼa oj yabʼye stsamalil bʼa tolabida ja lamanili (Salmo 37:10, 11, 29).
Bʼa oja naʼ mas sbʼaja guerra bʼa Dyos ke oj xchʼaysnajel spetsanil ja guerraʼiki, kʼuman ja artikulo «¿Jasunkiluk ja Armagedón?»
[Nota]
a ACLED Conflict Index, «Ranking violent conflict levels across the world» (Clasificación por nivel de violencia de los conflictos alrededor del mundo), enero bʼa 2024.