1 Corintios 15:1-58
-
Ja sakʼwelal ja Kristo (1-11)
-
Ja sakʼwelali jani skujlayubʼil ja skʼuʼajeli (12-19)
-
Ja sakʼwelal ja Kristo juni meran preba bʼa ojni ajyuk sakʼwelal (20-34)
-
Ja mero kuerpoʼali sok ja kuerpoʼal bʼa ikʼ ason ayi (35-49)
-
Ja it mixa xchami sok ja it mixa xjomi (50-57)
-
Ajyel latsan ja bʼa yaʼtel ja Kajwaltiki (58)
15 Kermano jumasaʼ, ja wego wa xka juluka kʼujolex ja lekil rasonik kalawabʼyexi, ja it akʼuʼanexi sok yij ajyelex yuja jaw.
2 Ta mixa sijpanex ja lekil rasonik kalawabʼyexi, ja weʼnlexi wanexni stajela koltajelex. Mokxta jachuk, lomni ochyex kʼuʼumanil.*
3 Pes ja bʼa jastik bʼajtan ka ekawilexi, cha tey ja bʼa jastik akʼubʼal eki ja keʼn: ke ja Kristo chamni yuja jmultiki, jastalni wa xyala ja Yabʼal ja Dyosi.
4 Ja yeʼn mukji sok sakʼwi* ja bʼa yoxil kʼakʼu, jastalni wa xyala ja Yabʼal ja Dyosi.
5 Sok sjeʼa sbʼaj soka Cefas* sok tsaʼan soka 12 jekabʼanumiki.
6 Cha tixa sjeʼa sbʼajsok mas ja 500 kermanotik, sok tʼusan mi yibʼanaluk titoni aye jmoktik, ama jujuntik wanexa jijlel ja bʼa chamelali.
7 Sok cha tixa sjeʼa sbʼaj soka Santiago; tsaʼan, sok yibʼanal ja jekabʼanumiki.
8 Sok tsaʼan, tixa sjeʼa sbʼaj jmok jastal june maʼ wa xpojki* bʼa mito yoraʼiluk.
9 Yujni keʼn ja mas skoʼelal ja bʼa jekabʼanumiki, sok mi xbʼajin oj aljukabʼ jekabʼanum, yujni kiʼajyi spatik ja skongregasyon ja Dyosi.
10 Pe yuja lekil skʼujol mi xbʼajintik ja Dyos kʼotelon jekabʼanum. Sok mini lomuk sjeʼunejki ja lekil skʼujol mi xbʼajintiki, pes yujni masto aʼtelon yuja yeʼnleʼi. Pe mini keʼnukon, pes jani yuja tey jmok ja lekil skʼujol mi xbʼajintik ja Dyosi.
11 Anto, sea keʼna ma sea yeʼnle, jachni wa xcholotikon sok jachni kʼotela kʼuʼukex ja weʼnlexi.
12 Pe ta wan cholxel ke ja Kristo aji kʼeʼuk ja bʼa chamwiniki, ¿jastal lek jujuntik ja bʼa weʼnlexi waxa walawex ke mi oj ajuk sakʼwuke ja chamwiniki?
13 Iday, ta mi oj ajuk sakʼwuke ja chamwiniki, cha mini aji sakʼwuk ja Kristo.
14 Pe ta mi aji sakʼwuk ja Kristo, lomni ja jas wa xcholotiki, cha lomni ja jas waxa kʼuʼanexi.
15 Chomajkil, ta mi meran oj ajuk sakʼwuke ja chamwiniki, ja Dyosi mini cha ya sakʼwuk ja Kristo. Sok ja it wa stojolan mi meranuk ja jas wantik xcholjel sbʼaja Dyosi yajni wa xkalatik ya sakʼwuk ja Kristo.
16 Pes ta mi oj ajuk sakʼwuke ja chamwiniki, cha mini aji sakʼwuk ja Kristo.
17 Chomajkil, ta mi aji sakʼwuk ja Kristo, mini xmakuni ja skʼuʼajela wiʼojexi; cha mitoni libre ayukex ja bʼa wa mulexi.
18 Anto, ja matik jijliyeta ja bʼa chamelal jastal snochumanik ja Kristo chʼaytani snajele bʼa tolabida.
19 Ta kechan ay kiʼojtik smajlajel bʼa Kristo ja yajni sakʼanotiki, mastoni jel ajula jbʼajtik ja keʼntik ke yuja tuki.
20 Pe ja Kristo aji kʼeʼuk ja bʼa chamwiniki. Yeʼnani aji sakʼwuk bʼajtan* ja bʼa matik wanexa jijlel ja bʼa chamelali.
21 Jastalni ja chamelal kʼot ajyuk yuj smul jun winik, ja sakʼwelal ja chamwiniki oj cha ajyuk yuj spabor jun winik.
22 Pes jastalni naka wane chamel yuj smul ja Adán, cha ojni ajukyi sakʼanile yuj spabor ja Kristo.
23 Pe jani jastal wa xkoʼ sbʼaje kada jujune: jani bʼajtan* ja Kristo, sok tsaʼan ja matik yeʼn sbʼaj ja Kristo ja yajni tixa ay* ja yeʼn.
24 Sok tixa oj chʼakan ja yajni skʼulanyi entregar ja sGobyerno ja sTat sok sDyosi sok xchʼayata snajel yibʼanal ja gobyernoʼik sok cholalik sok ipalik.
25 Yujni ja yeʼn tʼilan oj ya mandar masan ja Dyos xyaʼa bʼa yibʼ yok yibʼanal ja skontraʼiki.
26 Jaxa último kontraʼal, ja chamelali, ojni chʼaysnajel.
27 Yujni ja Dyosi «yayi yibʼanal ja jastik junuk b’a yibʼ yok». Pe yajni ja yeʼn yala ke ajitayi b’a skʼabʼ yibʼanal ja jastik junuki, ja it chikani lek mi ti chʼikanuk ja Dyosi ja Ma’ yayi b’a skʼabʼ yibʼanal ja jastik junuki.
28 Pe yajni ja Dyos chʼakta yayi bʼa skʼabʼ yibʼanal ja jastik junuk ja Yunini, anto ja Uninali oj kʼot ajyuk bʼa yibʼ skʼabʼ ja Dyosi, ja Maʼ ajiyiyuj bʼa skʼabʼ yibʼanal ja jastik junuki. Sok jachuk ja Dyosi yeʼnxa oj ajyuk bʼa skʼabʼ yibʼanal ja jastik junuki.
29 Lekbʼi mi jachukuki, ¿jasa slekilal oj ajukyile ja matik wa xyiʼaje jaʼ bʼa kechan oj chamuke? Ta mi oj sakʼwuke ja matik chamelexa, ¿jas yuj wa xyiʼaje jaʼ bʼa kechanta oj chamuke?
30 ¿Sok jas yuj tolabida peligro aytik?
31 Kʼakʼu kʼakʼu wa xtʼaspun ja chamelali. Kala kermano jumasaʼ, ja it merani lek jastalni ja gustoʼil wa xkabʼ yuj weʼnlex ja bʼa Kajwaltik Kristo Jesús.
32 Jastalni ja tuk winike,* ta ja keʼn tiroʼanelon sok kʼakʼal chanteʼik ja bʼa Éfeso, ¿jas yaʼtelkuj? Ta mi oj sakʼwuke ja matik chamelexa, «la waʼkotik sok la kuʼtik, yujni ja jecheli oj chamkotik».
33 Moka waʼabʼajex loʼlajel. Ja matik mi lek smojtajeleʼi wa sjomo ja lekil jmodotiki.*
34 Ochanik rason skʼulajel ja bʼa jas toji sok aʼawikxakan slejel jawa mulexi, yujni jujuntik mey yiʼoje snajel bʼa Dyos. Wani xkalawabʼyex ja it bʼa oj kʼixwanik.
35 Pe ayni maʼ oj yal: «¿Jastal modo oj sakʼwuke ja chamwiniki? ¿Sok jas tikʼe kuerpoʼal oj ajyukyujile ja yajni sakʼwiyeʼi?».
36 ¡Ja weʼn mini tʼun xa pensaraʼan! Ja jas waxa tsʼunu mini xkʼot ajyuk sakʼan ta mi xcham bʼajtani.
37 Ja weʼn mini xa tsʼunu jun jasunuk bʼa kʼita, pes waxa tsʼunu jun inat, sea bʼa trigo ma tuk inat.
38 Pe ja Dyosi wani xya kʼiʼuk jastal wa skʼana sok tuktukil ja jastal wa xkʼi kada inat.
39 Mini junukxta naka kʼotele ja kuerpoʼali: ay bʼa kristyanoʼik, ay bʼa chanteʼik sok ay bʼa yal chan sok ay bʼa chay.
40 Sok tey ja matik teye bʼa satkʼinal sok ja matik teye bʼa luʼumi, pe ja stsamalile ja matik teye bʼa satkʼinali tuk lek sok cha tuk lek ja stsamalile ja matik teye bʼa luʼumi.
41 Tukni ja stsamalil ja kʼaʼuji, cha tukni ja stsamalil ja luna cha tukni ja stsamalil ja kʼanaliki; iday, tuktukilni ja stsamalil kada kʼanal.
42 Cha junxtani wa x-ekʼ soka sakʼwelal ja chamwiniki. Ja kuerpoʼal wa xchami wani xjomi, pe ja kuerpoʼal wa sakʼwiʼi mini xbʼobʼ jomuk.
43 Mini xkisji ja yajni wa xmukji, pe wani x-ajiyi stoyjelal ja yajni wa sakʼwi. Mini ay yip ja yajni wa xmukji, pe ayni yip ja yajni wa sakʼwi.
44 Wa xmukji ja mero kuerpoʼali, pe wa sakʼwi jun kuerpoʼal jach ikʼ ason. Ta ay jun mero kuerpoʼal, cha ayni jun kuerpoʼal jach ikʼ ason.
45 Jachni tsʼijbʼunubʼal: «Ja bʼajtan winik Adán pax jun sakʼan kristyano». Jaxa último Adani pax jun ikʼ ason* bʼa wa xyaʼa sakʼanil.
46 Pe mini jaʼuk wa xjak bʼajtan ja kuerpoʼal bʼa ikʼ ason ayi. Jani wa xjak bʼajtan ja mero kuerpoʼali sok tsaʼan ja bʼa ikʼ ason ayi.
47 Ja bʼajtan winiki tini sbʼaj bʼa luʼum sok kʼulajisok polbo; jaxa xchabʼil winiki tini sbʼaj bʼa satkʼinal.
48 Ja matik kʼulubʼal sok polbo jachuke jastal ja maʼ kʼulaji sok polbo; ja matik ti sbʼaje bʼa satkʼinali jachuke jastal ja maʼ ti sbʼaj bʼa satkʼinali.
49 Sok jastalni kʼotelotik splanta ja maʼ kʼulaji sok polbo, cha jachni oj kʼotkotik splanta ja maʼ tey bʼa satkʼinali.
50 Pe kermano jumasaʼ, wani xkalawabʼyex ja it: ja kuerpoʼal bʼa chikʼ bʼakʼet mini xbʼobʼ sbʼajuk ja sGobyerno ja Dyosi sok ja jas wa xjomi mini xbʼobʼ sbʼajuk ja jas mi xjomi.
51 ¡Kʼelawilex! Oj kalawabʼyex jun jasunuk bʼa jel chaʼanyabʼal jakel bʼa Dyos:* mini jpetsaniluktik oj jijlukotik ja bʼa chamelali, pe kibʼanaltik oj tukbʼesjukotik
52 bʼa junta jutsʼin, wegoxtani oj ekʼuk jastal yajni wa xmutsʼutik sok wa xjamatik ja jsatiki, ja yajni x-okʼ ja tsaʼanxta trompeta. Yujni oj okʼuk ja trompeta sok jaxa chamwinikeʼi oj sakʼwuke soka skuerpoʼe mixa oj jomuki, jaxa keʼntiki oj tukbʼukotik.
53 Yujni ja it bʼa wa xjomi tʼilani oj tukbʼuk bʼa mixa oj jomuk, sok jaxa it bʼa wa xchami tʼilani oj tukbʼuk bʼa mixa oj chamuk.
54 Pe yajni ja it bʼa wa xjomi wa xtukbʼi bʼa mixa oj jomuk sok ja it bʼa wa xchami wa xtukbʼi bʼa mixa oj chamuk, anto ojni kʼotuk ja jas tsʼijbʼunubʼali: «Ja chamelali ojni chʼayjuk snajel* bʼa tolabida».
55 «Chamelal, ¡kʼulajiyata ganar! Chamelal, ¿bʼay jawa tsʼistakʼinil bʼa wala chʼubʼwanisoki?».
56 Ja tsʼistakʼin wa xchʼubʼwani bʼa wa xmilwani jani ja mulali, jaxa yip ja mulali jani ja Leyi.*
57 ¡Pe wa xkatikyi tsʼakatal ja Dyos yujni wa xya jkʼultik ganar yuja Kajwaltik Jesukristo!
58 Ja yujil, kala kermano jumasaʼ, ajyanik yij, mok nijkanik, sok tolabida ajyanik latsan ja bʼa yaʼtel ja Kajwaltiki, pes wani xa naʼawex mini lomuk jawa waʼtelex bʼa ti chʼikan soka Kajwaltiki.
Notaʼik
^ Ma «kreyenteʼil».
^ Jach kanel ja bʼa griego: «kʼe», sok jachuk bʼa yibʼanal ja kapitulo.
^ Cha wa sbʼiʼilan Pedro.
^ Ma «wa xmanxi».
^ Jach kanel ja bʼa griego: «bʼajtanik sat».
^ Jach kanel ja bʼa griego: «bʼajtanik sat».
^ Ja bʼa griego, parousía. Kʼela ja bʼa Yaljelik cholubʼal.
^ Ma bʼobʼta «jastalni wa spensarane ja kristyano».
^ Ma «ja jastik lek wa xkʼulantiki».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal, Ja jas jel chaʼanyabʼal wa xjak bʼa Dyosi.
^ Jach kanel ja bʼa griego: «oj bʼukʼjuk».
^ Ma «ja Leyi wa xyayi yip ja mulali».
