Bʼa ajyel sakʼan, jpetsaniltik wani xmakunikujtik jaʼ bʼa asyado ay. Pe bʼa yibʼanal ja luʼumi jitsan miyon kristyano mi staʼawe jaʼ bʼa asyado ay. Jastalni yala ja sekretaryo ja bʼa ONU, ja António Guterres, «wantik stʼaspujel jun tsatsal wokol sbʼaja jaʼi, pes jelni wan jitsanbʼel ja matik mi staʼaweʼi».

 ¿Oj maʼ kʼotuk ja styempoʼil bʼa ajyukujtik jaʼ bʼa jpetsaniltik, ma mi oj chʼayuk ja wokol it? ¿Jasa wa xyala ja Biblia?

Ja jas wa skʼapa ja Biblia

 Ja Biblia wa xyala ke oj kʼotuk ja kʼakʼu bʼa mixa oj ixuk wokol yuja jaʼi. Jaʼuktoma, ojni ajyuk jitsan jaʼ bʼa asyado sok sak.

 «Ja bʼa desierto oj bʼojtuk ja jaʼi, sok tsatsal yok jaʼ oj ajyuk ja bʼa lajan kʼinal bʼa desierto. Ja takin luʼum yuja kʼaʼuji oj pax pampa jaʼ bʼa bʼutʼel kʼaʼemik, sok jaxa bʼa tʼajel ja luʼumi, oj bʼojtuk jaʼ» (Isaías 35:6, 7).

 Pe ¿wan maʼ xbʼobʼ jkʼuʼuktik ja bʼa skʼapjel it? Pensaraʼan bʼa jun jasunuk wa staʼa tiʼal ja Biblia sbʼaja jastal tojbʼel ja luʼumi.

Ja jas wa xyala ja Biblia sbʼaja Luʼumi sok ja jastal wan buelta ja jaʼi

 «Ja Dyos smeranili, ja Maʼ stojbʼes ja luʼumi, [...] mi lom ita skʼulan, pes yujni stojbʼes bʼa oj ajyuk swinkil» (Isaías 45:18).

 «Ja [Dyos] wa xya kʼeʼuk ja tʼujeʼik jaʼi; ja stabʼili wa xchebʼi bʼa oj pax jaʼ; anto ja asoni tixa wa xya kokon sbʼaja kristyanoʼiki» (Job 36:27, 28).

 «Ja keʼn oj ka yaʼ jitsan jaʼ ja bʼa styempoʼili, jaxa luʼumi oj bʼaʼalanuk sok ja teʼaltik ja bʼa jobʼi oj satinuk» (Levítico 26:4).

 Ja il ja Dyosi jani wan yaljel yabʼ ja israʼelenyoʼik bʼa najate, bʼa kʼotye tsʼunbʼanumik. Skʼapayile ke tikʼan oj ya koʼ jaʼ bʼa jachuk jel oj bʼaʼalanuk ja yalajeʼi. Ja yeʼn wa snaʼa, ke bʼa oj bʼaʼalanuk ja luʼumi, tʼilani oj yaʼ jaʼ ja bʼa styempoʼili.

 Ja Dyosi ya kʼotuk ja jas skʼapa, sok mojanxa jach junxta oj skʼuluk bʼa yibʼanal ja Luʼumi (Isaías 30:23). Malan x-eljul ja tyempo jaw, mastoni wan ipaxel ja wokol sbʼaja jaʼi bʼa jitsan lugar ja bʼa luʼumi, sok ja mi xyaʼa jaʼi kechan jun parte ja bʼa wokoli. Anto, ¿jasa smajlajel wa xyaʼa ja Biblia?

Ja jastal oj tojbʼuk ja wokol sbʼaja jaʼi

 Ja Biblia wa xcholo ke kechani yeʼn ja Dyos oj stojbʼes yibʼanal ja wokol ja bʼa luʼumi, bʼa ti chʼikan ja wokol sbʼaja jaʼi. Ja yeʼn ayiʼoj jun gobyerno ja bʼa satkʼinali bʼa oj ya mandar ja bʼa Luʼumi, sok wa sbʼiʼilan ja sGobyerno ja Dyosi (Daniel 2:44; Mateo 6:9, 10; Apocalipsis 11:15). Ja yeʼn ojni lajxukyuj ja jas mi xbʼobʼ skʼul ja gobyernoʼik ja bʼa luʼumi: xchʼayjel snajel ja wokol kiʼojtik yuja jaʼi.

 Wokol: Ja jastal wan tukbʼel ja clima wani sjomjel ja jastal wan yajel buelta ja jaʼi. Ja it wani xyaʼakan bʼa oj lemxuk jitsan tyempo sok ajyel bʼutʼ jaʼik, ayni ekʼele yuja jelxelxa wa xyaʼa jaʼi sok ay ekʼele yuja wan bʼutʼel mas ja mari, sok tuk jastik.

 Jastal oj tojbʼuk: Ja sGobyerno ja Dyosi ojni ya kumxuk ja jastal wa xtax ajyi ja luʼumi. Ja Dyos skʼapa: «¡Kʼela! Wanon skʼulajel yajkʼachil yibʼanal ja jastik junuki» (Apocalipsis 21:5). Oj ajyuk jitsan jaʼ ja bʼa takin luʼumi, sok oj ajyuk sakʼanil ja bʼa lugarik wokol oj ajyuk ja wego (Isaías 41:17-20). Ja sGobyerno ja Dyosi, bʼa tey bʼa skʼabʼ ja Jesukristo, cha ojni xchʼaysnajel ja desgrasyaʼik wa x-ekʼ ja bʼa luʼumi.

 Wokol: Yuja smul jitsan empresaʼik sok yuja mi stalnaye ja kristyanoʼiki, ja yok jaʼik, ja pampa jaʼik sok ja jaʼik bʼa yibʼ luʼumi kuxani ay, soka jaw wani xyaʼakan bʼa mixa jel oj ajyuk jaʼ bʼa asyado ay.

 Jastal oj tojbʼuk: Ja Dyos oj ya ajyuk asyado ja luʼumi, ja yok jaʼik, ja pampa jaʼik sok ja mari. Oj stojbʼes ja jastal jomubʼal ja luʼumi, sok oj pax jun tsamal lugar. Ja Biblia tsamalxta wa xyala: «Ja desierto sok ja takin luʼumi oj ajyuke gusto, sok ja lajan kʼinal ja bʼa desierto gusto oj ajyuk sok oj nichinuk jastal ja azafrán» (Isaías 35:1).

 Wokol: Ja kristyanoʼiki lom wane yixtalajel ja jaʼi: wegoni wane xchʼakjel ke mi x-ajiyi tyempo ja Luʼumi bʼa oj cha ya ajyuk.

 Jastal oj tojbʼuk: Ja sGobyerno ja Dyosi oj lajxukyuj bʼa oj kʼulaxuk ja jas wa skʼana ja Dyos ja bʼa Luʼumi, sok mi jaʼuk ja jas wa skʼanawe ja kristyanoʼik bʼa kechan wa spensarane bʼa yeʼnle (Mateo 6:9, 10). Ja sGobyerno ja Dyosi ojni yayi lekil chapjelal ja matik oj ajyuki. Pes ja bʼa Isaías 11:9 wa xyala: «Ja luʼumi bʼutʼelni oj ajyuk soka snajel yiʼoj ja Jyoba». a Stsʼakatal yuja snajel jaw sok yuja syajal skʼujole soka Dyos sok ja jas skʼuluneji, ja kristyanoʼiki ojni bʼobʼ stalnaye lek ja tsamal luʼumi sok ja jastik yiʼoji.

•    Bʼa oja naʼ jasa mas oj skʼuluk ja sGobyerno ja Dyosi, kʼuman ja artikulo «¿Jasa oj skʼuluk ja sGobyerno ja Dyos?».

•    ¿Wan maʼ xa kʼana oja naʼ jastal oj ajyuk ja Luʼum yajni xpax jun tsamal lugar? Kʼuman bʼa Biblia ja bʼa kapitulo 35 bʼa Isaías.

•    Bʼa oja naʼ mas jasa wa skʼana ja Dyos sbʼaja Luʼumi sok ja kristyano, kʼela ja bideo ¿Jas yuj ja Dyos skʼulan ja Luʼumi?